ਫੈਸਲਾਬਾਦ, 18 ਜੂਨ (ਪੋਸਟ ਬਿਊਰੋ)- ਨਤਾਸ਼ਾ ਮਸੀਹ (19) ਨੇ ਪਾਕਿਸਤਾਨ ਵਿੱਚ ਜਦ ਆਪਣੀ ਮਾਂ ਨੂੰ ਕਾਹਲੀ ਵਿੱਚ ਫੋਨ ਕੀਤਾ ਤਾਂ ਉਹ ਉਸ ਨੂੰ ਦੱਸ ਨਾ ਸਕੀ ਕਿ ਉਸ ਨਾਲ ਕੀ ਵਾਪਰ ਰਿਹਾ ਹੈ। ਉਸ ਨੇ ਸਿਰਫ ਐਨਾ ਦੱਸਿਆ ਕਿ ਚੀਨ ਦੇ ਜਿਸ ਵਿਅਕਤੀ ਨੂੰ ਉਸ ਦੇ ਪਰਵਾਰ ਨੇ ਵਿਆਹ ਕਰਾਉਣ ਲਈ ਵੇਚ ਦਿੱਤਾ, ਉਹ ਉਸ 'ਤੇ ਤਸ਼ੱਦਦ ਕਰ ਰਿਹਾ ਹੈ। ਇਸ ਤੋਂ ਬਾਅਦ ਉਹ ਰੋਣ ਲੱਗ ਗਈ ਤੇ ਮਾਂ ਨੂੰ ਸਾਰੀ ਕਹਾਣੀ ਦੱਸੀ।
ਇਸ ਦੇ ਬਾਅਦ ਨਤਾਸ਼ਾ ਨੇ ਮਾਂ ਨੂੰ ਕਿਹਾ ਕਿ ਉਸ ਨੂੰ ਘਰ ਵਾਪਸ ਲੈ ਆਉਣ। ਉਸ ਨੇ ਦੱਸਿਆ ਕਿ ਪਤੀ ਨੇ ਕੁਝ ਹਫਤਿਆਂ ਤੋਂ ਉਸ ਨੂੰ ਚੀਨ ਦੇ ਕਿਸੇ ਦੂਰ ਦਰਾਜ ਦੇ ਇਲਾਕੇ ਵਿੱਚ ਹੋਟਲ 'ਚ ਰੱਖਿਆ ਹੋਇਆ ਹੈ। ਉਹ ਉਸ ਨੂੰ ਹੋਰਨਾਂ ਵਿਅਕਤੀਆਂ ਨਾਲ ਸਰੀਰਕ ਸਬੰਧ ਬਣਾਉਣ ਲਈ ਮਜ਼ਬੂਰ ਕਰਦਾ ਹੈ। ਫੈਸਲਾਬਾਦ ਦੇ ਇਕ ਝੁੱਗੀ ਝੌਂਪੜੀ ਵਾਲੇ ਇਲਾਕੇ ਵਿੱਚ ਚਰਚ ਨਾਲ ਜੁੜੀ ਉਸ ਦੀ ਮਾਂ ਕੁਝ ਜਾਣਕਾਰਾਂ ਕੋਲੋਂ ਮਦਦ ਦੀ ਆਸ ਰੱਖ ਰਹੀ ਹੈ, ਜੋ ਉਨ੍ਹਾਂ ਦੇ ਇਲਾਕੇ ਤੋਂ ਸਿਰਫ 1100 ਮੀਲ ਦੂਰ ਘਿਰੀ ਨਤਾਸ਼ਾ ਦੇ ਬਚਾਅ ਦੀ ਕੋਈ ਯੋਜਨਾਬੰਦੀ ਕਰਨ ਲੱਗੇ ਹੋਏ ਹਨ। ਨਤਾਸ਼ਾ ਉਨ੍ਹਾਂ ਸੈਂਕੜੇ ਪਾਕਿਸਤਾਨੀ ਕੁੜੀਆਂ ਵਿੱਚੋਂ ਇਕ ਹੈ, ਜਿਨ੍ਹਾਂ ਦਾ ਚੀਨੀ ਪੁਰਸ਼ਾਂ ਨਾਲ ਪੈਸੇ ਬਦਲੇ ਵਿਆਹ ਕਰ ਦਿੱਤਾ ਜਾਂਦਾ ਹੈ। ਜ਼ਿਆਦਾਤਰ ਕੁੜੀਆਂ ਈਸਾਈ ਹਨ ਜੋ ਕਿ ਮੁਲਕ ਦਾ ਬੇਹੱਦ ਗਰੀਬ ਭਾਈਚਾਰਾ ਹੈ। ਐਸੋਸੀਏਟਡ ਪ੍ਰੈਸ ਦੀ ਰਿਪੋਰਟ ਮੁਤਾਬਕ ਇਸ ਧੰਦੇ ਵਿੱਚ ਈਸਾਈ ਪਾਦਰੀ, ਪਾਕਿ ਤੇ ਚੀਨੀ ਦਲਾਲਾਂ ਦੀ ਸ਼ਮੂਲੀਅਤ ਹੈ।