ਕਾਠਮੰਡੂ, 13 ਜੂਨ (ਪੋਸਟ ਬਿਊਰੋ)- ਨੇਪਾਲ ਸਰਕਾਰ ਨੇ ਤਿੰਨ ਭਾਰਤੀ ਪਰਬਤਾਰੋਹੀਆਂ ਦੇ ਖਿਲਾਫ ਜਾਂਚ ਸ਼ੁਰ ਕਰ ਦਿੱਤੀ ਹੈ ਜਿਨ੍ਹਾਂ ਨੇ 26 ਮਈ ਨੂੰ ਮਾਊਂਟ ਐਵਰੈਸਟ ਨੂੰ ਫਤਹਿ ਕਰਨ ਦਾ ਫਰਜ਼ੀ ਦਾਅਵਾ ਕੀਤਾ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਨੇਪਾਲ ਸਰਕਾਰ ਨੇ ਕਿਹਾ ਕਿ ਵਿਕਾਸ ਰਾਣਾ, ਸ਼ੋਭਾ ਬਨਵਾਲਾ ਅਤੇ ਅੰਕੁਸ਼ ਕਸਾਨਾ ਤਿੰਨੇ ਭਾਰਤ ਦੇ ਹਰਿਆਣਾ ਦੇ ਵਾਸੀ ਹਨ ਤੇ ਆਪਣੇ ਘਰ ਮੁੜਨ 'ਤੇ ਇਨ੍ਹਾਂ ਦਾ ਸ਼ਾਨਦਾਰ ਸਵਾਗਤ ਹੋਇਆ ਸੀ। ਤਿੰਨਾਂ ਨੂੰ ਮਾਊਂਟ ਐਵਰੈਸਟ ਦੀ ਚੋਟੀ 'ਤੇ ਪਹੁੰਚਣ ਦੇ ਡਾਕੂਮੈਂਟਰੀ ਪਰੂਫ ਜਮ੍ਹਾ ਕਰਾਉਣ ਲਈ ਕਿਹਾ ਗਿਆ ਹੈ। ਇਸ ਸੰਬੰਧ ਵਿੱਚ ਨੇਪਾਲ ਦੇ ਇੱਕ ਅਖਬਾਰ ਨੇ ਦਾਅਵਾ ਕੀਤਾ ਸੀ ਕਿ ਇਹ ਤਿੰਨੇ ਠਹਿਰਾਅ ਕੈਂਪ ਤੱਕ ਵੀ ਨਹੀਂ ਗਏ, ਜੋ ਚੋਟੀ ਉਤੇ ਪਹੁੰਚਣ ਤੋਂ 1300 ਮੀਟਰ ਹੇਠਾਂ ਹੈ ਅਤੇ ਇਹ ਰੈਸਟ ਸਟਾਪ ਹੈ। ਅਖਬਾਰ ਨੇ ਕਈ ਤਰਕਾਂ ਦੇ ਆਧਾਰ ਉੱਤੇ ਆਪਣੇ ਦਾਅਵੇ ਪੇਸ਼ ਕੀਤੇ ਹਨ। ਇਨ੍ਹਾਂ ਵਿੱਚੋਂ ਕਿਸੇ ਨੇ ਵੀ ਚੋਟੀ 'ਤੇ ਜਾ ਕੇ ਕੋਈ ਵੀ ਫੋਟੋਗਰਾਫ ਨਹੀਂ ਲਿਆ। ਪਰਤਬਾਰੋਹੀ ਟੀਮ ਦੇ ਨਾਲ ਹਮੇਸ਼ਾ ਇੱਕ ਸ਼ੇਰਪਾ ਜ਼ਰੂਰ ਜਾਂਦਾ ਹੈ, ਪਰ ਉਸ ਨੇ ਵੀ ਉਨ੍ਹਾਂ ਦੇ ਦਾਅਵੇ ਦਾ ਸਮਰਥਨ ਨਹੀਂ ਕੀਤਾ ਅਤੇ ਨੇਪਾਲੀ ਸੈਲਾਨੀ ਵਿਭਾਗ ਨੇ ਵੀ ਇਨ੍ਹਾਂ ਤਿੰਨਾਂ ਨੂੰ ਅਜੇ ਤੱਕ ਸਰਟੀਫਿਕੇਟ ਜਾਰੀ ਨਹੀਂ ਕੀਤਾ। ਜਦ ਇਨ੍ਹਾਂ ਤਿੰਨਾਂ ਤੋਂ ਉਨ੍ਹਾਂ ਦੇ ਸ਼ੇਰਪਾ ਦੇ ਨਾਂਅ ਦੱਸਣ ਨੂੰ ਕਿਹਾ ਗਿਆ ਤਾਂ ਉਹ ਵੀ ਨਹੀਂ ਦੱਸ ਸਕੇ। ਇਨ੍ਹਾਂ ਤਿੰਨਾਂ ਨੇ ਦਾਅਵਾ ਕੀਤਾ ਸੀ ਕਿ ਉਨ੍ਹਾਂ ਨੇ ਆਪਣੇ ਚਾਰ ਸ਼ੇਰਪਾ ਦੇ ਨਾਲ 26 ਮਈ ਨੂੰ ਮਾਊਂਟ ਐਵਰੈਸਟ ਨੂੰ ਫਤਹਿ ਕੀਤਾ ਸੀ।