ਬਰੈਂਪਟਨ, 13 ਜੂਨ (ਪੋਸਟ ਬਿਊਰੋ) : ਯੂਨਾਈਟਿਡ ਕਿੰਗਡਮ ਦੀ ਫਾਇਨਾਂਸ਼ੀਅਲ ਟਾਈਮਜ਼ ਡਵੀਜ਼ਨ ਐਫਡੀਆਈ ਇੰਟੈਲੀਜੈਂਸ ਵੱਲੋਂ ਕੀਤੀ ਗਈ ਦਰਜੇਬੰਦੀ ਮੁਤਾਬਕ ਕੱਲ੍ਹ ਬਰੈਂਪਟਨ ਨੂੰ ਭਵਿੱਖ 2019/20 ਦੇ ਸਿਖਰਲੇ 10 ਦਰਮਿਆਨੇ ਆਕਾਰ ਦੇ ਅਮਰੀਕੀ ਸ਼ਹਿਰਾਂ ਵਜੋਂ ਮਾਨਤਾ ਦਿੱਤੀ ਗਈ।
ਬਰੈਂਪਟਨ ਨੂੰ ਕੋਨੈਕਟੀਵਿਟੀ ਕੈਟੇਗਰੀ ਲਈ ਕੀਤੀ ਗਈ ਦਰਜੇਬੰਦੀ ਵਿੱਚ ਪਹਿਲਾ ਤੇ ਬਿਜ਼ਨਸ ਫਰੈਂਡਲੀਨੈੱਸ ਲਈ ਉੱਘੇ 10 ਵਿੱਚੋਂ ਅੱਠਵਾਂ ਸਥਾਨ ਹਾਸਲ ਹੋਇਆ। 29 ਮਈ ਨੂੰ ਬਰੈਂਪਟਨ ਦੇ ਇਕਨਾਮਿਕ ਡਿਵੈਲਪਮੈਂਟ ਐਂਡ ਕਲਚਰ ਆਫਿਸ ਵੱਲੋਂ ਕੌਮਾਂਤਰੀ ਪੱਧਰ ਉੱਤੇ ਮਜ਼ਬੂਤ ਆਰਥਿਕ ਸਬੰਧ ਕਾਇਮ ਕਰਨ ਤੇ ਬਰੈਂਪਟਨ ਵਿੱਚ ਵਿਕਾਸ ਦੇ ਨਾਲ ਨਾਲ ਰੋਜ਼ਗਾਰ ਦੇ ਮੌਕਿਆਂ ਵਿੱਚ ਵਾਧਾ ਕਰਨ ਲਈ ਕਦਮ ਦਰ ਕਦਮ ਯੋਜਨਾ ਦਾ ਖੁਲਾਸਾ ਕੀਤਾ ਗਿਆ। ਇਸ ਦਾ ਅਸਲ ਮਕਸਦ ਦੁਨੀਆ ਨੂੰ ਇਹ ਦਿਖਾਉਣਾ ਹੈ ਕਿ ਬਰੈਂਪਟਨ ਮੌਕਿਆਂ ਦਾ ਸ਼ਹਿਰ ਹੈ।
ਇਹ ਪਹਿਲੀ ਵਾਰੀ ਨਹੀਂ ਹੈ ਕਿ ਬਰੈਂਪਟਨ ਨੂੰ ਐਫਡੀਆਈ ਇੰਟੈਲੀਜੈਂਸ ਤੋਂ ਮਾਨਤਾ ਹਾਸਲ ਹੋਈ ਹੋਵੇ। ਇਹ ਦਰਜੇਬੰਦੀ ਹਰ ਦੋ ਸਾਲ ਬਾਅਦ ਨੰਵਿਆਈ ਜਾਂਦੀ ਹੈ। ਪਿਛਲੇ ਅੱਠ ਸਾਲਾਂ ਤੋਂ ਬਰੈਂਪਟਨ ਲਗਾਤਾਰ ਇਸ ਵਿੱਚ ਜਿੱਤਦਾ ਆ ਰਿਹਾ ਹੈ ਜਾਂ ਫਿਰ ਬਿਜ਼ਨਸ ਫਰੈਂਡਲੀਨੈੱਸ, ਸਿਟੀ ਆਫ ਦ ਫਿਊਚਰ, ਇਨਫਰਾਸਟ੍ਰਕਚਰ ਤੇ ਕੋਨੈਕਟੀਵਿਟੀ ਦੀਆਂ ਵੰਨਗੀਆਂ ਵਿੱਚ ਸਿਖਰ ਦੇ ਨੇੜੇ ਰਹਿੰਦਾ ਆਇਆ ਹੈ।