ਹਿਊਸਟਨ, 16 ਜੂਨ (ਪੋਸਟ ਬਿਊਰੋ)- ਅਮਰੀਕਾ-ਮੈਕਸੀਕੋ ਸਰਹੱਦ ਨੇੜੇ ਪੈਂਦੇ ਐਰੀਜ਼ੋਨਾ ਰੇਗਿਸਤਾਨ ਵਿੱਚ ਇੱਕ ਛੇ ਸਾਲਾ ਪੰਜਾਬੀ ਬੱਚੀ ਗੁਰਪ੍ਰੀਤ ਕੌਰ ਦੀ ਲੂ ਲੱਗਣ ਨਾਲ ਉਸ ਸਮੇਂ ਮੌਤ ਹੋ ਗਈ, ਜਦੋਂ ਉਸ ਦੀ ਮਾਂ ਉਸ ਨੂੰ ਛੱਡ ਕੇ ਉਸ ਦੇ ਲਈ ਪਾਣੀ ਦੀ ਭਾਲ ਵਿੱਚ ਗਈ ਸੀ। ਅਮਰੀਕੀ ਅਧਿਕਾਰੀਆਂ ਨੇ ਇਸ ਘਟਨਾ ਲਈ ਮਨੁੱਖੀ ਤਸਕਰਾਂ ਨੂੰ ਦੋਸ਼ੀ ਠਹਿਰਾਇਆ ਹੈ। ਲਿਊਕਵਿਲੇ ਤੋਂ 27 ਕਿਲੋਮੀਟਰ ਦੂਰ ਐਰਾਜ਼ੋਨਾ ਵਿੱਚ ਅਮਰੀਕੀ ਸਰਹੱਦੀ ਗਸ਼ਤ ਪਾਰਟੀ ਨੂੰ ਇਹ ਬੱਚੀ, ਜੋ ਆਪਣਾ ਸੱਤਵਾਂ ਜਨਮ ਦਿਨ ਮਨਾਉਣ ਵਾਲੀ ਸੀ, ਮ੍ਰਿਤਕ ਹਾਲਤ ਵਿੱਚ ਮਿਲੀ ਸੀ। ਐਰੀਜ਼ੋਨਾ ਵਿੱਚ ਇਸ ਸਮੇਂ ਤਾਪਮਾਨ 42 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਜਾਂਦਾ ਹੈ।
ਪੁਲਸ ਰਿਪੋਰਟ ਮੁਤਾਬਕ ਪਾਈਮਾ ਕਾਊਂਟੀ ਮੁੱਖ ਡਾਕਟਰੀ ਨਿਰੀਖਕ ਗਰੇਗੋਰੀ ਹੈਸ ਨੇ ਦੱਸਿਆ ਕਿ ਮ੍ਰਿਤਕ ਬੱਚੀ ਦੀ ਪਛਾਣ ਗੁਰਪ੍ਰੀਤ ਕੋਰ ਵਜੋਂ ਹੋਈ ਅਤੇ ਉਸ ਦੀ ਮੌਤ ਅਚਾਨਕ 'ਤੇ ਹਾਈਪਰਥਰਮੀਆ ਕਾਰਨ ਹੋਈ ਹੈ। ਗਸ਼ਤ ਪਾਰਟੀ ਨੇ ਬੱਚੀ ਦੀ ਮੌਤ ਲਈ ਮਨੁੱਖੀ ਤਸਕਰਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਬੱਚੀ ਨਾਲ ਚਾਰ ਹੋਰ ਲੋਕ ਅਮਰੀਕਾ ਆਉਣ ਲਈ ਅੱਗੇ ਵਧ ਰਹੇ ਸਨ, ਜਿਨ੍ਹਾਂ ਨੂੰ ਮਨੁੱਖੀ ਤਸਕਰਾਂ ਨੇ ਸਰਹੱਦ ਨੇੜੇ ਛੱਡ ਕੇ ਇਹ ਖਤਰਨਾਕ ਰਸਤਾ ਪਾਰ ਕਰਨ ਲਈ ਕਿਹਾ ਸੀ। ਗਸ਼ਤ ਪਾਰਟੀ ਦੇ ਏਜੰਟ ਜੀਸਸ ਵਾਸਾਵਿਲਬਾਸੋ ਨੇ ਦੱਸਿਆ ਕਿ ਕੁਝ ਸਮਾਂ ਚੱਲਣ ਬਾਅਦ ਬੱਚੀ ਦੀ ਮਾਤਾ ਆਪਣੀ ਬੱਚੀ ਨੂੰ ਇੱਕ ਔਰਤ ਜਿਸ ਨਾਲ ਉਸ ਦਾ ਬੱਚਾ ਵੀ ਸੀ, ਕੋਲ ਛੱਡ ਕੇ ਇੱਕ ਹੋਰ ਔਰਤ ਨਾਲ ਪਾਣੀ ਲੈਣ ਚਲੀ ਗਈ ਤੇ ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਮੁੜ ਨਹੀਂ ਵੇਖਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਕੁਝ ਸਮੇਂ ਬਾਅਦ ਉਨ੍ਹਾਂ ਨੂੰ ਇਹ ਬੱਚੀ ਮ੍ਰਿਤਕ ਹਾਲਤ ਵਿੱਚ ਮਿਲੀ। ਉਨ੍ਹਾਂ ਕਿਹਾ ਕਿ ਸਾਨੂੰ ਮ੍ਰਿਤਕ ਬੱਚੀ ਤੇ ਉਸ ਦੇ ਪਰਵਾਰ ਨਾਲ ਹਮਦਰਦੀ ਹੈ ਤੇ ਲਾਪਤਾ ਹੋਏ ਲੋਕਾਂ ਦੀ ਭਾਲ ਜਾਰੀ ਹੈ।