ਨਵੀਂ ਦਿੱਲੀ, 12 ਜੂਨ (ਪੋਸਟ ਬਿਊਰੋ)- ਫੇਸਬੁਕ ਨੇ ਵਟਸਐਪ ਵਿੱਚ ਬੱਗ ਦੀ ਖੋਜ ਕਰਨ ਵਾਲੇ ਭਾਰਤੀ ਨੌਜਵਾਨ ਨੂੰ ਇਨਾਮ ਦੇ ਕੇ ਸਨਮਾਨਤ ਕੀਤਾ ਅਤੇ ਮਿਸਾਲ ਕਾਇਮ ਕੀਤੀ ਹੈ।
ਮਣੀਪੁਰ ਦੇ ਰਹਿਣ ਵਾਲੇ ਜਾਨੇਲ ਸਾਰਗੈਜਮ ਨੂੰ ਇਸ ਬਗ ਦਾ ਪਤਾ ਲਾਉਣ ਲਈ ਫੇਸਬੁਕ ਨੇ 5000 ਡਾਲਰ ਦਾ ਇਨਾਮ ਦਿੱਤਾ ਹੈ। ਇਹੀ ਨਹੀਂ ਫੇਸਬੁਕ ਨੇ ਉਨ੍ਹਾਂ ਨੂੰ ਇਨ੍ਹਾਂ ਦੀ ਇਸ ਪ੍ਰਾਪਤੀ ਲਈ ਫੇਸਬੁਕ ਹਾਲ ਆਫ ਫੇਮ 2019 ਵਿੱਚ ਵੀ ਸਥਾਨ ਦਿੱਤਾ ਹੈ। 94 ਲੋਕਾਂ ਦੀ ਇਸ ਸੂਚੀ ਵਿੱਚ ਜਾਨੇਲ ਨੂੰ 16ਵਾਂ ਸਥਾਨ ਮਿਲਿਆ ਹੈ। 22 ਸਾਲਾ ਜਾਨੇਲ ਪੇਸ਼ੇ ਤੋਂ ਇੱਕ ਸਿਵਲ ਇੰਜੀਨੀਅਰ ਹਨ। ਜਾਨੇਲ ਨੇ ਦੱਸਿਆ ਵਟਸਐਪ 'ਤੇ ਵਾਈਸ ਕਾਲ ਦੇ ਦੌਰਾਨ ਇਹ ਬਗ ਵਾਈਸ ਕਾਲ ਨੂੰ ਵੀਡੀਓ ਕਾਲ ਵਿੱਚ ਅਪਗ੍ਰੇਡ ਕਰਨ ਦੀ ਇਜਾਜ਼ਤ ਦਿੰਦਾ ਸੀ ਅਤੇ ਉਹ ਵੀ ਰਿਸੀਵਰ ਦੀ ਜਾਣਕਾਰੀ ਅਤੇ ਆਰਥੋਰਾਈਜੇਸ਼ਨ ਦੇ ਬਗੈਰ ਦੇਂਦਾ ਸੀ। ਇਸ ਦੇ ਕਾਰਨ ਕਾਲਰ ਇਹ ਜਾਨ ਸਕਦਾ ਸੀ ਕਿ ਰਿਸੀਵਰ ਕੀ ਕਰ ਰਿਹਾ ਹੈ। ਇਹ ਰਿਸੀਵਰ ਦੀ ਪ੍ਰਾਈਵੇਸੀ ਦਾ ਉਲੰਘਣ ਹੈ। ਬਗ ਦਾ ਪਤਾ ਲੱਗਣ ਦੇ ਬਾਅਦ ਮਾਰਚ 2019 ਵਿੱਚ ਜਾਨੇਲ ਨੇ ਇਸ ਬਗ ਦੇ ਬਾਰੇ ਵਿੱਚ ਫੇਸਬੁਕ ਦੇ ਬਗ ਬਾਉਂਟੀ ਪ੍ਰੋਗਰਾਮ ਉਤੇ ਰਿਪੋਰਟ ਕਰਦੇ ਹੋਏ ਕਿਹਾ ਕਿ ਇਹ ਬਗ ਯੂਜ਼ਰਜ਼ ਦੀ ਪ੍ਰਾਈਵੇਸੀ ਦਾ ਉਲੰਘਣਾ ਕਰਦਾ ਹੈ। ਜਾਨੇਲ ਦੀ ਇਸ ਰਿਪੋਰਟ ਦਾ ਨੋਟਿਸ ਲੈਂਦੇ ਹੋਏ ਫੇਸਬੁਕ ਦੀ ਸਕਿਓਰਿਟੀ ਟੀਮ ਨੇ ਇਸ ਨੂੰ 15-20 ਦਿਨਾਂ ਵਿੱਚ ਠੀਕ ਕੀਤਾ। ਇਸ ਦੇ ਬਾਅਦ ਫੇਸਬੁਕ ਨੇ ਜਾਨੇਲ ਨੂੰ ਇੱਕ ਈ-ਮੇਲ ਭੇਜ ਕੇ ਕਿਹਾ ਕਿ ਕੰਪਨੀ ਨੇ ਬਗ ਨੂੰ ਰਿਵਿਊ ਕਰਨ ਪਿੱਛੋਂ ਉਨ੍ਹਾਂ ਨੂੰ 5000 ਡਾਲਰ ਦੀ ਬਾਉਂਟੀ ਦੇਣ ਦਾ ਫੈਸਲਾ ਕੀਤਾ ਹੈ। ਦੂਸਰੇ ਪਾਸੇ ਜਾਨੇਲ ਨੇ ਕਿਹਾ ਕਿ ਉਨ੍ਹਾਂ ਨੇ ਇਸੇ ਮਹੀਨੇ ਆਪਣੇ ਨਾਂਅ ਨੂੰ ਫੇਸਬੁਕ ਦੇ ਹਾਲ ਆਫ ਫੇਮ ਪੇਜ਼ 'ਤੇ ਦੇਖਿਆ ਹੈ।