ਪਟਨਾ, 15 ਜੂਨ (ਪੋਸਟ ਬਿਊਰੋ)- ਬਿਹਾਰ ਵਿਚ ਹੋਏ ਇਕ ਵਿਆਹ ਦੀ ਸੋਸ਼ਲ ਮੀਡੀਆ ਉੱਤੇ ਖ਼ੂਬ ਚਰਚਾ ਹੋ ਰਹੀ ਹੈ, ਕਿਉਂਕਿ ਇਸ ਵਿਆਹ ਵਿਚ ਜੋ ਕੁਝ ਹੋਇਆ, ਉਹ ਆਪਣੇ ਆਪ ਵਿੱਚ ਮਿਸਾਲ ਹੈ।
ਇਹ ਵਿਆਹ ਜੰਮੂ-ਕਸ਼ਮੀਰ ਵਿੱਚ ਅਪਰੇਸ਼ਨ ਵਿੱਚ ਸ਼ਹੀਦ ਹੋਏ ਗਰੁੜ ਕਮਾਂਡੋ ਜੋਤੀ ਪ੍ਰਕਾਸ਼ ਨਿਰਾਲਾ ਦੀ ਭੈਣ ਦਾ ਸੀ। ਜੋਤੀ ਪ੍ਰਕਾਸ਼ ਨਿਰਾਲਾ ਦੋ ਸਾਲ ਪਹਿਲਾਂ ਇੱਕ ਮੁਕਾਬਲੇ ਵਿੱਚ ਮਾਰੇ ਗਏ ਸਨ। ਘਰ ਦੀ ਆਰਥਿਕ ਹਾਲਤ ਠੀਕ ਨਾ ਹੋਣ ਕਾਰਨ ਨਿਰਾਲਾ ਦੇ ਕਮਾਂਡੋ ਦੋਸਤਾਂ ਨੇ ਇਸ ਵਿਆਹ ਦਾ ਜ਼ਿੰਮਾ ਉਠਾਇਆ ਤੇ ਪੈਸੇ ਇਕੱਠੇ ਕਰਕੇ ਨਿਰਾਲਾ ਦੀ ਭੈਣ ਦਾ ਵਿਆਹ ਧੂਮਧਾਮ ਨਾਲ ਕੀਤਾ। ਇਸ ਮੌਕੇ ਖ਼ਾਸ ਗੱਲ ਇਹ ਸੀ ਕਿ ਜਦੋਂ ਲੜਕੀ ਦੀ ਵਿਦਾਈ ਹੋਣੀ ਸੀ ਤਾਂ ਉਨ੍ਹਾਂ ਦੋਸਤਾਂ ਨੇ ਆਪਣੇ ਸ਼ਹੀਦ ਦੋਸਤ ਦੀ ਭੈਣ ਸ਼ਸ਼ੀ ਕਲਾ ਦੇ ਪੈਰ ਜ਼ਮੀਨ ਉੱਤੇ ਨਹੀਂ ਲੱਗਣ ਦਿੱਤੇ, ਉਸ ਦੇ ਪੈਰਾਂ ਹੇਠਾਂ ਸਾਰੇ ਕਮਾਂਡੋ ਜਵਾਨਾਂ ਨੇ ਅਪਣੇ ਹੱਥਾਂ ਦੀਆਂ ਤਲੀਆਂ ਵਿਛਾ ਦਿੱਤੀਆਂ। ਇਹ ਬਹੁਤ ਹੀ ਯਾਦਗਾਰੀ ਪਲ ਸਨ।
ਜੋਤੀ ਪ੍ਰਕਾਸ਼ ਨਿਰਾਲਾ ਨੇ 18 ਨਵੰਬਰ 2017 ਨੂੰ ਜੰਮੂ-ਕਸ਼ਮੀਰ ਦੇ ਬਾਂਦੀਪੋਰਾ ਜਿ਼ਲੇ ਦੇ ਪਿੰਡ ਚੰਦਰਨਗਰ ਵਿਚ ਇਕੱਲੇ ਨੇ ਤਿੰਨ ਅਤਿਵਾਦੀਆਂ ਨੂੰ ਮਾਰਿਆ ਸੀ। ਇਸ ਮੁਕਾਬਲੇ ਵਿੱਚ ਨਿਰਾਲਾ ਵੀ ਅਤਿਵਾਦੀਆਂ ਦੀ ਗੋਲੀ ਲੱਗਣ ਨਾਲ ਜਾਨ ਵਾਰ ਗਏ ਸਨ। ਇਸ ਬਹਾਦੁਰੀ ਨਾਲ ਨਿਰਾਲਾ ਏਅਰ ਫੋਰਸ ਦੇ ਪਹਿਲੇ ਅਜਿਹੇ ਜਵਾਨ ਬਣੇ, ਜਿਨ੍ਹਾਂ ਨੂੰ ਗਰਾਊਂਡ ਅਪਰੇਸ਼ਨ ਲਈ ਮਰਨ ਉਪਰੰਤ ਅਸ਼ੋਕ ਚੱਕਰ ਨਾਲ ਸਨਮਾਨਿਤ ਕੀਤਾ ਗਿਆ ਸੀ।