* ਕਾਂਗਰਸੀ ਕੌਂਸਲਰ ਦੇ ਭਰਾ ਸਮੇਤ ਦੋਸ਼ੀ ਗ੍ਰਿਫਤਾਰ
ਮੁਕਤਸਰ ਸਾਹਿਬ, 15 ਜੂਨ (ਪੋਸਟ ਬਿਊਰੋ)- ਕੱਲ੍ਹ ਦੁਪਹਿਰੇ ਮੁਕਤਸਰ ਨਗਰ ਕੌਂਸਲ ਦੇ ਕਾਂਗਰਸੀ ਕੌਂਸਲਰ ਰਾਕੇਸ਼ ਚੌਧਰੀ ਦੇ ਭਰਾਵਾਂ ਤੇ ਅੱਧੀ ਦਰਜਨ ਗੁੰਡਿਆਂ ਨੇ ਦੋ ਔਰਤਾਂ ਨੂੰ ਘਰੋਂ ਧੂਹ ਕੇ ਉਨ੍ਹਾਂ ਦੀ ਸੜਕ 'ਤੇ ਬੈਲਟਾਂ, ਸੋਟੀਆਂ ਤੇ ਲੱਤਾਂ ਮੁੱਕੀਆਂ ਨਾਲ ਕੁੱਟਮਾਰ ਕੀਤੀ। ਇਸ ਦੀ ਵਜ੍ਹਾ ਵਿਆਜ ਦੇ 23 ਹਜ਼ਾਰ ਰੁਪਏ ਦਾ ਲੈਣ ਦੇਣ ਹੈ।ਪੀੜਤ ਔਰਤ ਤੇ ਉਸ ਦੀ ਮਾਤਾ ਸਿਵਲ ਹਸਪਤਾਲ 'ਚ ਦਾਖਲ ਹਨ, ਡਾਕਟਰਾਂ ਅਨੁਸਾਰ ਉਨ੍ਹਾਂ ਦੇ ਗੁੱਝੀਆਂ ਸੱਟਾਂ ਹਨ। ਪੀੜਤ ਦੇ ਲੜਕੇ ਵੱਲੋਂ ਇਸ ਘਟਨਾ ਦੀ ਬਣਾਈ ਵੀਡੀਓ ਵਾਇਰਲ ਹੋਣ ਨਾਲ ਮਾਮਲਾ ਚਰਚਾ ਵਿੱਚ ਆ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਵਾਰਡ ਨੰਬਰ-29 ਦੇ ਕੌਂਸਲਰ ਰਾਕੇਸ਼ ਚੌਧਰੀ ਦਾ ਪਰਵਾਰ ਵਿਆਜ 'ਤੇ ਪੈਸੇ ਦਿੰਦਾ ਹੈ। ਪੀੜਤ ਔਰਤ ਦੇ ਲੜਕੇ ਸੂਰਜ ਨੇ ਉਨ੍ਹਾਂ ਕੋਲੋਂ ਆਪਣੀ ਭੈਣ ਦੇ ਇਲਾਜ ਵਾਸਤੇ ਦੋ ਲੱਖ ਰੁਪਏ ਲਏ ਸਨ। ਉਸ ਨੇ ਸੱਤ ਲੱਖ ਰੁਪਏ ਮੋੜ ਦਿੱਤੇ ਹਨ, ਪਰ ਰਕੇਸ਼ ਚੌਧਰੀ ਉਸ ਦੇ ਸਿਰ 23 ਹਜ਼ਾਰ ਰੁਪਏ ਹੋਰ ਕੱਢ ਰਿਹਾ ਹੈ। ਕੱਲ੍ਹ ਉਸ ਦੇ ਭਰਾ ਸੰਨੀ, ਰੂਪ ਅਤੇ ਕੁਝ ਹੋਰ ਆਦਮੀ ਪੀੜਤ ਦੇ ਘਰ ਪੈਸੇ ਲੈਣ ਆਏ। ਪੈਸੇ ਨਾ ਮਿਲਣ ਕਾਰਨ ਉਨ੍ਹਾਂ ਨੇ ਸੂਰਜ ਦੀ ਭੈਣ ਅਤੇ ਉਸ ਦੀ ਮਾਂ ਸਣੇ ਬੱਚਿਆਂ ਦੀ ਕੁੱਟਮਾਰ ਕੀਤੀ। ਸੂਰਜ ਦੇ ਪਿਤਾ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਰਾਕੇਸ਼ ਚੌਧਰੀ ਉਨ੍ਹਾਂ ਨੂੰ ਕਈ ਵਾਰ ਜਾਨੋਂ ਮਾਰਨ ਤੇ ਲੜਕੀਆਂ ਚੁੱਕ ਲਿਜਾਣ ਦੀਆਂ ਧਮਕੀਆਂ ਦੇ ਚੁੱਕਾ ਹੈ। ਉਨ੍ਹਾਂ ਦੱਸਿਆ ਕਿ ਕੁੱਟਮਾਰ ਕਰਨ ਵਾਲਿਆਂ 'ਚ ਚੌਧਰੀ ਪਰਵਾਰ ਦੀ ਔਰਤ ਵੀ ਸ਼ਾਮਲ ਸੀ।
ਪੰਜਾਬ ਜਮਹੂਰੀ ਅਧਿਕਾਰ ਸਭਾ ਦੇ ਆਗੂ ਐਡਵੋਕੇਟ ਐਨ ਕੇ ਜੀਤ ਅਤੇ ਪ੍ਰਿਤਪਾਲ ਸਿੰਘ ਹੋਰਨਾਂ ਨੇ ਪ੍ਰਸ਼ਾਸਨ ਤੋਂ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਕਾਂਗਰਸ ਦੀ ਹਲਕਾ ਇੰਚਾਰਜ ਕਰਨ ਕੌਰ ਬਰਾੜ ਨੇ ਵੀ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਸਿਵਲ ਹਸਪਤਾਲ 'ਚ ਦਾਖਲ ਰਾਕੇਸ਼ ਚੌਧਰੀ ਦੇ ਪਰਵਾਰ ਦੀ ਔਰਤ ਰੇਨੂੰ ਨੇ ਦੱਸਿਆ ਕਿ ਉਹ ਆਪਣੇ ਪੈਸੇ ਲੈਣ ਗਏ ਸਨ, ਇਸ ਦੌਰਾਨ ਝਗੜਾ ਹੋ ਗਿਆ।ਕੌਂਸਲਰ ਰਕੇਸ਼ ਚੌਧਰੀ, ਉਸ ਦੇ ਭਰਾ ਸੰਨੀ ਚੌਧਰੀ, ਰੂਪ ਲਾਲ, ਸੁਰੇਸ਼, ਜੰਬੋ ਸਣੇ ਦਸ ਜਣਿਆਂ ਖਿਲਾਫ ਥਾਣਾ ਸਿਟੀ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ। ਥਾਣਾ ਮੁਖੀ ਅਸ਼ੋਕ ਕੁਮਾਰ ਨੇ ਦੱਸਿਆ ਕਿ ਪੁਲਸ ਮੁਲਜ਼ਮਾਂ ਦੀ ਭਾਲ ਕਰ ਰਹੀ ਹੈ।