(ਹਰਜੀਤ ਬੇਦੀ): ਪਿਛਲੇ ਹਫਤੇ ਨਾਰਥ ਅਮੈਰਿਕਨ ਤਰਕਸ਼ੀਲ ਸੁਸਾਇਟੀ ਆਫ ਓਨਟਾਰੀਓ ਵੱਲੋਂ ਪਰਿਵਾਰਕ ਪਿਕਨਿਕ ਦਾ ਆਯੋਜਨ ਕੌਫੀ ਪਾਰਕ ਮਾਲਟਨ ਵਿੱਚ ਬਹੁਤ ਹੀ ਸੁਚੱਜੇ ਢੰਗ ਨਾਲ ਕੀਤਾ ਗਿਆ। ਇਸ ਪਿਕਨਿਕ ਦਾ ਛੋਟੇ ਛੋਟੇ ਬੱਚਿਆਂ ਤੋਂ ਲੈ ਕੇ ਵਡੇਰੀ ਉਮਰ ਦੇ ਲੋਕਾਂ ਨੇ ਵੱਡੀ ਗਿਣਤੀ ਵਿੱਚ ਪਹੁੰਚ ਕੇ ਆਨੰਦ ਮਾਣਿਆ। ਠੀਕ 11 ਵਜੇ ਲੋਕ ਪਹੁੰਚਣੇ ਸ਼ੁਰੂ ਹੋ ਗਏ ਤੇ ਥੋੜੇ ਸਮੇਂ ਵਿੱਚ ਪੂਰੀ ਰੌਣਕ ਲੱਗ ਗਈ। ਪਹੁੰਚਣ ਵਾਲੇ ਮਹਿਮਾਨਾਂ ਦਾ ਜਾਣ ਸਾਰ ਚਾਹ ਪਾਣੀ ਅਤੇ ਸਨੇਕਸ ਨਾਲ ਸੁਆਗਤ ਕੀਤਾ ਜਾਂਦਾ ਰਿਹਾ। ਪਰਬੰਧਕਾਂ ਦੀ ਟੀਮ ਹਰ ਮਹਿਮਾਨ ਵੱਲ ਪੂਰੀ ਤਵੱਜੋ ਦੇ ਰਹੀ ਸੀ। ਕੁਝ ਦੇਰ ਬਾਦ ਬਾਰ ਬੀ ਕਿਊ ਤੇ ਖਾਣ ਪੀਣ ਦੀਆਂ ਹੋਰ ਵਸਤੂਆਂ ਦਾ ਦੌਰ ਸ਼ੁਰੂ ਹੋ ਗਿਆ। ਤਰਕਸ਼ੀਲ ਸੁਸਾਇਟੀ ਦੇ ਵਾਲੰਟੀਅਰਾਂ ਨੇ ਬਹੁਤ ਹੀ ਸ਼ੌਕ ਅਤੇ ਉਤਸ਼ਾਹ ਨਾਲ ਬਾਰ-ਬੀ -ਕਿਉ ਕਰਨ ਦੀ ਡਿਉਟੀ ਨਿਭਾਈ।
ਇਸ ਪ੍ਰੋਗਰਾਮ ਵਿੱਚ ਤਰਕਸ਼ੀਲ ਪਰਿਵਾਰਕ ਮੈਂਬਰਾਂ ਤੋਂ ਬਿਨਾਂ ਹੋਰ ਸਮਾਜ ਸੇਵੀ ਜਥੇਬੰਦੀਆਂ , ਲੇਖਕ ਸਭਾਵਾਂ ਅਤੇ ਸੀਨੀਅਰਜ਼ ਐਸੋਸੀਏਸ਼ਨ ਦੇ ਨੁਮਾਇੰਦਿਆਂ ਨੇ ਸਿ਼ਰਕਤ ਕੀਤੀ। ਪਰਮਜੀਤ ਬੜਿੰਗ ਦੀ ਅਗਵਾਈ ਵਿੱਚ ਸੀਨੀਅਰਜ਼ ਐਸੋਸੀਏਸ਼ਨ ਅਤੇ ਰੈੱਡ ਵਿੱਲੋ ਕਲੱਬ ਦਾ ਵਿਸ਼ੇਸ਼ ਸਹਿਯੋਗ ਰਿਹਾ। ਸਿਟੀ ਕੌਂਸਲਰ ਹਰਕੀਰਤ ਸਿੰਘ ਨੇ ਉਚੇਚੇ ਤੌਰ ਤੇ ਪਿਕਨਿਕ ਵਿੱਚ ਹਾਜ਼ਰੀ ਲੁਆਈ।
