ਲੁਧਿਆਣਾ, 18 ਜੂਨ (ਪੋਸਟ ਬਿਊਰੋ)- ਪੰਜਾਬ ਦੇ ਗੁਆਂਢੀ ਰਾਜ ਹਰਿਆਣੇ ਵਿੱਚ ਅਕਤੂਬਰ ਵਿੱਚ ਵਿਧਾਨ ਸਭਾ ਚੋਣਾਂ ਹੋਣ ਦੀ ਤਰੀਕ ਨੇੜੇ ਆਉਂਦੀ ਵੇਖ ਕੇ ਭਾਜਪਾ ਦੀ ਪੰਜਾਬ ਵਿਚਲੀ ਭਾਈਵਾਲ ਪਾਰਟੀ ਅਕਾਲੀ ਦਲ ਵੱਲੋਂ ਇਸ ਵਾਰ ਹਰਿਆਣੇ ਦੇ ਦੋ ਦਰਜਨ ਹਲਕਿਆਂ ਤੋਂ ਚੋਣ ਲੜਨ ਦੀਆਂ ਵਿਊਂਤਾਂ ਲੱਗ ਰਹੀਆਂ ਹਨ, ਪਰ ਭਾਰਤੀ ਜਨਤਾ ਪਾਰਟੀ ਦੇ ਪ੍ਰਧਾਨ ਅਮਿਤ ਸ਼ਾਹ ਇਨ੍ਹਾਂ ਵਿਉਂਤਾਂ ਨੂੰ ਸਫਲ ਨਹੀਂ ਹੋਣ ਦੇਣਗੇ।
ਇਸ ਸੰਬੰਧ ਵਿੱਚ ਪਤਾ ਲੱਗਾ ਹੈ ਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਹਰਿਆਣੇ ਵਿੱਚ ਆਪਣੇ ਪੱਧਰ ਉੱਤੇ ਸਰਵੇ ਕਰਵਾਇਆ ਹੈ, ਜਿਸ ਰਿਪੋਰਟ ਨੂੰ ਅੱਗੇ ਰੱਖ ਕੇ ਦੋ ਦਰਜਨ ਸੀਟਾਂ ਦੀ ਮੰਗ ਕਰ ਸਕਦੇ ਹਨ। ਦੂਜੇ ਪਾਸੇ ਭਾਜਪਾ ਨੂੰ ਇਸ ਗੱਲ ਦਾ ਪਤਾ ਹੈ ਕਿ ਅਕਾਲੀ ਦਲ ਹਰਿਆਣੇ ਵਿੱਚ ਦੋ ਜਾਂ ਤਿੰਨ ਹਲਕਿਆਂ ਤੋਂ ਚੋਣ ਲੜ ਕੇ ਜਿੱਤ ਦਾ ਯਤਨ ਕਰ ਸਕਦਾ ਹੈ। ਇਸ ਤੋਂ ਅੱਗੇ ਉਨ੍ਹਾਂ ਨੂੰ ਟਿਕਟਾਂ ਦੇਣਾ ਵੀ ਟਿਕਟਾਂ ਖਰਾਬ ਕਰਨਾ ਹੋਵੇਗਾ। ਜਾਣਕਾਰ ਸੂਤਰਾਂ ਦੇ ਮੁਤਾਬਕ ਇਸ ਵਾਰੀ ਸੁਖਬੀਰ ਸਿੰਘ ਬਾਦਲ ਹਰਿਆਣੇ ਵਿੱਚ ਆਪਣੀ ਸਿਆਸੀ ਦਾਲ ਰਿੰਨ੍ਹਣ ਦੀ ਵਿਉਂਤ ਬਣਾ ਰਹੇ ਹਨ, ਪਰ ਭਾਜਪਾ ਦੇ ਪ੍ਰਧਾਨ ਅਮਿਤ ਸ਼ਾਹ ਦੇ ਹੁੰਦਿਆਂ ਉਨ੍ਹਾਂ ਦੀ ਦਾਲ ਗਲਣੀ ਔਖੀ ਹੈ। ਦੱਸਿਆ ਜਾਂਦਾ ਹੈ ਕਿ ਕੇਵਲ ਦੋ ਜਾਂ ਤਿੰਨ ਸੀਟਾਂ ਉੱਤੇ ਸਬਰ ਕਰਨਾ ਪਵੇਗਾ, ਕਿਉਂਕਿ ਭਾਜਪਾ ਦੇ ਪ੍ਰਧਾਨ ਹਰਿਆਣੇ ਵਿੱਚ ਅਸਲੀ ਸ਼ਾਹ ਹੋਣਗੇ।
ਉਂਜ ਪੰਜਾਬ ਦੇ ਤਾਜ਼ੇ ਹਾਲਾਤ ਦੀ ਰਿਪੋਰਟ ਵੀ ਭਾਜਪਾ ਕੋਲ ਪੁੱਜ ਗਈ ਹੈ ਕਿ ਸਾਰੇ ਅਕਾਲੀਆਂ ਦਾ ਹਾਰ ਜਾਣਾ ਤੇ ਕੇਵਲ ਬਾਦਲ ਪਰਵਾਰ ਦਾ ਜਿੱਤਣਾ ਅਤੇ ਭਾਜਪਾ ਵੱਲੋਂ ਤਿੰਨ ਸੀਟਾਂ 'ਤੇ ਚੋਣ ਲੜਨਾ ਅਤੇ ਦੋ ਸੀਟਾਂ 'ਤੇ ਜਿੱਤਣਾ ਕਿਸੇ ਤੋਂ ਛੁਪਿਆ ਨਹੀਂ। ਇਸ ਲਈ ਭਾਜਪਾ ਅਕਾਲੀ ਦਲ ਨੂੰ ਟਿਕਾਣੇ ਰੱਖਣਾ ਚਾਹੁੰਦੀ ਹੈ।