ਬਰੈਂਪਟਨ, 12 ਜੂਨ (ਪੋਸਟ ਬਿਊਰੋ) : ਬਰੈਂਪਟਨ ਨੌਰਥ ਤੋਂ ਪਾਰਲੀਆਮੈਂਟ ਮੈਂਬਰ ਰੂਬੀ ਸਹੋਤਾ ਆਪਣੇ ਪਰਿਵਾਰ ਨਾਲ ਬਰੈਂਪਟਨ ਵਿੱਚ ਰਹਿ ਰਹੇ ਹਨ। ਹੋਰਨਾਂ ਮਾਂਵਾਂ ਵਾਂਗ ਉਹ ਵੀ ਜੁਰਮ ਵਿੱਚ ਹੋ ਰਹੇ ਵਾਧੇ ਨੂੰ ਲੈ ਕੇ ਕਾਫੀ ਚਿੰਤਤ ਹਨ।
ਖਾਸ ਤੌਰ ਉੱਤੇ ਗਰਮੀ ਦੇ ਮੌਸਮ ਵਿੱਚ ਗੰਨ ਤੇ ਗੈਂਗ ਹਿੰਸਾ ਵਿੱਚ ਹੋਏ ਵਾਧੇ ਨੂੰ ਲੈ ਕੇ ਉਹ ਕਾਫੀ ਚਿੰਤਤ ਹਨ। ਪਿਛਲੇ ਹਫਤੇ ਐਮਪੀ ਸਹੋਤਾ, ਜੋ ਕਿ ਪਬਲਿਕ ਸੇਫਟੀ ਤੇ ਨੈਸ਼ਨਲ ਸਕਿਊਰਿਟੀ ਬਾਰੇ ਹਾਊਸ ਆਫ ਕਾਮਨਜ਼ ਦੀ ਸਥਾਈ ਕਮੇਟੀ ਦੀ ਮੈਂਬਰ ਹੈ, ਨੇ ਬਾਰਡਰ ਸਕਿਊਰਿਟੀ ਐਂਡ ਆਰਗੇਨਾਈਜ਼ਡ ਕ੍ਰਾਈਮ ਰਿਡਕਸ਼ਨ ਮੰਤਰੀ ਬਿੱਲ ਬਲੇਅਰ ਨੂੰ ਸਵਾਲ ਕੀਤਾ ਕਿ ਫੈਡਰਲ ਲਿਬਰਲ ਸਰਕਾਰ ਵੱਲੋਂ ਓਨਟਾਰੀਓ ਵਿੱਚ ਗੈਰਕਾਨੂੰਨੀ ਗੰਨਜ਼ ਤੇ ਗੈਂਗਜ਼ ਨਾਲ ਸਿੱਝਣ ਲਈ 65 ਮਿਲੀਅਨ ਡਾਲਰ ਦੇ ਕੀਤੇ ਜਾ ਰਹੇ ਨਿਵੇਸ਼ ਤੱਕ ਪੀਲ ਰੀਜਨਲ ਪੁਲਿਸ ਕਿਸ ਤਰ੍ਹਾਂ ਪਹੁੰਚ ਕਰ ਸਕਦੀ ਹੈ।
ਬਿੱਲ ਬਲੇਅਰ, ਜੋ ਕਿ ਟੋਰਾਂਟੋ ਦੇ ਸਾਬਕਾ ਪੁਲਿਸ ਮੁਖੀ ਵੀ ਰਹੇ ਹਨ, ਨੇ ਸਪਸ਼ਟ ਕੀਤਾ ਕਿ ਭਾਵੇਂ ਗੈਰਕਾਨੂੰਨੀ ਗੰਨਜ਼ ਤੇ ਗੈਂਗਜ਼ ਨਾਲ ਲੜਨ ਲਈ ਫੰਡ ਫੈਡਰਲ ਸਰਕਾਰ ਵੱਲੋਂ ਆ ਰਹੇ ਹਨ ਪਰ ਇਹ ਓਨਟਾਰੀਓ ਦੀ ਪ੍ਰੋਵਿੰਸ਼ੀਅਲ ਸਰਕਾਰ ਉੱਤੇ ਹੀ ਨਿਰਭਰ ਕਰਦਾ ਹੈ ਕਿ ਇਸ ਪੈਸੇ ਨੂੰ ਕਿੱਥੇ ਤੇ ਕਦੋਂ ਨਿਵੇਸ਼ ਕੀਤਾ ਜਾਵੇ। ਐਮਪੀ ਸਹੋਤਾ ਨੇ ਆਖਿਆ ਕਿ ਇਹ ਬੜੀ ਦਿਲਚਸਪ ਗੱਲ ਹੈ ਕਿ ਕੰਜ਼ਰਵੇਟਿਵ ਇਹ ਦਿਖਾਵਾ ਕਰਨ ਵਿੱਚ ਮਾਹਿਰ ਹਨ ਕਿ ਉਹ ਜੁਰਮ ਖਿਲਾਫ ਸਖ਼ਤੀ ਨਾਲ ਪੇਸ਼ ਆਉਂਦੇ ਹਨ ਪਰ ਹਕੀਕਤ ਤੋਂ ਇਹ ਕੋਹਾਂ ਦੂਰ ਹੈ।
ਫੈਡਰਲ ਲਿਬਰਲ ਸਰਕਾਰ ਵੱਲੋਂ ਉਪਲਬਧ ਕਰਵਾਏ ਗਏ 65 ਮਿਲੀਅਨ ਡਾਲਰ ਵਿੱਚੋਂ ਪ੍ਰੋਵਿੰਸ਼ੀਅਲ ਕੰਜ਼ਰਵੇਟਿਵਾਂ ਨੇ ਸਿਰਫ 11 ਮਿਲੀਅਨ ਡਾਲਰ ਹੀ ਖਰਚ ਕੀਤੇ ਹਨ। ਸਹੋਤਾ ਨੇ ਆਖਿਆ ਕਿ ਸਾਲ ਦਰ ਸਾਲ ਜੁਰਮ ਵਿੱਚ ਹੋ ਰਹੇ ਵਾਧੇ ਦੇ ਬਾਵਜੂਦ ਬਰੈਂਪਟਨ ਵਰਗੀਆਂ ਕਮਿਊਨਿਟੀਜ਼ ਨੂੰ ਜੁਰਮ ਰੋਕਣ ਲਈ ਫੰਡਾਂ ਦੀ ਲੋੜ ਹੋਣ ਦੇ ਬਾਵਜੂਦ ਪ੍ਰੋਵਿੰਸ਼ੀਅਲ ਸਰਕਾਰ ਦਾ ਇਹ ਹਾਲ ਹੈ।