ਅਹਿਮਦਾਬਾਦ, 12 ਜੂਨ (ਪੋਸਟ ਬਿਊਰੋ)- ਸਾਲ 2017 ਵਿੱਚ ਜੈੱਟ ਏਅਰਵੇਜ਼ ਦੇ ਇੱਕ ਜਹਾਜ਼ ਵਿੱਚ ਅਗਵਾ ਹੋਣ ਦੀ ਧਮਕੀ ਵਾਲੀ ਚਿੱਠੀ ਛੱਡਣ ਵਾਲੇ ਇੱਕ ਵਿਅਕਤੀ ਨੂੰ ਅਦਾਲਤ ਨੇ ਜਿੱਥੇ ਉਮਰ ਕੈਦ ਦਾ ਸਜ਼ਾ ਸੁਣਾਈ ਹੈ, ਉਥੇ ਉਸ 'ਤੇ ਪੰਜ ਕਰੋੜ ਰੁਪਏ ਦਾ ਜੁਰਮਾਨਾ ਵੀ ਕੀਤਾ ਹੈ।
ਵਿਸ਼ੇਸ਼ ਐੱਨ ਆਈ ਏ ਅਦਾਲਤ ਨੇ ਕਿਹਾ ਕਿ ਮੁੰਬਈ ਦੇ ਰਹਿਣ ਵਾਲੇ ਵੱਡੇ ਦੋਸ਼ੀ ਵਪਾਰੀ ਬਿਰਜੂ ਸੱਲਾ ਵੱਲੋਂ ਦਿੱਤੇ ਜਾਣ ਵਾਲੇ ਜੁਰਮਾਨੇ ਦੀ ਰਕਮ ਨੂੰ ਜਹਾਜ਼ ਵਿੱਚ ਸਵਾਰ ਚਾਲਕ ਟੀਮ ਦੇ ਮੈਂਬਰਾਂ ਅਤੇ ਯਾਤਰੀਆਂ ਵਿਚਾਲੇ ਵੰਡੀ ਜਾਵੇਗੀ। ਸੱਲਾ 'ਤੇ ਤੀਹ ਅਕਤੂਬਰ 2017 ਨੂੰ ਜਹਾਜ਼ ਦੇ ਪਖਾਨੇ ਵਿੱਚ ਟਿਸ਼ੂ ਪੇਪਰ ਬਾਕਸ ਵਿੱਚ ਅੰਗਰੇਜ਼ੀ ਅਤੇ ਉਰਦੂ ਵਿੱਚ ਧਮਕੀ ਭਰਿਆ ਨੋਟ ਲਿਖ ਕੇ ਜਹਾਜ਼ ਦੇ ਅਗਵਾ ਹੋਣ ਦੀ ਅਫਵਾਹ ਫੈਲਾਉਣ ਦਾ ਦੋਸ਼ ਹੈ। ਘਟਨਾ ਤੋਂ ਬਾਅਦ ਸੱਲਾ ਕੌਮੀ ਉਡਾਣ ਰੋਕੂ ਸੂਚੀ ਵਿੱਚ ਪਾਇਆ ਜਾਣ ਵਾਲਾ ਪਹਿਲਾ ਵਿਅਕਤੀ ਬਣਿਆ ਸੀ ਤੇ ਉਸ ਵਿਰੁੱਧ ਕੇਸ ਦਰਜ ਕੀਤਾ ਗਿਆ ਸੀ। ਐੱਨ ਆਈ ਏ ਨੇ ਪਿਛਲੇ ਸਾਲ ਉਸ ਦੇ ਵਿਰੁੱਧ ਦੋਸ਼-ਪੱਤਰ ਦਾਖਲ ਕੀਤਾ ਸੀ। ਉਸ ਨੂੰ ਅਕਤੂਬਰ 2017 ਵਿੱਚ ਜਹਾਜ਼ ਦੇ ਅਹਿਮਦਾਬਾਦ ਹਵਾਈ ਅੱਡੇ 'ਤੇ ਹੰਗਾਮੀ ਸਥਿਤੀ ਵਿੱਚ ਉਤਰਨ ਵੇਲੇ ਗ੍ਰਿਫਤਾਰ ਕੀਤਾ ਗਿਆ ਸੀ।