ਫਿਲਮ ‘ਅਬ ਤੁਮਾਰੇ ਹਵਾਲੇ ਵਤਨ ਸਾਥੀਓ’ ਵਿੱਚ ਅਕਸ਼ੈ ਕੁਮਾਰ ਦੇ ਆਪੋਜ਼ਿਟ ਡੈਬਿਊ ਕਰਨ ਵਾਲੀ ਦਿਵਿਆ ਖੋਸਲਾ ਛੇਤੀ ਹੀ ਅਭਿਨੈ ਵਿੱਚ ਵਾਪਸੀ ਕਰਨ ਵਾਲੀ ਹੈ। ਉਹ ਜਾਨ ਆਬਰਾਹਮ ਨਾਲ ਫਿਲਮ ‘ਸਤਿਆਮੇਵ ਜਯਤੇ’ ਦੇ ਸੀਕਵਲ ਵਿੱਚ ਨਜ਼ਰ ਆਏਗੀ। ਬੀਤੇ ਆਜ਼ਾਦੀ ਦਿਹਾੜੇ 'ਤੇ ਜਾਨ ਅਬਰਾਹਮ ਦੀ ਫਿਲਮ ‘ਸਤਿਆਮੇਵ ਜਯਤੇ’ ਰਿਲੀਜ਼ ਹੋਈ ਸੀ। ਇਸ ਵਾਰ ਇਸ ਦਾ ਸੀਕਵਲ ਬਣਾਏ ਜਾਣ ਦੀ ਤਿਆਰੀ ਹੈ ਤੇ ਇਸ ਦੇ ਨਾਲ ਖੂਬਸੂਰਤ ਦਿਵਿਆ ਸਿਲਵਰ ਸਕਰੀਨ ਉੱਤੇ ਵਾਪਸੀ ਕਰਨ ਵਾਲੀ ਹੈ। ਉਸ ਨੇ ਸਾਲ 2014 ਵਿੱਚ ਫਿਲਮ ‘ਅਬ ਤੁਮਾਰੇ ਹਵਾਲੇ ਵਤਨ ਸਾਥੀਓ' ਨਾਲ ਡੈਬਿਊ ਤੋਂ ਬਾਅਦ ਟੀ-ਸੀਰੀਜ਼ ਦੇ ਮਾਲਕ ਭੂਸ਼ਣ ਕੁਮਾਰ ਨਾਲ ਵਿਆਹ ਕਰਵਾ ਕੇ ਐਕਟਿੰਗ ਨੂੰ ਅਲਵਿਦਾ ਕਹਿ ਦਿੱਤਾ ਸੀ, ਪਰ ਪ੍ਰੋਡਿਊਸਰ ਦੇ ਤੌਰ 'ਤੇ ਕੰਮ ਕਰਦੀ ਰਹੀ।
‘ਯਾਰੀਆਂ’ ਅਤੇ ‘ਸਨਮ ਰੇ’ ਵਰਗੀਆਂ ਮਿਊਜ਼ੀਕਲ ਰੋਮਾਂਟਿਕ ਫਿਲਮਾਂ ਦੀ ਡਾਇਰੈਕਸ਼ਨ ਕਰ ਚੁੱਕੀ ਦਿਵਿਆ ਇੱਕ ਵਾਰ ਫਿਰ ਐਕਟਿੰਗ ਵਿੱਚ ਹੱਥ ਅਜਮਾਉਣ ਦੇ ਲਈ ਤਿਆਰ ਹੋ ਚੁੱਕੀ ਹੈ। ਸੂਤਰਾਂ ਮੁਤਾਬਕ ਨਿਰਦੇਸ਼ਕ ਮਿਲਾਪ ਝਾਵੇਰੀ ਨੇ ਦਿਵਿਆ ਲਈ ਇਸ ਵਾਰ ਇੱਕ ਮਜ਼ਬੂਤ ਕਿਰਦਾਰ ਲਿਖਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਮਿਲਾਪ ਨੇ ਇਸ ਦੀ ਕਹਾਣੀ ਲਿਖ ਲਈ ਹੈ ਅਤੇ ਉਹ ਸ਼ੂਟਿੰਗ ਦੀਆਂ ਤਿਆਰੀਆਂ 'ਚ ਜੁਟ ਚੁੱਕਾ ਹੈ।