ਜਲੰਧਰ, 18 ਜੂਨ (ਪੋਸਟ ਬਿਊਰੋ)- 250 ਕਰੋੜ ਦੇ ਸ਼ੁਰੂਆਤੀ ਰੇਟ 'ਤੇ ਨੀਲਾਮੀ ਵਿੱਚ ਰੱਖੇ ਗਏ ਗੁਰੂ ਗੋਬਿੰਦ ਸਿੰਘ ਸਟੇਡੀਅਮ ਦੀ ਨੀਲਾਮੀ ਵਿੱਚ ਹਿੱਸਾ ਲੈਣ ਲਈ ਇੱਕ ਵੀ ਅਰਜ਼ੀ ਨਹੀਂ ਮਿਲੀ, ਜਿਸ ਕਾਰਨ ਪੀ ਐੱਨ ਬੀ ਅਧਿਕਾਰੀਆਂ ਦੇ ਹੱਥ ਨਿਰਾਸ਼ਾ ਲੱਗੀ ਹੈ। ਕਰਜ਼ਾ ਮੋੜਨ ਲਈ ਪੀ ਐੱਨ ਬੀ ਵੱਲੋਂ ਜ਼ਬਤ ਕੀਤੀਆਂ ਇੰਪਰੂਵਮੈਂਟ ਟਰੱਸਟ ਦੀਆਂ 480 ਕਰੋੜ ਦੀਆਂ ਜਾਇਦਾਦਾਂ ਦੀ ਨੀਲਾਮੀ ਕਰਵਾਉਣ ਲਈ 17 ਜੂਨ ਸ਼ਾਮ ਚਾਰ ਵਜੇ ਤੱਕ ਅਰਜ਼ੀ ਦਿੱਤੀ ਜਾ ਸਕਦੀ ਸੀ, ਪਰ ਸਟੇਡੀਅਮ ਸਣੇ ਕਿਸੇ ਪ੍ਰਾਪਰਟੀ ਲਈ ਕੋਈ ਅਰਜ਼ੀ ਨਹੀਂ ਮਿਲੀ। ਇਸ ਤੋਂ ਪਹਿਲਾਂ ਵੀ ਜਦੋਂ ਬੈਂਕ ਨੇ ਟਰੱਸਟ ਦੀ ਪ੍ਰਾਪਰਟੀ ਨੂੰ ਨੀਲਾਮ ਕਰਵਾਉਣੀ ਸੀ ਤਾਂ ਕੋਈ ਅਰਜ਼ੀ ਨਹੀਂ ਸੀ ਆਈ। ਇਸ ਵਾਰ ਨੀਲਾਮੀ ਦੇ ਵਧੀਆ ਰਿਸਪਾਂਸ ਦੀ ਆਸ ਵਿੱਚ ਬੈਂਕ ਨੇ ਟਰੱਸਟ ਦੀਆਂ ਜਾਇਦਾਦਾਂ ਦੇ ਰੇਟ ਘੱਟ ਕਰ ਦਿੱਤੇ। ਫਿਰ ਵੀ ਕੋਈ ਰਿਸਪਾਂਸ ਨਹੀਂ ਮਿਲਿਆ। ਬੈਂਕ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਫਿਰ ਤੋਂ ਰੇਟ ਘੱਟ ਕਰ ਕੇ ਨੀਲਾਮੀ ਕਰਵਾਈ ਜਾਵੇਗੀ।
ਨੀਲਾਮੀ ਵਿੱਚ ਹਿੱਸਾ ਲੈਣ ਲਈ 10 ਫੀਸਦੀ ਰਕਮ ਐਡਵਾਂਸ ਵਿੱਚ (ਅਰਨੈਸਟ ਮਨੀ ਡਿਪਾਜ਼ਟ) ਵਾਸਤੇ ਜਮ੍ਹਾ ਕਰਵਾਉਣੀ ਹੁੰਦੀ ਹੈ। ਇਸ ਸਟੇਡੀਅਮ ਦੀ ਸ਼ੁਰੂ ਦੀ ਕੀਮਤ 250 ਕਰੋੜ ਰੁਪਏ ਰੱਖੀ ਗਈ ਹੈ, ਇਸ ਲਈ 25 ਕਰੋੜ ਰੁਪਏ ਜਮ੍ਹਾ ਕਰਵਾ ਕੇ ਨੀਲਾਮੀ ਵਿੱਚ ਹਿੱਸਾ ਲਿਆ ਜਾ ਸਕਦਾ ਸੀ। ਐਡੀ ਰਕਮ ਐਡਵਾਂਸ ਵਿੱਚ ਜਮ੍ਹਾ ਕਰਵਾ ਕੇ ਕੋਈ ਰਿਸਕ ਨਹੀਂ ਲੈਣਾ ਚਾਹੰੁਦਾ। ਇਸ ਤੋਂ ਇਲਾਵਾ 230 ਕਰੋੜ ਦੀ ਦੂਜੀ ਪ੍ਰਾਪਰਟੀ ਨੀਲਾਮੀ ਵਿੱਚ ਰੱਖੀ ਗਈ ਸੀ ਜਿਸ ਵਿੱਚ ਸੂਰਿਆ ਇਨਕਲੇਵ ਐਕਸਟੈਂਸ਼ਨ ਸਕੀਮ, ਮਹਾਰਾਜਾ ਰਣਜੀਤ ਸਿੰਘ ਐਵੇਨਿਊ, ਗੁਰੂ ਗੋਬਿੰਦ ਸਿੰਘ ਐਵੇਨਿਊ, ਸੂਰਿਆ ਇਨਕਲੇਵ ਅਤੇ ਹੋਰ ਪ੍ਰਾਪਰੀਟ ਹੈ, ਪਰ ਇਸ ਲਈ ਵੀ ਕਿਸੇ ਨੇ ਕੋਈ ਰਿਸਪਾਂਸ ਨਹੀਂ ਦਿਖਾਇਆ।
ਜਲੰਧਰ ਇੰਪਰੂਵਮੈਂਟ ਟਰੱਸਟ ਦੇ ਧੁੰਦਲੇ ਅਕਸ ਕਾਰਨ ਬੈਂਕ ਨੂੰ ਨੀਲਾਮੀ ਦਾ ਰਿਸਪਾਂਸ ਨਹੀਂ ਮਿਲਿਆ। ਇਹੀ ਨਹੀਂ, ਇੰਪਰੂਵਮੈਂਟ ਟਰੱਸਟ ਵੱਲੋਂ ਪਿਛਲੇ ਸਮੇਂ ਦੌਰਾਨ ਕਰਵਾਈ ਨੀਲਾਮੀ ਵਿੱਚ ਵੀ ਕੋਈ ਪ੍ਰਾਪਰਟੀ ਨਹੀਂ ਵਿਕ ਸਕੀ। ਟਰੱਸਟ ਦੇ ਧੁੰਦਲੇ ਅਕਸ ਦਾ ਕਾਰਨ 94.97 ਏਕੜ ਜ਼ਮੀਨ ਜਿਸ ਨੇ ਟਰੱਸਟ ਦਾ ਬੇੜਾ ਡੋਬ ਦਿੱਤਾ। ਇਸ ਸਕੀਮ ਲਈ ਟਰੱਸਟ ਨੇ 175 ਕਰੋੜ ਦਾ ਕਰਜ਼ਾ ਲਿਆ, ਪਰ ਸੱਤ-ਅੱਠ ਸਾਲ ਬਾਅਦ ਵੀ ਇਸ ਦੇ 112 ਕਰੋੜ ਬਾਕੀ ਹਨ। ਟਰੱਸਟ ਇੱਕ ਪਾਸੇ ਕਰਜ਼ਾ ਮੋੜਨ ਦੇ ਅਸਮਰਥ ਹੈ, ਉਥੇ ਪਲਾਟ ਹੋਲਡਰਾਂ ਨੂੰ ਵੀ ਪੋਜੈਸ਼ਨ ਨਹੀਂ ਮਿਲ ਸਕੀ ਜਿਸ ਕਾਰਨ ਕਈ ਹੋਲਡਰ ਕੰਜ਼ਿਊਮਰ ਫੋਰਮ ਦੀ ਸ਼ਰਨ ਵਿੱਚ ਜਾ ਰਹੇ ਹਨ। ਲੋਕਾਂ ਦਾ ਗੁੱਸਾ ਟਰੱਸਟ ਪ੍ਰਤੀ ਵਧਦਾ ਜਾ ਰਿਹਾ ਹੈ।