ਖਾਣ ਪੀਣ ਦੇ ਨਾਲ ਗੱਲਾਂ ਬਾਤਾਂ ਦਾ ਦੌਰ ਅਤੇ ਆਪਸੀ ਵਿਚਾਰ ਵਟਾਂਦਰਾ ਚਲਦਾ ਰਿਹਾ ਜੋ ਪਰਿਵਾਰਾਂ ਦੀ ਜਾਣ-ਪਹਿਚਾਣ ਅਤੇ ਮੇਲ ਜੋਲ ਦਾ ਵਧੀਆ ਸਬੱਬ ਬਣਿਆ। ਕਾਫੀ ਗਿਣਤੀ ਵਿੱਚ ਬਚਿੱਆਂ ਨੇ ਪਿਕਨਿਕ ਵਿੱਚ ਭਾਗ ਲਿਆ ਤੇ ਉਹਨਾਂ ਦੇ ਮਨੋਰੰਜਨ ਲਈ ਮਨੋਰੰਜਕ ਖੇਡਾਂ ਕਰਵਾਈਆਂ ਗਈਆਂ ਜਿਸਦੀ ਜਿੰਮੇਵਾਰੀ ਸਕਾਰਬਰੋਅ ਦੀ ਤਰਕਸੀਲ ਵਾਲੰਟੀਅਰ ਟੀਮ ਭਰਪੂਰ ਸਿੰਘ ਅਤੇ ਸਾਥੀਆਂ ਨੇ ਨਿਭਾਈ। ਗੇਮਾਂ ਬਾਦ ਬੱਚਿਆਂ ਨੂੰ ਇਨਾਮ ਵੰਡੇ ਗਏ। ਬਚਿਆਂ ਨੂੰ ਇਨਾਮ ਦੇਣ ਦੀ ਕਾਰਵਾਈ ਸਪਾਂਸਰਜ਼ ਸੁਰਿੰਦਰ ਘੰੁਮਣ, ਜਗਦੀਸ਼ ਜਾਂਗੜਾ ਅਤੇ ਕੁਲਦੀਪ ਚਾਹਲ ਆਦਿ ਨੇ ਕੀਤੀ। ਸ਼ਾਮ ਦੇਰ ਤੱਕ ਇਸ ਪਰਿਵਾਰਕ ਪਿਕਨਿਕ ਦਾ ਪਰੋਗਰਾਮ ਚਲਦਾ ਰਿਹਾ ਅਤੇ ਖਾਣ-ਪਣਿ ਦੀਆਂ ਅਨੇਕ ਵੰਨਗੀਆਂ ਦੇ ਨਾਲ ਹੀ ਹਾਜਰੀਨ ਨੂੰ ਤਰਕਸ਼ੀਲ ਸੁਸਾਇਟੀ ਦੇ ਬਲਦੇਵ ਰਹਿਪਾ, ਨਿਰਮਲ ਸੰਧੂ, ਹਰਬੰਸ ਮੱਲ੍ਹੀ, ਬਲਰਾਜ ਛੋਕਰ, ਸੁਰਜੀਤ ਸਹੋਤਾ ਤੇ ਹੋਰ ਵਾਲੰਟੀਅਰਾਂ ਦਾ ਪਿਆਰ ਸਤਿਕਾਰ ਮਿਲਦਾ ਰਿਹਾ।
ਪਿਕਨਿਕ ਦੀ ਸਮਾਪਤੀ ਤੋਂ ਬਾਦ ਪਰਿਵਾਰ ਮਿੱਤਰਾਂ ਦੋਸਤਾਂ ਨਾਲ ਬਿਤਾਏ ਪਲਾਂ ਦੀਆਂ ਯਾਦਾਂ ਮਨਾਂ ਵਿੱਚ ਸਮੇਟਦੇ ਹੋਏ ਖੁਸ਼ੀ ਖੁਸ਼ੀ ਘਰਾਂ ਨੂੰ ਪਰਤ ਗਏ। ਤਰਕਸ਼ੀਲ ਸੁਸਾਇਟੀ ਦੇ ਪਰੋਗਰਾਮਾਂ ਸਬੰਧੀ ਜਾਂ ਸੁਸਾਇਟੀ ਨਾਲ ਸਬੰਧਤ ਕਿਸੇ ਵੀ ਤਰ੍ਹਾਂ ਦੀ ਜਾਣਕਾਰੀ ਲਈ ਬਲਦੇਵ ਰਹਿਪਾ 416-881-7202 ਜਾਂ ਨਿਰਮਲ ਸੰਧੂ 416-835-3450 ਨਾਲ ਸੰਪਰਕ ਕੀਤਾ ਜਾ ਸਕਦਾ ਹੈ।