ਟੋਰਾਂਟੋ, 17 ਜੂਨ (ਪੋਸਟ ਬਿਊਰੋ) : ਐਨਬੀਏ ਫਾਈਨਲਜ਼ ਦਾ ਐਮਵੀਪੀ ਕਾਵਹੀ ਲਿਓਨਾਰਡ ਭਾਵੇਂ ਸ਼ਾਂਤਚਿੱਤ, ਕੂਲ ਤੇ ਸੁਲਝਿਆ ਹੋਇਆ ਇਨਸਾਨ ਹੈ ਪਰ ਟੋਰਾਂਟੋ ਵਿੱਚ ਰੈਪਟਰਜ਼ ਦੇ ਫਰਸਟ ਲੀਗ ਚੈਂਪੀਅਨਸਿ਼ੱਪ ਦੇ ਮਨਾਏ ਜਾ ਰਹੇ ਜਸ਼ਨਾਂ ਨੂੰ ਵੇਖ ਕੇ ਇੱਕ ਵਾਰੀ ਤਾਂ ਉਹ ਵੀ ਖੁਸ਼ੀ ਵਿੱਚ ਖੀਵਾ ਹੋ ਉੱਠਿਆ।
ਸੋਮਵਾਰ ਨੂੰ ਰੈਪਟਰਜ਼ ਦੀ ਜਿੱਤ ਦੇ ਸਬੰਧ ਵਿੱਚ ਪ੍ਰਸ਼ੰਸਕਾਂ ਦੇ ਠਾਠਾਂ ਮਾਰਦੇ ਦਰਿਆ ਨੂੰ ਵੇਖ ਕੇ ਲਿਓਨਾਰਡ ਨੇ ਆਖਿਆ ਕਿ ਅਜਿਹਾ ਤਾਂ ਉਸ ਨੇ ਪਹਿਲਾਂ ਕਦੇ ਨਹੀਂ ਸੀ ਚਿਤਵਿਆ। ਨਾ ਹੀ ਉਸ ਨੇ ਆਪਣੇ ਅੱਖੀਂ ਪਹਿਲਾਂ ਕਦੇ ਅਜਿਹਾ ਨਜ਼ਾਰਾ ਹੀ ਵੇਖਿਆ ਸੀ। ਉਸ ਨੇ ਖੁਸ਼ ਹੁੰਦਿਆਂ ਆਖਿਆ ਕਿ ਹਰ ਕੋਈ ਸਾਡੀ ਖੁਸ਼ੀ ਵਿੱਚ ਸ਼ਾਮਲ ਹੋਣ ਲਈ ਅੱਜ ਬਾਹਰ ਨਿਕਲਿਆ ਹੋਇਆ ਹੈ। ਇਸ ਗੱਲ ਉੱਤੇ ਯਕੀਨ ਨਹੀਂ ਹੁੰਦਾ ਕਿ ਅੱਜ ਕੋਈ ਕੰਮ ਉੱਤੇ ਹੀ ਨਹੀਂ ਗਿਆ। ਇਹ ਨਜ਼ਾਰਾ ਕਮਾਲ ਦਾ ਹੈ।
ਖੁਸ਼ੀ ਵਿੱਚ ਸਰਾਬੋਰ ਆਪਣੇ ਪ੍ਰਸ਼ੰਸਕਾਂ ਨੂੰ ਸੰਬੋਧਨ ਕਰਦਿਆਂ ਲਿਓਨਾਰਡ ਨੇ ਆਖਿਆ ਕਿ ਤੁਹਾਡੇ ਸਮਰਥਨ ਤੇ ਹੌਸਲਾ ਅਫਜ਼ਾਈ ਲਈ ਟੋਰਾਂਟੋ ਤੇ ਕੈਨੇਡਾ ਤੁਹਾਡਾ ਬਹੁਤ ਬਹੁਤ ਸ਼ੁਕਰੀਆ। ਇਸੇ ਹੌਸਲੇ ਸਦਕਾ ਅਸੀਂ ਆਪਣੇ ਤੇ ਤੁਹਾਡੇ ਸਾਰਿਆਂ ਦੇ ਸੁਪਨੇ ਨੂੰ ਸੱਚ ਕਰ ਸਕੇ ਹਾਂ। ਟੀਮ ਦੇ ਇਸ ਸਵਾਗਤ ਤੋਂ ਸਿਰਫ ਲਿਓਨਾਰਡ ਹੀ ਪ੍ਰਭਾਵਿਤ ਨਹੀਂ ਸੀ। ਰੈਪਟਰਜ਼ ਲਈ ਕਲੱਚ ਸੂ਼ਟਰ ਰਹੇ ਗਾਰਡ ਫਰੈੱਡ ਵੈਨਵਲੀਟ ਨੇ ਆਖਿਆ ਕਿ ਪ੍ਰਸੰ਼ਸਕਾਂ ਦੇ ਇੱਕਠ ਨਾਲ ਇੱਕ ਵਾਰੀ ਤਾਂ ਧਰਤੀ ਵੀ ਹਿੱਲ ਰਹੀ ਹੈ। ਐਨੇ ਪਿਆਰ ਸਤਿਕਾਰ ਉੱਤੇ ਯਕੀਨ ਕਰਨਾ ਔਖਾ ਹੈ ਪਰ ਇਹ ਸੱਭ ਸਾਡੇ ਸਾਹਮਣੇ ਹੋ ਰਿਹਾ ਹੈ। ਇਸ ਨਜ਼ਾਰੇ ਨੂੰ ਲਫਜ਼ਾਂ ਵਿੱਚ ਬਿਆਨ ਨਹੀਂ ਕੀਤਾ ਜਾ ਸਕਦਾ।
