ਤੇਲ ਅਵੀਵ, 17 ਜੂਨ (ਪੋਸਟ ਬਿਊਰੋ)- ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਵਿਵਾਦਤ ਗੋਲਾਨ ਪਹਾੜੀਆਂ ਦੇ ਖੇਤਰ ਦੀ ਇਕ ਬਸਤੀ ਦਾ ਨਾਂ ਰਸਮੀ ਤੌਰ ਉੱਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਨਾਂ ਉੱਤੇ ਰੱਖ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਗੋਲਾਨ ਦੀ ਇਕ ਬਸਤੀ ਨੂੰ ‘ਰਾਮਤ ਟਰੰਪ` ਦੇ ਨਾਂ ਨਾਲ ਜਾਣਿਆ ਜਾਵੇਗਾ।
ਨੇਤਨਯਾਹੂ ਨੇ ਐਤਵਾਰ ਇਕ ਬੈਠਕ ਵਿੱਚ ਕਿਹਾ, ‘ਅਸੀਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਮਾਣ ਵਿੱਚ ਗੋਲਾਨ ਪਹਾੜੀਆਂ ਵਿੱਚ ਨਵੀਂ ਬਸਤੀ ਵਸਾਉਣ ਵਾਲੇ ਹਾਂ। ਇਹ ਇਤਿਹਾਸਕ ਦਿਨ ਹੈ। ਟਰੰਪ ਦੇ ਨਾਂ ਉੱਤੇ ਬਸਤੀ ਸਥਾਪਤ ਕਰਨਾ ਅਮਰੀਕੀ ਰਾਸ਼ਟਰਪਤੀ ਦੇ ਉਨ੍ਹਾਂ ਫ਼ੈਸਲਿਆਂ ਪ੍ਰਤੀ ਸਨਮਾਨ ਪ੍ਰਗਟ ਕਰਨਾ ਹੈ ਜੋ ਇਜ਼ਰਾਈਲ ਦੇ ਹਿੱਤ ਵਿੱਚ ਰਹੇ ਹਨ।` ਯਰੂਸ਼ਲਮ ਨੂੰ ਇਜ਼ਰਾਈਲ ਦੀ ਰਾਜਧਾਨੀ ਵਜੋਂ ਮਾਨਤਾ ਦੇਣ ਦੇ ਨਾਲ ਟਰੰਪ ਗੋਲਾਨ ਪਹਾੜੀਆਂ ਉੱਤੇ ਉਸ ਦੇ ਅਧਿਕਾਰ ਉੱਤੇ ਵੀ ਆਪਣੀ ਮੋਹਰ ਲਾ ਚੁੱਕੇ ਹਨ। ਅਮਰੀਕੀ ਰਾਸ਼ਟਰਪਤੀ ਟਰੰਪ ਦੇ ਇਸ ਫ਼ੈਸਲੇ ਦੀ ਅੰਤਰਰਾਸ਼ਟਰੀ ਭਾਈਚਾਰੇ ਵੱਲੋਂ ਤਿੱਖੀ ਆਲੋਚਨਾ ਕੀਤੀ ਗਈ ਸੀ।
ਵਰਨਣ ਯੋਗ ਹੈ ਕਿ ਗੋਲਾਨ ਪਹਾੜੀਆਂ ਨੂੰ ਇਜ਼ਰਾਈਲ ਨੇ 1967 ਦੀ ਜੰਗ ਵਿੱਚ ਸੀਰੀਆ ਤੋਂ ਜਿੱਤ ਲਿਆ ਸੀ ਅਤੇ 1981 ਵਿੱਚ ਇਸ ਖੇਤਰ ਨੂੰ ਆਪਣਾ ਹਿੱਸਾ ਐਲਾਨ ਦਿੱਤਾ ਸੀ। ਸੰਸਾਰ ਭਰ ਵਿੱਚ ਇਸ ਦਾ ਵਿਰੋਧ ਹੋਏ ਤੋਂ ਜਿਉਂ ਦੀ ਤਿਉਂ ਸਥਿਤੀ ਬਹਾਲ ਕਰ ਦਿੱਤੀ ਗਈ ਸੀ। ਅਮਰੀਕਾ ਦੀ 50 ਸਾਲਾਂ ਤੋਂ ਵੱਧ ਸਮੇਂ ਤੋਂ ਚੱਲ ਰਹੀ ਨੀਤੀ ਦੇ ਉਲਟ ਡੋਨਾਲਡ ਟਰੰਪ ਨੇ ਇਸ ਸਾਲ ਮਾਰਚ ਵਿੱਚ ਇਨ੍ਹਾਂ ਪਹਾੜੀਆਂ ਉੱਤੇ ਇਜ਼ਰਾਈਲ ਦੇ ਕਬਜ਼ੇ ਨੂੰ ਮਾਨਤਾ ਦੇ ਦਿੱਤੀ ਸੀ।