ਟੋਰਾਂਟੋ, 19 ਜੂਨ (ਪੋਸਟ ਬਿਊਰੋ) : ਓਨਟਾਰੀਓ ਵਿੱਚ ਡਰਾਈਵਰ ਤੇ ਵਹੀਕਲ ਫੀਸ ਉੱਤੇ ਰੋਕ ਲਾਉਣ ਤੋਂ ਇੱਕ ਸਾਲ ਤੋਂ ਵੀ ਘੱਟ ਸਮੇਂ ਵਿੱਚ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਇਸ ਵਿੱਚ ਮੁੜ ਵਾਧਾ ਕਰਨ ਉੱਤੇ ਵਿਚਾਰ ਕਰ ਰਹੀ ਹੈ। ਇਸ ਉੱਤੇ ਸਰਕਾਰ ਨੂੰ ਨਕਾਰਾਤਮਕ ਟਿੱਪਣੀਆਂ ਬਰਦਾਸ਼ਤ ਕਰਨ ਲਈ ਵੀ ਤਿਆਰ ਰਹਿਣਾ ਚਾਹੀਦਾ ਹੈ।
ਜਨਤਾ ਦੀਆਂ ਟਿੱਪਣੀਆਂ ਲਈ ਰੈਗੂਲੇਟਰੀ ਰਜਿਸਟਰੀ ਕੋਲ ਪੋਸਟ ਕੀਤੇ ਗਏ ਪ੍ਰਸਤਾਵ ਵਿੱਚ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਵੱਖ ਵੱਖ ਡਰਾਈਵਰਾਂ, ਵਹੀਕਲਜ਼ ਤੇ ਕੈਰੀਅਰ ਪ੍ਰੋਡਕਟਸ ਤੇ ਸੇਵਾਵਾਂ ਉੱਤੇ ਦੋ ਫੀ ਸਦੀ ਸਾਲਾਨਾ ਫੀਸ ਲਾਉਣ ਉੱਤੇ ਵਿਚਾਰ ਕਰ ਰਹੀ ਹੈ। ਇਸ ਪੋਸਟ ਵਿੱਚ ਇਹ ਵੀ ਆਖਿਆ ਗਿਆ ਹੈ ਕਿ ਇਸ ਤਰ੍ਹਾਂ ਦੀ ਦਰਮਿਆਨੀ ਫੀਸ ਨਾਲ ਸਰਕਾਰ ਸੇਵਾਵਾਂ ਮੁਹੱਈਆ ਕਰਵਾਉਣੀਆਂ ਜਾਰੀ ਰੱਖੇਗੀ ਤੇ ਇਸ ਨਾਲ ਸਾਰੇ ਓਨਟਾਰੀਓ ਵਾਸੀਆਂ ਲਈ ਟੈਕਸਾਂ ਵਿੱਚ ਵਾਧੇ ਤੋਂ ਵੀ ਬਚਾਅ ਹੋ ਜਾਵੇਗਾ।
ਇਹ ਵੀ ਆਖਿਆ ਗਿਆ ਕਿ ਦੋ ਫੀ ਸਦੀ ਨਿਯਮਿਤ ਵਾਧੇ ਨਾਲ ਟਰਾਂਸਪੋਰਟੇਸ਼ਨ ਮੰਤਰਾਲੇ ਵੱਲੋਂ ਵਿੱਤੀ ਸੰਤੁਲਨ ਹਾਸਲ ਕਰਨ ਲਈ ਸੰਤੁਲਿਤ ਪਹੁੰਚ ਅਪਣਾਈ ਜਾ ਰਹੀ ਹੈ। ਇਹ ਪੋਸਟਿੰਗ ਪੰਜ ਦਿਨਾਂ ਲਈ ਰੱਖੇ ਜਾਣ ਤੋਂ ਬਾਅਦ ਸੋਮਵਾਰ ਨੂੰ ਹਟਾ ਲਈ ਗਈ। ਮੰਤਰਾਲੇ ਨੇ ਦੱਸਿਆ ਕਿ ਇਸ ਲਈ ਸਿਰਫ ਦੋ ਟਿੱਪਣੀਆਂ ਹੀ ਹਾਸਲ ਹੋਈਆਂ। ਇਸ ਪ੍ਰਸਤਾਵ ਤਹਿਤ ਫੀਸ ਵਿੱਚ ਇਹ ਵਾਧਾ ਪਹਿਲੀ ਜੁਲਾਈ ਤੋਂ ਕੀਤਾ ਜਾਵੇਗਾ ਤੇ ਇਹ ਪੰਜ ਸਾਲਾਂ ਲਈ ਜਾਰੀ ਰਹੇਗਾ।
ਪ੍ਰਸਤਾਵ ਵਿੱਚ ਇਹ ਵੀ ਆਖਿਆ ਗਿਆ ਕਿ ਇਸ ਬਾਰੇ ਡਰਾਈਵਰਾਂ, ਗੱਡੀਆ ਦੇ ਮਾਲਕਾਂ ਤੇ ਕਮਰਸ਼ੀਅਲ ਕੈਰੀਅਰਜ਼ ਵੱਲੋਂ ਨਕਾਰਾਤਮਕ ਤੋਂ ਨਿਊਟਰਲ ਪ੍ਰਤੀਕਿਰਿਆਵਾਂ ਮਿਲਣ ਦੀ ਸੰਭਾਵਨਾ ਹੈ। ਇਸ ਉੱਤੇ ਟਰਾਂਸਪੋਰਟੇਸ਼ਨ ਮੰਤਰੀ ਜੈੱਫ ਯੂਰੇਕ ਦੇ ਬੁਲਾਰੇ ਨੇ ਆਖਿਆ ਕਿ ਇਹ ਪ੍ਰਸਤਾਵਿਤ ਵਾਧਾ ਅਸਲ ਵਿੱਚ ਫੀਡਬੈਕ ਹਾਸਲ ਕਰਨ ਲਈ ਪੋਸਟ ਕੀਤਾ ਗਿਆ ਸੀ। ਉਨ੍ਹਾਂ ਇਹ ਗੱਲ ਜ਼ੋਰ ਦੇ ਕੇ ਆਖੀ ਕਿ ਇਸ ਤਰ੍ਹਾਂ ਦਾ ਕੋਈ ਵੀ ਫੈਸਲਾ ਹਾਲ ਦੀ ਘੜੀ ਨਹੀਂ ਲਿਆ ਗਿਆ ਹੈ।