ਬਰੈਂਪਟਨ, 12 ਜੂਨ (ਪੋਸਟ ਬਿਊਰੋ) : ਜਿੰ਼ਦਗੀ ਵਿੱਚ ਸਫਲ ਹੋਣ ਲਈ ਜਿਸ ਤਰ੍ਹਾਂ ਦੇ ਹੁਨਰ ਦੀ ਲੋੜ ਹੈ ਉਹ ਯਕੀਨੀ ਬਣਾਉਣ ਲਈ ਸਾਡੇ ਵਿਦਿਆਰਥੀਆਂ ਨੂੰ ਵਰਲਡ ਕਲਾਸ ਐਜੂਕੇਸ਼ਨ ਸਿਸਟਮ ਮੁਹੱਈਆ ਕਰਵਾਉਣ ਵਾਸਤੇ ਓਨਟਾਰੀਓ ਸਰਕਾਰ ਨਵੇਂ ਲੋਕਲ ਸਕੂਲਜ਼ ਵਿੱਚ ਨਿਵੇਸ਼ ਕਰ ਰਹੀ ਹੈ।
ਪ੍ਰੋਵਿੰਸ ਵੱਲੋਂ ਹੋਲੀ ਨੇਮ ਆਫ ਮੈਰੀ ਕੈਥੋਲਿਕ ਸੈਕੰਡਰੀ ਸਕੂਲਾਂ ਨਾਲ ਹੋਰ ਵਿਦਿਆਰਥੀਆਂ ਨੂੰ ਜੋੜੇ ਜਾਣ ਲਈ ਮਨਜ਼ੂਰੀ ਦਿੱਤੀ ਗਈ ਹੈ। ਇਸ ਵਾਧੇ ਤੋਂ ਬਾਅਦ ਡਫਰਿਨ-ਪੀਲ ਕੈਥੋਲਿਕ ਡਿਸਟ੍ਰਿਕਟ ਸਕੂਲ ਬੋਰਡ 357 ਵਿਦਿਆਰਥੀਆਂ ਲਈ ਥਾਂ ਬਣਾਵੇਗਾ। ਬਰੈਂਪਟਨ ਸਾਊਥ ਤੋਂ ਐਮਪੀਪੀ ਪ੍ਰਭਮੀਤ ਸਰਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਵਾਧਾ ਸਾਡੀ ਕਮਿਊਨਿਟੀ ਲਈ ਬਹੁਤ ਹੀ ਚੰਗੀ ਖਬਰ ਹੈ। ਇਹ ਪ੍ਰੋਜੈਕਟ ਸੇਫ ਤੇ ਸਿੱਖਣ ਲਈ ਮਿਆਰੀ ਮਾਹੌਲ ਮੁਹੱਈਆ ਕਰਾਵੇਗਾ। ਸਰਕਾਰੀਆ ਨੇ ਆਖਿਆ ਕਿ ਸਾਡੀ ਸਰਕਾਰ ਵੱਲੋਂ ਬਰੈਂਪਟਨ ਲਈ ਕੀਤੇ ਜਾ ਰਹੇ ਕੰਮ ਦੀ ਇਹ ਇੱਕ ਹੋਰ ਵਧੀਆ ਉਦਾਹਰਣ ਹੈ।
ਹੋਲੀ ਨੇਮ ਆਫ ਮੈਰੀ ਕੈਥੋਲਿਕ ਸੈਕੰਡਰੀ ਸਕੂਲਾਂ ਲਈ ਕੀਤੇ ਜਾ ਰਹੇ ਕੰਮ ਤਹਿਤ 357 ਵਿਦਿਆਰਥੀਆਂ ਲਈ ਥਾਂ ਬਣਾਉਣ ਤੋਂ ਇਲਾਵਾ ਸਾਈਟ ਉੱਤੇ ਪੋਰਟੇਬਲਜ਼ ਦੀ ਲੋੜ ਨੂੰ ਘਟਾਉਣਾ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਸਮਰੱਥਾ ਤੇ ਸੇਫਟੀ ਮੁਤਾਬਕ ਪਾਰਕਿੰਗ ਵਿੱਚ ਸੋਧ ਕਰਨ ਦਾ ਵੀ ਪ੍ਰਬੰਧ ਹੈ। ਓਨਟਾਰੀਓ ਵੱਲੋਂ ਪਿੱਛੇ ਜਿਹੇ ਅਜਿਹੀ ਸਿੱਖਿਆ ਮੁਹੱਈਆ ਕਰਵਾਉਣ ਦਾ ਐਲਾਨ ਕੀਤਾ ਗਿਆ ਜਿਹੜੀ ਸਭਨਾਂ ਦੇ ਕੰਮ ਆ ਸਕੇ। ਇਸ ਤਹਿਤ ਪਾਠਕ੍ਰਮ ਦੇ ਆਧੁਨਿਕੀਕਰਨ, ਕਲਾਸਾਂ ਦੇ ਆਧੁਨਿਕੀਕਰਨ ਲਈ ਨਵੀਂ ਯੋਜਨਾ ਲਿਆਉਣ ਦੇ ਨਾਲ ਨਾਲ ਆਧੁਨਿਕ ਯੁੱਗ ਦੀਆਂ ਤਲਖ਼ ਹਕੀਕਤਾਂ ਵਾਸਤੇ ਵਿਦਿਆਰਥੀਆਂ ਨੂੰ ਤਿਆਰ ਕਰਨ ਲਈ ਅਧਿਆਪਕਾਂ ਦੇ ਸਸ਼ਕਤੀਕਰਨ ਵੱਲ ਜ਼ੋਰ ਦਿੱਤਾ ਜਾ ਰਿਹਾ ਹੈ।
ਸਕੂਲ ਦੀਆਂ ਇਨਫਰਾਸਟ੍ਰਕਚਰ ਲੋੜਾਂ ਨੂੰ ਪੂਰਾ ਕਰਨ ਲਈ ਸਰਕਾਰ ਬਰੈਂਪਟਨ ਵਰਗੀਆਂ ਕਮਿਊਨਿਟੀਜ਼ ਲਈ ਸਿੱਖਿਆ ਦੇ ਖੇਤਰ ਵਿੱਚ ਮਦਦ ਕਰ ਰਹੀ ਹੈ ਤਾਂ ਕਿ ਸਾਡੇ ਵਿਦਿਆਰਥੀਆਂ ਨੂੰ ਵਰਲਡ ਕਲਾਸ ਸਿੱਖਿਆ ਮੁਹੱਈਆ ਕਰਵਾਈ ਜਾ ਸਕੇ।