ਬਰੈਂਪਟਨ, (ਡਾ. ਝੰਡ) -ਮੈਰਾਥਨ ਦੌੜਾਕ ਸੰਜੂ ਗੁਪਤਾ ਹਰ ਹਫ਼ਤੇ ਕਿਸੇ ਨਾ ਕਿਸੇ ਲੰਮੀ ਦੌੜ ਵਿਚ ਭਾਗ ਲੈਂਦਾ ਹੈ ਅਤੇ ਕਈ ਵਾਰ ਇਨ੍ਹਾਂ ਦੀ ਗਿਣਤੀ ਦੋ ਜਾਂ ਤਿੰਨ ਵੀ ਹੋ ਜਾਂਦੀ ਹੈ ਹਨ, ਜਿਵੇਂ ਕਿ ਪਿਛਲੇ ਹਫ਼ਤੇ ਉਹ 1 ਤੇ 2 ਜੂਨ ਨੂੰ ਹੈਮਿਲਟਨ ਵਿਚ ਦੋ ਦੌੜਾਂ 10 ਕਿਲੋਮੀਟਰ ਤੇ ਹਾਫ਼ ਮੈਰਾਥਨ ਦੌੜਿਆ ਅਤੇ ਉਸ ਤੋਂ ਪਿਛਲੇ ਹਫ਼ਤੇ ਔਟਵਾ ਵਿਚ 25 ਮਈ ਸ਼ਨੀਵਾਰ ਨੂੰ ਉਸ ਨੇ 5 ਕਿਲੋਮੀਟਰ ਤੇ 10 ਕਿਲੋਮੀਟਰ ਦੀਆਂ ਦੋ ਦੌੜਾਂ ਲਗਾਈਆਂ ਅਤੇ ਉਸ ਤੋਂ ਅਗਲੇ ਦਿਨ ਐਤਵਾਰ 26 ਮਈ ਨੂੰ ਹਾਫ਼-ਮੈਰਾਥਨ ਵਿਚ ਹਿੱਸਾ ਲਿਆ। ਉਸ ਤੋਂ ਪਿਛਲੇ ਹਫ਼ਤੇ ਦੀ ਗੱਲ ਕਰੀਏ ਤਾਂ ਗੁਰੂ ਗੋਬਿੰਦ ਸਿੰਘ ਚਿਲਡਰਨ ਫ਼ਾਂਊਂਡੇਸ਼ਨ ਵੱਲੋਂ 19 ਮਈ ਕਰਵਾਈ ਗਈ 'ਇੰਸਪੀਰੇਸ਼ਨਲ ਸਟੈੱਪਸ' ਵਿਚ ਉਹ ਫੁੱਲ-ਮੈਰਾਥਨ ਲਈ ਸਕਾਰਬਰੋ ਤੋਂ ਡਿਕਸੀ ਗੁਰੂਘਰ ਤੱਕ 42 ਕਿਲੋਮੀਟਰ ਦੌੜਿਆ ਸੀ।
ਜਿ਼ਕਰਯੋਗ ਹੈ ਕਿ ਬੀਤੇ ਐਤਵਾਰ 9 ਜੂਨ ਨੂੰ ਸੰਜੂ ਗੁਪਤਾ ਨੇ ਗੁਅੱਲਫ਼ ਲੇਕ 10 ਕਿਲੋਮੀਟਰ ਰੱਨ ਵਿਚ ਹਿੱਸਾ ਲਿਆ ਅਤੇ ਉਸ ਨੇ ਇਹ ਇਕ ਘੰਟਾ 6 ਮਿੰਟ ਤੇ 40 ਸਕਿੰਟ ਵਿਚ ਸਮਾਪਤ ਕੀਤੀ। ਇਸ ਦੌੜ ਵਿਚ 118 ਵਿਅੱਕਤੀਆਂ ਨੇ ਹਿੱਸਾ ਲਿਆ ਅਤੇ 51 ਸਾਲਾ ਸੰਜੂ ਗੁਪਤਾ ਦੀ ਆਪਣੀ 50-59 ਸਾਲ ਦੀ ਕੈਟਾਗਰੀ ਵਿਚ ਛੇਵੀਂ ਪੋਜ਼ੀਸ਼ਨ ਸੀ। ਇਸ ਤਰ੍ਹਾਂ ਜਨਵਰੀ 2019 ਤੋਂ ਹੁਣ ਤੀਕ 9 ਜੂਨ ਵਾਲੀ ਗੁਅੱਲਫ਼ ਲੇਕ ਰੱਨ ਉਸ ਦੀ ਇਹ 24'ਵੀਂ ਦੌੜ ਬਣਦੀ ਹੈ।