* ਅਕਾਲੀ ਆਗੂ ਮਨਜੀਤ ਸਿੰਘ ਤਰਨ ਤਾਰਨੀ ਵੱਲੋਂ ਕਈ ਖੁਲਾਸੇ
* ਲਾਇਬਰੇਰੀ ਤੋਂ ਆਈ ਗੋਲੀ ਨੇ ਫੌਜ ਨੂੰ ਲਾਇਬਰੇਰੀ ਵੱਲ ਮੋੜਿਆ
ਅੰਮ੍ਰਿਤਸਰ, 17 ਜੂਨ (ਪੋਸਟ ਬਿਊਰੋ)- ਸ੍ਰੀ ਹਰਮੰਦਰ ਸਾਹਿਬ ਅੰਮ੍ਰਿਤਸਰ ਵਿਖੇ ਜੂਨ 1984 ਵਿੱਚ ਹੋਏ ਅਪਰੇਸ਼ਨ ਬਲਿਊ ਸਟਾਰ ਦੇ ਇੱਕ ਅੱਖੀਂ ਵੇਖਣ ਵਾਲੇ ਗਵਾਹ ਅਤੇ ਬਜ਼ੁਰਗ ਅਕਾਲੀ ਆਗੂ ਮਨਜੀਤ ਸਿੰਘ ਤਰਨ ਤਾਰਨੀ ਨੇ ਭੇਦ ਖੋਲ੍ਹਿਆ ਹੈ ਕਿ ਫੌਜ ਨੂੰ ਪਤਾ ਹੀ ਨਹੀਂ ਸੀ ਕਿ ਦਰਬਾਰ ਸਾਹਿਬ ਕੰਪਲੈਕਸ ਵਿੱਚ ਕੋਈ ਲਾਇਬਰੇਰੀ ਹੈ, ਇਸ ਦਾ ਓਦੋਂ ਪਤਾ ਲੱਗਾ ਜਦ ਸਤਿੰਦਰ ਸਿੰਘ ਪੀ ਟੀ ਨਾਂਅ ਦੇ ਖਾੜਕੂ ਨੇ ਲਾਇਬਰੇਰੀ ਤੋਂ ਗੋਲੀ ਚਲਾਈ ਅਤੇ ਫੌਜੀ ਮਾਰੇ ਗਏ ਤਾਂ ਉਸ ਨੂੰ ਲੱਭਦੇ ਫੌਜੀ ਲਾਇਬਰੇਰੀ ਵੱਲ ਆਏ ਤੇ ਕਿਤਾਬਾਂ ਉੱਤੇ ਕਬਜ਼ਾ ਕਰ ਲਿਆ ਸੀ।
ਜਥੇਦਾਰ ਮਨਜੀਤ ਸਿੰਘ ਤਰਨ ਤਾਰਨੀ ਦਾ ਕਹਿਣਾ ਹੈ ਕਿ ਸਤਿੰਦਰ ਸਿੰਘ ਪੀ ਟੀ ਨਾਂਅ ਦਾ ਇਹ ਬੰਦਾਂ ਸੰਤ ਜਰਨੈਲ ਸਿੰਘ ਭਿੰਡਰਾਂਵਾਲੇ ਦੇ ਜਥੇ ਦੇ ਨਾਲ ਸੀ, ਪਰ ਬਹੁਤੀ ਵਾਰ ਗੈਰ ਜ਼ਿੰਮੇਵਾਰੀ ਕਾਰਵਾਈਆਂ ਹੀ ਕਰਦਾ ਰਹਿੰਦਾ ਸੀ। ਉਨ੍ਹਾਂ ਦੱਸਿਆ ਕਿ ਲਾਇਬਰੇਰੀ ਵਾਲੇ ਹਿੱਸੇ ਉੱਤੇ ਸਤਿੰਦਰ ਸਿੰਘ ਪੀ ਟੀ ਦਾ ਕਬਜ਼ਾ ਸੀ। ਤਰਨ ਤਾਰਨੀ ਨੇ ਕਿਹਾ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਗੁਰਚਚਰਨ ਸਿੰਘ ਟੌਹੜਾ, ਅਕਾਲੀ ਦਲ ਦੇ ਪ੍ਰਧਾਨ ਸੰਤ ਹਰਚੰਦ ਸਿੰਘ ਲੌਂਗੋਵਾਲ, ਅਕਾਲੀ ਆਗੂ ਬਲਵੰਤ ਸਿੰਘ ਰਾਮੂਵਾਲੀਆ, ਸ਼੍ਰੋਮਣੀ ਕਮੇਟੀ ਦੇ ਸਕੱਤਰ ਭਾਨ ਸਿੰਘ ਅਤੇ ਜਥੇਦਾਰ ਟੌਹੜਾ ਦੇ ਨਿੱਜੀ ਸਹਾਇਕ ਅਬਿਨਾਸ਼ੀ ਸਿੰਘ ਦੇ ਨਾਲ ਫੌਜ ਵਾਲੇ ਬੀਬੀ ਅਮਰਜੀਤ ਕੌਰ ਅਤੇ ਖੁਦ ਮਨਜੀਤ ਸਿੰਘ ਨੂੰ ਵੀ ਗ੍ਰਿਫਤਾਰ ਕਰ ਕੇ ਲੈ ਗਏ। ਕਰੀਬ ਨੌਂ ਜੂਨ ਨੂੰ ਕਰਨਲ ਉਂਕਾਰ ਸਿੰਘ ਗੁਰਾਇਆ ਅਤੇ ਇੱਕ ਕਰਨਲ ਸ਼ਰਮਾ ਦੀ ਅਗਵਾਈ ਵਿੱਚ ਆਈ ਫੌਜੀ ਟੁਕੜੀ ਭਾਨ ਸਿੰਘ ਤੇ ਅਬਿਨਾਸ਼ੀ ਸਿੰਘ ਨੂੰ ਲੈ ਕੇ ਗਈ, ਜੋ ਦੇਰ ਸ਼ਾਮ ਨੂੰ ਮੁੜੇ। ਉਨ੍ਹਾਂ ਨੇ ਜਥੇਦਾਰ ਟੌਹੜਾ ਨੂੰ ਦੱਸਿਆ ਕਿ ਫੌਜ ਨੇ ਲਾਇਬਰੇਰੀ ਨੂੰ ਅੱਗ ਲਾ ਛੱਡੀ ਹੈ। ਅਗਲੀ ਸਵੇਰ ਜਦ ਦੋਵਾਂ ਨੂੰ ਫੌਜ ਫਿਰ ਲੈ ਗਈ ਤਾਂ ਸ਼ਾਮ ਨੂੰ ਆ ਕੇ ਉਨ੍ਹਾਂ ਦੱਸਿਆ ਕਿ ਲਾਇਬਰੇਰੀ ਦਾ ਸਾਮਾਨ ਬਚ ਗਿਆ ਹੈ, ਜਿਸ ਸੁਣ ਕੇ ਟੌਹੜਾ ਸਮੇਤ ਸਾਰਿਆਂ ਦਾ ਸਾਹ ਸੌਖਾ ਹੋਇਆ। ਉਨ੍ਹਾਂ ਦੱਸਿਆ ਕਿ ਇੱਕ ਵਿਅਕਤੀ ਦੀ ਗਲਤੀ ਕਾਰਨ ਇਹ ਘਟਨਾ ਵਾਪਰੀ।