ਫੌਰਵਰਡ ਪਾਸਕਲ ਸਿਆਕਾਮ ਨੇ ਆਖਿਆ ਕਿ ਉਨ੍ਹਾਂ ਨੂੰ ਆਪਣੀਆਂ ਅੱਖਾਂ ਉੱਤੇ ਯਕੀਨ ਨਹੀਂ ਹੋ ਰਿਹਾ ਕਿ ਇਹ ਸਭ ਸੱਚੀਂ ਵਾਪਰ ਰਿਹਾ ਹੈ। ਇਸ ਸੱਭ ਨਾਲ ਉਨ੍ਹਾਂ ਦੀ ਖੁਸ਼ੀ ਦਾ ਅਹਿਸਾਸ ਦੁੱਗਣਾ ਹੋ ਗਿਆ ਹੈ। ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਨੂੰ ਸਮਝ ਨਹੀਂ ਆ ਰਿਹਾ ਹੈ ਕਿ ਉਹ ਕੀ ਆਖਣ। ਉਨ੍ਹਾਂ ਅੱਗੇ ਆਖਿਆ ਕਿ ਉਨ੍ਹਾਂ ਦਾ ਅਗਲਾ ਟੀਚਾ 2020 ਵਿੱਚ ਹੋਣ ਵਾਲੀ ਚੈਂਪੀਅਨਸਿ਼ੱਪ ਜਿੱਤਣਾ ਹੈ। ਇਹ ਦੁਨੀਆ ਦੇ ਬਿਹਤਰੀਨ ਪ੍ਰਸ਼ੰਸਕ ਹਨ ਤੇ ਇਨ੍ਹਾਂ ਲਈ ਸਾਨੂੰ ਅਗਲੀ ਚੈਂਪੀਅਨਸਿ਼ੱਪ ਵੀ ਜਿੱਤਣੀ ਹੋਵੇਗੀ। ਐਨਾ ਤਾਂ ਅਸੀਂ ਇਨ੍ਹਾਂ ਲਈ ਕਰ ਹੀ ਸਕਦੇ ਹਾਂ।
ਡੈਨੀ ਗ੍ਰੀਨ ਨੇ ਆਖਿਆ ਕਿ ਉਸ ਨੂੰ ਲੱਗ ਰਿਹਾ ਹੈ ਕਿ 36 ਮਿਲੀਅਨ ਕੈਨੇਡੀਅਨ ਅੱਜ ਉਨ੍ਹਾਂ ਦੀ ਜਿੱਤ ਦੇ ਜਸ਼ਨ ਮਨਾ ਰਹੇ ਹਨ। ਇਹ ਅਹਿਸਾਸ ਹੀ ਆਪਣੇ ਆਪ ਵਿੱਚ ਕਿੰਨਾਂ ਚੰਗਾ ਹੈ। ਹੈੱਡ ਕੋਚ ਨਿੱਕ ਨਰਸ ਨੇ ਆਖਿਆ ਕਿ ਪ੍ਰਸ਼ੰਸਕਾਂ ਨੇ ਵੀ ਸਾਡੀ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਜਦੋਂ ਗੇਮ 1 ਵਿੱਚ ਉਹ ਓ ਕੈਨੇਡਾ ਗਾ ਰਹੇ ਸਨ ਤਾਂ ਵਾਰੀਅਰਜ਼ ਦੇ ਚਿਹਰੇ ਵੇਖਣ ਵਾਲੇ ਸਨ। ਉਨ੍ਹਾਂ ਨੂੰ ਪਤਾ ਸੀ ਕਿ ਸਾਰਾ ਦੇਸ਼ ਟੀਮ ਦੇ ਪਿੱਛੇ ਹੈ।
ਇਸ ਤਰ੍ਹਾਂ ਦਾ ਨਜ਼ਾਰਾ ਕੈਨੇਡਾ ਦੇ ਇਤਿਹਾਸ ਵਿੱਚ ਵਾਕਈ ਪਹਿਲਾਂ ਕਦੇ ਵੇਖਣ ਨੂੰ ਨਹੀਂ ਮਿਲਿਆ। ਜਦੋਂ ਖਿਡਾਰੀਆਂ ਨਾਲ ਭਰੀਆਂ ਬੱਸਾਂ ਸਬੰਧਤ ਰੂਟ ਤੋਂ ਲੰਘੀਆਂ ਤਾਂ ਰੈਪਟਰਜ਼ ਦੇ ਸੱਭ ਤੋਂ ਪੁਰਾਣੇ ਖਿਡਾਰੀ ਕਾਇਲੇ ਲੌਰੀ ਦੇ ਹੱਥ ਵਿੱਚ ਫੜ੍ਹੀ ਚੈਂਪੀਅਨਸਿ਼ਪ ਟਰੌਫੀ ਨੂੰ ਵੇਖਣ ਤੇ ਖਿਡਾਰੀਆਂ ਦੀ ਇੱਕ ਝਲਕ ਵੇਖਣ ਲਈ ਲੋਕਾਂ ਦਾ ਦਰਿਆ ਉਮੜ ਪਿਆ। ਸੜਕਾਂ, ਓਵਰਪਾਸਿਜ਼, ਛੱਤਾਂ ਤੇ ਪਾਰਕਿੰਗ ਗੈਰਾਜ ਤੱਕ ਵਿੱਚ ਲੋਕ ਅੱਡੀਆਂ ਚੁੱਕ ਚੁੱਕ ਪਰੇਡ ਦਾ ਆਨੰਦ ਮਾਣਦੇ ਨਜ਼ਰ ਆਏ।