ਟੋਰਾਂਟੋ, 19 ਜੂਨ (ਪੋਸਟ ਬਿਊਰੋ) : 2019 ਦੀਆਂ ਗਰਮੀਆਂ ਵਿੱਚ ਬਾਲੀਵੁੱਡ ਦੀ ਤਰਜ਼ ਦੇ ਮਿਊਜਿ਼ਕ ਤੇ ਡਾਂਸ ਪਾਰਟੀ ਵਿੱਚ ਹਿੱਸਾ ਲੈਣ ਤੋਂ ਵੱਧ ਕੇ ਰਾਹਤ ਦੇਣ ਵਾਲਾ ਹੋਰ ਕੀ ਹੋ ਸਕਦਾ ਹੈ? ਇਸ ਲਈ 21 ਜੂਨ ਨੂੰ ਸ਼ਾਮੀਂ 7:30 ਵਜੇ ਤੋਂ ਬੁਟੀਕ ਸਟਾਈਲ ਹੋਟਲ ਥੌਂਪਸਨ ਟੋਰਾਂਟੋ ਵਿਖੇ ਜੀਟੀਏ ਸਾਊਥ ਏਸ਼ੀਅਨ ਮੀਡੀਆ ਨੈੱਟਵਰਕ ਵੱਲੋਂ ਲਾਵਾ ਲਾਊਂਜ-ਬੌਲੀਪੌਪ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ।
ਐਵਾਰਡ ਜੇਤੂ ਮੀਡੀਆ ਪੋ੍ਰਫੈਸ਼ਨਲ ਐਨੀ ਕੋਸ਼ੀ, ਜੋ ਕਿ ਜੀਟੀਏ ਸਾਊਥ ਏਸ਼ੀਅਨ ਮੀਡੀਆ ਨੈੱਟਵਰਕ ਇਨਕਾਰਪੋਰੇਸ਼ਨ ਦੀ ਬਾਨੀ ਤੇ ਸੀਈਓ ਹਨ, ਵੱਲੋਂ ਆਯੋਜਿਤ ਲਾਵਾ ਲਾਊਂਜ ਕੰਸੈਪਟ ਅਜਿਹੀ ਸ਼ਾਮ ਹੈ ਜਿੱਥੇ ਮਨੋਰੰਜਨ, ਮਿਊਜਿ਼ਕ ਤੇ ਫੰਨ ਹੈ। ਕਲਾ ਤੇ ਐਂਟਰਟੇਨਮੈਂਟ ਇੰਡਸਟਰੀ ਨਾਲ ਜੁੜੇ ਲੋਕਾਂ ਲਈ ਨਵੇਂ ਦਰਵਾਜ਼ੇ ਖੋਲ੍ਹਣ ਦੀ ਸਾਖ਼ ਕਾਇਮ ਕਰਨ ਵਾਲੀ ਐਨੀ ਕਈ ਕਾਰੋਬਾਰੀ ਸਬੰਧਾਂ ਦਾ ਕੇਂਦਰ ਵੀ ਰਹੀ ਹੈ।
ਸ਼ੁੱਕਰਵਾਰ ਦੀ ਇਸ ਸ਼ਾਮ ਨੂੰ ਯਾਦਗਾਰੀ ਬਣਾਉਣ ਲਈ ਆਪਣੀ ਟੀਮ ਨਾਲ ਜੀਅਤੋੜ ਕੋਸਿ਼ਸ਼ ਕਰ ਰਹੀ ਐਨੀ ਦਾ ਕਹਿਣਾ ਹੈ ਕਿ ਟੋਰਾਂਟੋ ਵਿੱਚ ਹੁਨਰ ਦੀ ਕੋਈ ਕਮੀ ਨਹੀਂ ਹੈ। ਇਹ ਬੜੇ ਹੀ ਮਾਣ ਵਾਲੀ ਗੱਲ ਹੈ ਕਿ ਲਾਵਾ ਲਾਊਂਜ ਰਾਹੀਂ ਅਜਿਹਾ ਪਲੇਟਫੌਰਮ ਮੁਹੱਈਆ ਕਰਵਾਉਣ ਦਾ ਮੌਕਾ ਸਾਨੂੰ ਮਿਲਿਆ ਹੈ ਜਿਸ ਤਹਿਤ ਲਾਈਵ ਮਿਊਜ਼ੀਸ਼ੀਅਨਜ਼, ਅਹਿਮ ਸ਼ਖਸੀਅਤਾਂ ਦੀ ਹਾਜ਼ਰੀ ਵਿੱਚ ਸੰਗੀਤ ਤੇ ਡਾਂਸ ਪਾਰਟੀ ਦਾ ਆਨੰਦ ਲੈਣ ਦਾ ਮਜ਼ਾ ਹੀ ਕੁੱਝ ਹੋਰ ਹੋਵੇਗਾ।
ਇਸ ਮੌਕੇ ਲਾਵਾ ਲਾਊਂਜ ਬੌਲੀਪੌਪ ਦੀ ਮੁੱਖ ਕਲਾਕਾਰ ਸਿ਼ਖਾ ਚੈਟਰਜੀ ਹੋਵੇਗੀ। ਜੀਟੀਏ ਵਿੱਚ ਸਾਊਥ ਏਸ਼ੀਅਨ ਈਵੈਂਟਸ ਵਿੱਚ ਸਿ਼ਖਾ ਦੀ ਆਪਣੀ ਵੱਖਰੀ ਪਛਾਣ ਹੈ। ਉਸਦਾ ਸੰਗੀਤਕ ਪਿਛੋਕੜ ਹੈ ਤੇ 2017 ਵਿੱਚ ਅਭੀਜੀਤ ਭੱਟਾਚਾਰਿਆ ਦੇ ਸ਼ੋਅ ਦੀ ਸੁ਼ਰੂਆਤ ਤੇ ਮੁੰਬਈ ਵਿੱਚ ਬੱਪੀ ਲਹਿਰੀ ਦੇ ਸ਼ੋਅ ਦੀ ਸ਼ੁਰੂਆਤ ਸਿ਼ਖਾ ਵੱਲੋਂ ਹੀ ਕੀਤੀ ਗਈ ਸੀ। 21 ਜੂਨ ਨੂੰ ਵੀ ਉਹ ਆਪਣੀ ਕਮਾਲ ਦੀ ਪਰਫੌਰਮੈਂਸ ਨਾਲ ਦਰਸ਼ਕਾਂ ਨੂੰ ਕੀਲ ਕੇ ਰੱਖੇਗੀ।
ਇਸ ਮੌਕੇ ਗਾਇਕਾ ਨੀਤੂ ਭਦੌਰੀਆ ਤੇ ਹਿੱਪ ਹਾਪ ਆਰਟਿਸਟ ਸਲਿੱਕ ਤਵੋਸਾਦੇਜ਼ ਵੀ ਆਪਣੀ ਕਲਾ ਦੇ ਜੌਹਰ ਵਿਖਾਉਣਗੇ। ਇਸ ਦੌਰਾਨ ਰਾਗਿਨੀ ਵੱਲੋਂ ਵੀ ਸਪੈਸ਼ਲ ਪਰਫੌਰਮੈਂਸ ਦਿੱਤੀ ਜਾਵੇਗੀ। ਡਾਂਸ ਪਾਰਟੀ ਲਈ ਮਸ਼ਹੂਰ ਡੀਜੇਜ਼ ਡੀਜੇ ਸੂਜ਼ਾ ਤੇ ਡੀਜੇ ਵਿਸ਼ੀਅਸ ਨੂੰ ਸੱਦਿਆ ਗਿਆ ਹੈ, ਜਿਹੜੇ ਬਾਲੀਵੁੱਡ ਤੇ ਪੱਛਮੀਂ ਤਰਜ਼ਾਂ ਰਾਹੀਂ ਸਾਰਿਆਂ ਨੂੰ ਥਿਰਕਣ ਵਾਸਤੇ ਮਜਬੂਰ ਕਰਨਗੇ।