ਲੰਡਨ, 16 ਜੂਨ (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਤਕਨੀਕੀ ਸੈਕਟਰ ਵਿੱਚ ਸੇਵਾਵਾਂ ਦੇਣ ਲਈ ਭਾਰਤ ਅਤੇ ਅਮਰੀਕਾ ਦੇ ਪੇਸ਼ੇਵਰ ਤੇ ਉਦਮੀ ਸਭ ਤੋਂ ਵੱਧ ਇਛੁੱਕ ਹਨ। ਦੋਵਾਂ ਦੇਸ਼ਾਂ ਦੇ ਨਾਗਰਿਕਾਂ ਨੇ ਇਸ ਦੇ ਲਈ ਸਭ ਤੋਂ ਵੱਧ ਗਿਣਤੀ ਵਿੱਚ ਵੀਜ਼ਾ ਲਈ ਬਿਨੈ ਕੀਤਾ ਹੈ। ਬ੍ਰਿਟੇਨ ਦੇ ਗ੍ਰਹਿ ਮੰਤਰਾਲੇ ਦੀ ਬ੍ਰਾਂਚ ਟੈਕ ਨੇਸ਼ਨ ਨੇ ਇਹ ਗੱਲ ਕਹੀ ਹੈ।
ਵਰਨਣ ਯੋਗ ਹੈ ਕਿ ਇਹ ਬ੍ਰਾਂਚ ਤਕਨੀਕੀ ਖੇਤਰ ਵਿੱਚ ਕੰਮ ਕਰਨ ਦੇ ਇਛੁੱਕ ਲੋਕਾਂ ਲਈ ਵੀਜ਼ਾ ਜਾਰੀ ਕਰਦੀ ਹੈ। ਟੈਕ ਨੇਸ਼ਨ ਨੇ ਪਾਇਆ ਕਿ ਬ੍ਰਿਟੇਨ ਦੇ ਟੈਕਨਾਲੋਜੀ ਸੈਕਟਰ ਵਿੱਚ ਭਾਰਤੀਆਂ ਦੀ ਵੱਡੀ ਗਿਣਤੀ ਕੰਮ ਕਰ ਰਹੀ ਹੈ, ਜੋ ਸਾਲੋ ਸਾਲ ਵਧਦੀ ਜਾਂਦੀ ਹੈ। 2018-19 'ਚ ਇਸ ਖੇਤਰ ਵਿੱਚ 650 ਭਾਰਤੀਆਂ ਨੇ ਵੀਜ਼ਾ ਲਈ ਬਿਨੈ ਕੀਤਾ, ਜਦ ਕਿ ਇਸ ਤੋਂ ਪਹਿਲਾਂ ਦੇ ਸਾਲ 'ਚ 450 ਪੇਸ਼ੇਵਰਾਂ ਨੇ ਵੀਜ਼ਾ ਮੰਗਿਆ ਸੀ। ਇਹ ਇੱਕ ਸਾਲ ਵਿੱਚ 45 ਫੀਸਦੀ ਦਾ ਵੱਡਾ ਵਾਧਾ ਹੈ। ਸਭ ਤੋਂ ਵੱਧ ਵੀਜ਼ਾ ਮੰਗਣ ਵਾਲੇ ਭਾਰਤੀ ਜਿੱਥੇ ਸਾਫਟਵੇਅਰ ਇੰਜੀਨੀਅਰ ਹਨ, ਉਥੇ ਅਮਰੀਕੀ ਬਿਜ਼ਨਸ ਡਿਵੈਲਪਰ ਹਨ। ਇਨ੍ਹਾਂ ਦੋਵਾਂ ਦੇਸ਼ਾਂ ਤੋਂ ਬਿਨਾ ਨਾਈਜੀਰੀਆ, ਰੂਸ, ਕੈਨੇਡਾ, ਆਸਟਰੇਲੀਆ, ਚੀਨ ਤੇ ਦੱਖਣੀ ਅਫਰੀਕਾ ਦੇ ਲੋਕਾਂ ਨੂੰ ਵੀ ਵੱਡੀ ਗਿਣਤੀ ਵਿੱਚ ਵੀਜ਼ਾ ਲਈ ਬਿਨੈ ਕੀਤਾ ਹੈ। ਟੈਕ ਨੇਸ਼ਨ ਟੀਅਰ 1 ਗ੍ਰੇਡ ਦੇ ਵੀਜ਼ਾ ਬਿਨੈਕਾਰਾਂ ਦੀ ਮਨਜ਼ੂਰੀ ਪ੍ਰਕਿਰਿਆ ਵੇਖਦਾ ਹੈ ਤੇ ਉਨ੍ਹਾਂ ਦਾ ਰਿਕਾਰਡ ਰੱਖਦਾ ਹੈ। ਖਾਸ ਤੌਰ 'ਤੇ ਡਿਜ਼ੀਟਲ ਟੈਕਨਾਲੋਜੀ ਨਾਲ ਜੁੜੇ ਬਿਨੈ ਵੇਖਦਾ ਹੈ। ਟੈਲੇਂਟ ਵੀਜ਼ਾ ਦੇ ਮਾਮਲੇ ਵੇਖਣ ਲਈ ਗ੍ਰਹਿ ਮੰਤਰਾਲੇ ਵਿੱਚ ਵੱਖਰੀ ਬ੍ਰਾਂਚ ਹੈ।
ਆਪਣੀ ਤਾਜ਼ਾ ਨੀਤੀ ਵਿੱਚ ਬ੍ਰਿਟੇਨ ਪੂਰੀ ਦੁਨੀਆ ਦੇ ਹੁਨਰਮੰਦਾਂ ਨੂੰ ਸੱਦਾ ਦੇ ਰਿਹਾ ਹੈ। ਉਹ ਬੀਤੇ ਦਹਾਕਿਆਂ ਵਿੱਚ ਹੌਲੀ ਹੋਈ ਤਰੱਕੀ ਦੀ ਰਫਤਾਰ ਨੂੰ ਗਤੀ ਦੇਣਾ ਚਾਹੁੰਦਾ ਹੈ ਤੇ ਤਕਨੀਕ ਖੇਤਰ ਦੇ ਪੇਸ਼ੇਵਰਾਂ ਤੋਂ ਇਲਾਵਾ ਵਿਦਵਾਨ ਅਧਿਆਪਕਾਂ ਨੂੰ ਸੱਦਾ ਦੇ ਰਿਹਾ ਹੈ ਜਿਸ ਨਾਲ ਦੇਸ਼ ਵਿੱਚ ਸਿਖਿਆ ਦਾ ਪੱਧਰ ਉਚਾ ਬਣਿਆ ਰਹੇ ਤੇ ਉਥੇ ਆਉਣ ਵਾਲੇ ਵਿਦੇਸ਼ੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਵਾਧੇ ਦਾ ਸਿਲਸਿਲਾ ਕਾਇਮ ਰਹੇ। ਢਾਂਚਾਗਤ ਆਧਾਰ 'ਤੇ ਬ੍ਰਿਟੇਨ ਭਾਰਤ ਦੇ ਹੁਨਰਮੰਦਾਂ ਨੂੰ ਜ਼ਿਆਦਾ ਮੌਕਾ ਦੇ ਰਿਹਾ ਹੈ ਤੇ ਤਰੱਕੀ ਦੀ ਰਫਤਾਰ ਵਧਾਉਣ 'ਚ ਉਨ੍ਹਾਂ ਦਾ ਸਹਿਯੋਗ ਲੈ ਰਿਹਾ ਹੈ।