ਮਾਸਕੋ, 19 ਜੂਨ (ਪੋਸਟ ਬਿਊਰੋ)- ਅਮਰੀਕਾ ਅਤੇ ਰੂਸ ਦੇ ਤਣਾਅ ਭਰੇ ਸੰਬੰਧਾਂ ਬਾਰੇ ਇੱਕ ਅਜਿਹੀ ਖਬਰ ਆਈ ਹੈ, ਜੋ ਸਾਈਬਰ ਵਾਰ ਦਾ ਕਾਰਨ ਬਣ ਸਕਦੀ ਹੈ। ਖਬਰ ਹੈ ਕਿ ਰੂਸ ਦੇ ਇਲੈਕਟਿ੍ਰਕ ਪਾਵਰ ਗਰਿੱਡ ਨੂੰ ਅਮਰੀਕਾ ਹੈਕ ਕਰ ਸਕਦਾ ਹੈ। ਇਸ ਨਾਲ ਰੂਸ ਦੀ ਬੱਤੀ ਕਦੇ ਵੀ ਗੁਲ ਕੀਤੀ ਜਾ ਸਕਦੀ ਹੈ। ਇਸ ਖਬਰ 'ਤੇ ਰੂਸ ਦੇ ਰਾਸ਼ਟਰਪਤੀ ਭਵਨ ਕ੍ਰੈਮਲਿਨ ਨੇ ਸਾਵਧਾਨ ਕੀਤਾ ਕਿ ਅਮਰੀਕਾ ਦੇ ਨਾਲ ਸਾਈਬਰ ਵਾਰ ਡੂੰਘਾ ਹੋ ਸਕਦਾ ਹੈ। ਨਾਲ ਹੀ ਭਰੋਸਾ ਜਤਾਇਆ ਕਿ ਸਾਡਾ ਸਿਸਟਮ ਇਸ ਤਰ੍ਹਾਂ ਦੇ ਇਲੈਕਟ੍ਰੋਨਿਕ ਹਮਲਿਆਂ ਨੂੰ ਰੋਕਣ ਦੇ ਸਮਰੱਥ ਹੈ।
ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੇ ਬੁਲਾਰੇ ਦਮਿੱਤਰੀ ਏਸ ਪੇਸਕੋਵ ਨੇ ਚਿੰਤਾ ਪ੍ਰਗਟਾਈ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਇਸ ਕੋਸ਼ਿਸ਼ ਦੇ ਬਾਰੇ ਜਾਣਕਾਰੀ ਹੀਂ ਹੈ। ਨਿਊ ਯਾਰਕ ਟਾਈਮਜ਼ ਵਿੱਚ ਛਪੀ ਖਬਰ ਦੇ ਮੁਤਾਬਕ ਰੂਸ ਦੇ ਐਨਰਜੀ ਸਿਸਟਮ ਤੇ ਦੂਸਰੇ ਟੀਚਿਆਂ ਵਿੱਚ ਅਮਰੀਕਾ ਨੇ ਸਾਈਬਰ ਟੂਲਸ ਲਾ ਦਿੱਤੇ ਹਨ। ਅਮਰੀਕਾ ਦੇ ਕਈ ਮੌਜੂਦਾ ਤੇ ਸਾਬਕਾ ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਵਾਂ ਦੇਸ਼ਾਂ ਵਿੱਚ ਵੱਡੇ ਪੱਧਰ 'ਤੇ ਸੰਘਰਸ਼ ਛਿੜਨ ਦੀ ਸੂਰਤ ਵਿੱਚ ਇਸ ਪ੍ਰੋਗਰਾਮ ਦੇ ਨਾਲ ਰੂਸ ਦੇ ਪਾਵਰ ਗਰਿੱਡ 'ਤੇ ਹਮਲਾ ਕੀਤਾ ਜਾ ਸਕਦਾ ਹੈ। ਇਹ ਹਾਲੇ ਸਪੱਸ਼ਟ ਨਹੀਂ ਹੈ ਕਿ ਰੂਸੀ ਪਾਵਰ ਗਰਿੱਡ ਵਿੱਚ ਕਿੰਨੀ ਡੂੰਘਾਈ ਦਾ ਸਾਫਟਵੇਅਰ ਲਾਇਆ ਗਿਆ ਹੈ। ਪੇਸਕੋਵ ਨੇ ਕਿਹਾ, ਇਸ ਜਾਣਕਾਰੀ ਦਾ ਮਤਲਬ ਇਹ ਹੈ ਕਿ ਰੂਸ ਦੇ ਖਿਲਾਫ ਸਾਈਬਰ ਹਮਲੇ ਦੀ ਕਾਲਪਨਿਕ ਸੰਭਾਵਨਾ ਹੈ।
ਓਧਰ ਰੂਸ ਦੇ ਊਰਜਾ ਮੰਤਰਾਲੇ ਨੇ ਇੱਕ ਬਿਆਨ ਵਿੱਚ ਕਿਹਾ, ਸਾਡੇ ਸਿਸਟਮ ਦੇ ਖਿਲਾਫ ਕਿਸੇ ਹਮਲੇ ਦੀ ਕੋਈ ਸੂਚਨਾ ਨਹੀਂ ਮਿਲੀ। ਰੂਸੀ ਐਨਰਜੀ ਪਾਵਰ ਗਰਿੱਡ ਦੀ ਸੁਰੱਖਿਆ ਬੜੀ ਉਚੀ ਹੈ। ਇਹੋ ਜਿਹੇ ਖਤਰਿਆਂ ਨਾਲ ਨਜਿੱਠਣ ਦੇ ਰੂਸੀ ਤਕਨੀਕ ਅਤੇ ਮਸ਼ੀਨਰੀ ਨੂੰ ਉਨਤ ਕਰਨ 'ਤੇ ਕੰਮ ਕੀਤਾ ਜਾ ਰਿਹਾ ਹੈ।