ਵਾਸ਼ਿੰਗਟਨ, 19 ਜੂਨ (ਪੋਸਟ ਬਿਊਰੋ)- ਦੁਨੀਆ ਭਰ ਵਿੱਚ ਹਿੰਸਾ, ਜੰਗ ਅਤੇ ਸੋਸ਼ਣ ਕਾਰਨ ਲਗਭਗ 7.1 ਕਰੋੜ ਲੋਕ ਆਪਣੇ ਘਰ ਛੱਡ ਕੇ ਦੂਜੀਆਂ ਥਾਵਾਂ ਉੱਤੇ ਚਲੇ ਗਏ ਹਨ। ਇਹ ਪ੍ਰਗਟਾਵਾ ਯੂ ਐੱਨ ਓ ਦੀ ਸ਼ਰਨਾਰਥੀ ਏਜੰਸੀ ਦੀ ਇਕ ਰਿਪੋਰਟ ਵਿੱਚ ਹੋਇਆ ਹੈ। ਸਾਲਾਨਾ ‘ਗਲੋਬਲ ਟਰੈਂਡਜ਼` ਦੀ ਰਿਪੋਰਟ ਯੂ ਐੱਨ ਰਾਸ਼ਟਰ ਸ਼ਰਨਾਰਥੀ ਹਾਈ ਕਮਿਸ਼ਨ ਨੇ ਜਾਰੀ ਕੀਤੀ ਹੈ। ਇਸ ਵਿੱਚ ਸਾਲ 2018 ਦੇ ਅੰਤ ਤਕ ਦੁਨੀਆਂ ਭਰ ਦੇ ਸ਼ਰਨਾਰਥੀਆਂ ਅਤੇ ਹਿਜਰਤ ਦੀ ਇੱਛਾ ਰੱਖਣ ਵਾਲੇ ਲੋਕਾਂ ਦੀ ਗਿਣਤੀ ਕੀਤੀ ਗਈ ਹੈ।
ਹਾਈ ਕਮਿਸ਼ਨਰ ਫਿਲਿਪੋ ਗ੍ਰਾਂਡੀ ਨੇ ਰਿਪੋਰਟ ਜਾਰੀ ਕਰਦਿਆਂ ਕਿਹਾ ਹੈ ਕਿ ਪ੍ਰਵਾਸੀ ਜਿਸ ਦੇਸ਼ ਵਿੱਚ ਜਾਂਦੇ ਹਨ, ਓਥੇ ਵੀ ਉਨ੍ਹਾਂ ਨੂੰ ਨੌਕਰੀ ਤੇ ਸੁਰੱਖਿਆ ਬਾਰੇ ਖ਼ਤਰਿਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਰਿਪੋਰਟ ਵਿੱਚ ਲੋਕਾਂ ਦੀਆਂ ਕਹਾਣੀਆਂ ਉੱਤੇ ਵੀ ਚਾਨਣਾ ਪਾਇਆ ਗਿਆ ਹੈ ਕਿ ਕਿਵੇਂ ਉਹ ਜਿਊਣ ਦਾ ਸੰਘਰਸ਼ ਕਰਦੇ ਅਤੇ ਨਦੀਆਂ, ਰੇਗਿਸਤਾਨ, ਸਮੁੰਦਰ ਤੇ ਹੋਰ ਮੁਸ਼ਕਲਾਂ ਜਿਵੇਂ ਕੁਦਰਤੀ ਅਤੇ ਮਨੁੱਖੀ (ਸਰਕਾਰੀ ਸ਼ੋਸ਼ਣ, ਸਮੂਹਕ ਕਤਲ, ਜਿਨਸੀ ਸ਼ੋਸ਼ਣ ਅਤੇ ਹੋਰ ਹਿੰਸਾ) ਨੂੰ ਪਾਰ ਕਰ ਕੇ ਆਉਂਦੇ ਹਨ। ਯੂ ਐੱਨ ਐਚ ਸੀ ਆਰ ਦਾ ਕਹਿਣਾ ਹੈ ਕਿ 7.08 ਕਰੋੜ ਲੋਕਾਂ ਨੂੰ ਬੀਤੇ ਸਾਲ ਦੇ ਅੰਤ ਤਕ ਮਜਬੂਰਨ ਹਿਜਰਤ ਕਰਨੀ ਪਈ ਸੀ। ਇਹ ਅੰਕੜਾ 2017 ਵਿੱਚ 6.85 ਕਰੋੜ ਸੀ। ਇਸ ਵਿੱਚ ਬੀਤੇ ਇਕ ਦਹਾਕੇ ਵਿੱਚ 65 ਫੀਸਦੀ ਵਾਧਾ ਹੋਇਆ ਸੀ।
ਸੀਰੀਆ ਦੀ ਜੰਗ ਚੱਲਦੇ 8 ਸਾਲ ਤੋਂ ਵੱਧ ਸਮਾਂ ਹੋ ਗਿਆ ਹੈ। ਇੱਥੋਂ ਦੇ ਲੋਕ ਸੱਭ ਤੋਂ ਵੱਧ ਹਿਜਰਤ ਕਰਦੇ ਹਨ। ਇਨ੍ਹਾਂ ਦੀ ਗਿਣਤੀ 1.3 ਕਰੋੜ ਦੱਸੀ ਗਈ ਹੈ। ਸਾਲ 2018 ਵਿੱਚ ਪਨਾਹ ਮੰਗਣ ਵਾਲਿਆਂ ਵਿੱਚ ਵੈਨੇਜ਼ੁਏਲਾ ਦੇ ਲੋਕਾਂ ਦੀ ਗਿਣਤੀ ਸੱਭ ਤੋਂ ਵੱਧ 3.40 ਲੱਖ ਤੋਂ ਵੱਧ ਹੈ। ਬੀਤੇ ਸਾਲਾਂ ਵਿੱਚ 40 ਲੱਖ ਲੋਕਾਂ ਨੇ ਦਖਣੀ ਅਮਰੀਕੀ ਦੇਸ਼ਾਂ ਨੂੰ ਛੱਡ ਦਿੱਤਾ ਹੈ। ਇਨ੍ਹਾਂ ਵਿੱਚ ਸੱਭ ਤੋਂ ਵੱਧ ਲੋਕ ਪੇਰੂ, ਕੋਲੰਬੀਆ ਤੇ ਬ੍ਰਾਜੀਲ ਗਏ ਹਨ। ਅਮਰੀਕਾ ਵਿੱਚ ਹਾਲੇ ਮੈਕਸੀਕੋ ਤੋਂ ਆਉਂਦੇ ਸ਼ਰਨਾਰਥੀਆਂ ਦਾ ਮੁੱਦਾ ਕਾਫ਼ੀ ਗਰਮਾਇਆ ਹੋਇਆ ਹੈ। ਇੱਥੇ ਪ੍ਰਵਾਸੀਆਂ ਵੱਲੋਂ ਅਪਰਾਧ ਦੇ ਕਈ ਕੇਸ ਵੀ ਸਾਹਮਣੇ ਆਏ ਹਨ। ਰਾਸ਼ਟਰਪਤੀ ਟਰੰਪ ਵੱਲੋਂ ਆਮ ਤੌਰ ਉੱਤੇ ਉਨ੍ਹਾਂ ਦਾ ਵਿਰੋਧ ਕੀਤਾ ਜਾਂਦਾ ਹੈ।