ਜਲੰਧਰ, 18 ਜੂਨ (ਪੋਸਟ ਬਿਊਰੋ)- ਇਸ ਜਿ਼ਲੇ ਦੀ ਦਿਹਾਤੀ ਪੁਲਸ ਨੇ ਨਕੋਦਰ ਵਿੱਚ ਛੇ ਦਿਨ ਪਹਿਲਾਂ ਖੁਸ਼ੀ ਸਕੈਨ ਸੈਂਟਰ ਦੇ ਕਾਰਿੰਦੇ ਤੋਂ ਢਾਈ ਲੱਖ ਰੁਪਏ ਦੀ ਲੁੱਟ ਅਤੇ ਐਤਵਾਰ ਹੋਈ ਸੱਤਰ ਹਜ਼ਾਰ ਦੀ ਲੁੱਟ ਦੇ ਮਾਮਲੇ ਨੂੰ ਸੁਲਝਾਉਂਦੇ ਹੋਏ ਅੱਠ ਲੁਟੇਰਿਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਨ੍ਹਾਂ ਵਿੱਚੋਂ ਇੱਕ ਦੋਸ਼ੀ ਸਕੈਨ ਸੈਂਟਰ ਵਿੱਚ ਹੀ ਕੰਮ ਕਰਦਾ ਸੀ, ਜਿਸ ਨੇ ਲੁੱਟ ਦਾ ਪਲਾਨ ਬਣਾਇਆ ਸੀ। ਦੋਸ਼ੀਆਂ ਦੀ ਪਛਾਣ ਨਕੋਦਰ ਦੇ ਮੁਹੱਲਾ ਟੰਡਨਾ ਵਾਸੀ ਸ਼ਿਵਮ (21), ਬਲ ਹੁਕਮੀ ਦੇ ਰਵਿੰਦਰ ਕੁਮਾਰ ਉਰਫ ਰਵੀ (24), ਪਿੰਡ ਮੀਰਪੁਰ ਦੇ ਜਗਜੀਵਨ ਕੁਮਾਰ ਉਰਫ ਜੀਵਨ (28), ਮੁਹੱਲਾ ਕ੍ਰਿਸ਼ਨ ਨਗਰ ਨਕੋਦਰ ਦੇ ਹਰੀਸ਼ ਕੁਮਾਰ ਉਰਫ ਰਿੰਕੂ (23), ਮਹਿਤਪੁਰ ਦੇ ਪਿੰਡ ਮੰਡਿਆਲਾ ਦੇ ਜਤਿੰਦਰ ਉਰਫ ਸੰਜੂ (24), ਅਰਜੁਨ ਨਗਰ ਨਕੋਦਰ ਦੇ ਹਰਦੇਵ ਕੁਮਾਰ ਉਰਫ ਹੈਪੀ (23) ਤੇ ਪਿੰਡ ਤਲਵੰਡੀ ਦੇ ਅਮਰਜੀਤ ਸਿੰਘ ਉਰਫ ਅਮਿਤ (21) ਦੇ ਰੂਪ ਵਿੱਚ ਹੋਈ ਹੈ। ਪੁਲਸ ਨੇ ਦੋਸ਼ੀਆਂ ਤੋਂ ਤਿੰਨ ਮੋਟਰ ਸਾਈਕਲ, ਦੋ ਦਾਤਰ, ਦੋ ਕਿਰਪਾਨਾਂ, ਦੋ ਲੋਹੇ ਦੀਆਂ ਰਾਡਾਂ, ਇੱਕ ਲੋਹੇ ਦਾ ਪਾਈਪ, ਇੱਕ ਕਮਾਨੀਦਾਰ ਚਾਕੂ ਅਤੇ 1.70 ਲੱਖ ਰੁਪਏ ਬਰਾਮਦ ਕੀਤੇ ਹਨ।
ਕੱਲ੍ਹ ਦਿਹਾਤੀ ਜਿ਼ਲੇ ਦੇ ਐੱਸ ਐੱਸ ਪੀ ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ 10 ਜੂਨ ਸ਼ਾਮ ਨੂੰ ਨਕੋਦਰ ਵਿੱਚ ਖੁਸ਼ੀ ਸਕੈਨ ਸੈਂਟਰ ਦੇ ਦੋ ਕਾਰਿੰਦੇ ਅਭਿ ਸ਼ਰਮਾ ਤੇ ਸ਼ਿਵਮ ਬਾਈਕ 'ਤੇ ਡੇਲੀ ਸੇਲ ਦੇ ਢਾਈ ਲੱਖ ਰੁਪਏ ਜਮ੍ਹਾ ਕਰਾਉਣ ਬੈਂਕ ਜਾ ਰਹੇ ਸਨ। ਇਸ ਦੌਰਾਨ ਗੁਰੂ ਤੇਗ ਬਹਾਦਰ ਨਗਰ ਦੇ ਨੇੜੇ ਬਾਈਕ ਸਵਾਰ ਦੋ ਨਕਾਬਪੋਸ਼ ਨੌਜਵਾਨਾਂ ਨੇ ਅਭਿ 'ਤੇ ਦਾਤਰ ਨਾਲ ਹਮਲਾ ਕਰ ਕੇ ਜ਼ਖਮੀ ਕਰ ਦਿੱਤਾ ਅਤੇ ਉਸ ਕੋਲੋਂ ਢਾਈ ਲੱਖ ਰੁਪਏ ਖੋਹ ਲਏ। ਇਸ ਪਿੱਛੋਂ ਐਤਵਾਰ ਨੂੰ ਇਲਾਕੇ ਵਿੱਚ ਇੱਕ ਵਿਅਕਤੀ ਤੋਂ ਸੱਤਰ ਹਜ਼ਾਰ ਰੁਪਏ ਦੀ ਲੁੱਟ ਹੋ ਗਈ। ਸੀ ਸੀ ਟੀ ਵੀ ਫੁਟੇਜ ਦੇਖਣ 'ਤੇ ਸਾਹਮਣੇ ਆਇਆ ਕਿ ਦੋਵੇਂ ਵਾਰਦਾਤਾਂ ਇੱਕੋ ਗਿਰੋਹ ਨੇ ਕੀਤੀਆਂ ਹਨ। ਸੀ ਸੀ ਟੀ ਵੀ ਫੁਟੇਜ ਵਿੱਚ ਕੈਦ ਲੁਟੇਰਿਆਂ ਦੇ ਹੁਲੀਏ ਤੋਂ ਉਨ੍ਹਾਂ ਬਾਰੇ ਪੁਲਸ ਨੇ ਪੁੱਛਗਿੱਛ ਕੀਤੀ ਤਾਂ ਸ਼ਨੀਵਾਰ ਦੇਰ ਸ਼ਾਮ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਲੁਟੇਰੇ ਗੁਰੂ ਨਾਨਕ ਨੈਸ਼ਨਲ ਕਾਲਜ ਰੋਡ, ਨਕੋਦਰ ਦੇ ਨੇੜੇ ਗਰਾਊਂਡ ਵਿੱਚ ਮੌਜੂਦ ਹਨ। ਪੁਲਸ ਨੇ ਤੁਰੰਤ ਮੌਕੇ 'ਤੇ ਰੇਡ ਕਰ ਕੇ ਉਥੋਂ ਅੱਠ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ। ਐੱਸ ਐੱਸ ਪੀ ਨੇ ਦੱਸਿਆ ਕਿ ਦੋਸ਼ੀਆਂ ਨੇ ਛੇ ਦਿਨਾਂ ਵਿੱਚ ਕੁੱਲ 3.20 ਲੱਖ ਦੀ ਨਕਦੀ ਲੁੱਟੀ ਸੀ, ਜਿਸ ਵਿੱਚੋਂ 1.70 ਲੱਖ ਪੁਲਸ ਨੇ ਬਰਾਮਦ ਕਰ ਲਏ ਹਨ। ਬਾਕੀ ਨਕਦੀ ਦੇ ਬਾਰੇ ਪੁੱਛਗਿੱਛ ਜਾਰੀ ਹੈ। ਐਸ ਐਸ ਪੀ ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ ਉਹ ਨਕੋਦਰ ਦੇ ਬੈਂਕ ਨੂੰ ਲੁੱਟਣ ਦੀ ਯੋਜਨਾ ਬਣਾ ਰਹੇ ਸਨ।
ਐੱਸ ਐੱਸ ਪੀ ਨੇ ਦੱਸਿਆ ਕਿ ਲੁੱਟ ਦਾ ਮਾਸਟਰ ਪਲਾਨ ਸਕੈਨ ਸੈਂਟਰ ਦੇ ਕਾਰਿੰਦੇ ਦੋਸ਼ੀ ਸ਼ਿਵਮ ਨੇ ਬਣਾਇਆ ਸੀ। ਸ਼ਿਵਮ ਨੇ ਆਪਣੇ ਸਾਥੀਆਂ ਨੂੰ ਕਿਹਾ ਸੀ ਕਿ ਹਰ ਹਫਤੇ ਉਹ ਸਾਥੀ ਕਰਮਚਾਰੀ ਨਾਲ ਸੈਂਟਰ ਤੋਂ ਲੱਖਾਂ ਰੁਪਏ ਬੈਂਕ ਵਿੱਚ ਜਮ੍ਹਾ ਕਰਾਉਣ ਜਾਂਦਾ ਹੈ। ਪਲਾਨ ਬਣਾ ਕੇ ਇਹ ਨਕਦੀ ਲੁੱਟ ਸਕਦੇ ਹਨ। 10 ਜੂਨ ਨੂੰ ਸ਼ਿਵਮ ਸਾਥੀ ਕਰਮਚਾਰੀ ਅਭਿ ਦੇ ਨਾਲ ਬੈਂਕ ਵਿੱਚ ਪੈਸੇ ਜਮ੍ਹਾ ਕਰਾਉਣ ਜਾ ਰਿਹਾ ਸੀ। ਇਸ ਦੌਰਾਨ ਨਕਾਬਪੋਸ਼ ਨੌਜਵਾਨਾਂ ਵਿੱਚੋਂ ਇੱਕ ਨੇ ਅਭਿ ਨੂੰ ਦਾਤਰ ਮਾਰ ਕੇ ਜ਼ਖਮੀ ਕਰ ਦਿੱਤਾ। ਇਸ ਵਾਰਦਾਤ ਵਿੱਚ ਸ਼ਿਵਮ ਨੂੰ ਕੋਈ ਸੱਟ ਨਹੀਂ ਲੱਗੀ।