ਓਨਟਾਰੀਓ, 11 ਜੂਨ (ਪੋਸਟ ਬਿਊਰੋ) : ਸਿਟੀ ਅਧਿਕਾਰੀ ਬਰੈਂਟਫੋਰਡ ਵਿੱਚ ਸ਼ਾਪਿੰਗ ਮਾਲ ਦੀ ਛੱਤ ਡਿੱਗ ਜਾਣ ਦੇ ਕਾਰਨਾਂ ਦਾ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ। ਇਸ ਘਟਨਾ ਵਿੱਚ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਖਬਰ ਨਹੀਂ ਹੈ।
ਬਰੈਂਟਫੋਰਡ ਫਾਇਰ ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਸੋਮਵਾਰ ਨੂੰ ਇਸ ਸਬੰਧੀ ਸ਼ਾਮੀਂ 5:35 ਉੱਤੇ ਮਿਲੀ ਖਬਰ ਤੋਂ ਬਾਅਦ ਉਹ ਫੌਰਨ ਲਿੰਡਨ ਪਾਰਕ ਮਾਲ ਪਹੁੰਚੇ। ਇਸ ਮੌਕੇ ਘੱਟੋ ਘੱਟ 15 ਫਾਇਰਫਾਈਟਰਜ਼ ਘਟਨਾ ਵਾਲੀ ਥਾਂ ਉੱਤੇ ਮੌਜੂਦ ਸਨ। ਮੌਕੇ ਦੀਆਂ ਤਸਵੀਰਾਂ ਤੋਂ ਪਤਾ ਚੱਲਦਾ ਸੀ ਕਿ ਡਰਾਇਵਾਲ ਜ਼ਮੀਨ ਉੱਤੇ ਡਿੱਗੀ ਪਈ ਸੀ ਤੇ ਛੱਤ ਉੱਤੇ ਧਾਤ ਦਾ ਸਾਰਾ ਸਮਾਨ ਨਜ਼ਰ ਆ ਰਿਹਾ ਸੀ।
ਇਸ ਘਟਨਾ ਤੋਂ ਬਾਅਦ ਮਾਲ ਨੂੰ ਖਾਲੀ ਕਰਵਾ ਲਿਆ ਗਿਆ। ਇਸ ਘਟਨਾ ਵਿੱਚ ਕੋਈ ਵੀ ਜ਼ਖ਼ਮੀ ਨਹੀਂ ਹੋਇਆ। ਇਸ ਥਾਂ ਤੋਂ ਨੇੜਲੇ ਸਟੋਰ ਵਿੱਚ ਕੰਮ ਕਰਨ ਵਾਲੀ ਇੱਕ ਮਹਿਲਾ ਨੇ ਦੱਸਿਆ ਕਿ ਵੈਸੇ ਤਾਂ ਉਹ ਜਲਦੀ ਸਟੋਰ ਬੰਦ ਨਹੀਂ ਕਰਦੇ ਪਰ ਜਿਸ ਥਾਂ ਉੱਤੇ ਛੱਤ ਡਿੱਗੀ ਉਸ ਦੇ ਨੇੜਲੇ ਸਟੋਰਜ਼ ਜਲਦੀ ਬੰਦ ਕਰ ਦਿੱਤੇ ਗਏ।
ਪਹਿਲਾਂ ਮਿਲੀਆਂ ਅਪੁਸ਼ਟ ਖਬਰਾਂ ਅਨੁਸਾਰ ਮੀਂਹ ਕਾਰਨ ਛੱਤ ਨੂੰ ਸਹੀ ਢੰਗ ਨਾਲ ਨਹੀਂ ਸੀ ਬਣਾਇਆ ਗਿਆ ਪਰ ਇਸ ਗੱਲ ਦੀ ਕੋਈ ਪੁਸ਼ਟੀ ਨਹੀਂ ਹੋ ਸਕੀ। ਸਿਟੀ ਵੱਲੋਂ ਅਜੇ ਵੀ ਘਟਨਾ ਦੇ ਕਾਰਨਾਂ ਦਾ ਪਤਾ ਲਾਉਣ ਲਈ ਜਾਂਚ ਚੱਲ ਰਹੀ ਹੈ। ਭਾਵੇਂ ਮੰਗਲਵਾਰ ਨੂੰ ਮਾਲ ਆਮ ਵਾਂਗ ਹੀ ਖੁੱਲ੍ਹਿਆ ਪਰ ਘਟਨਾ ਵਾਲੀ ਥਾਂ ਦੇ ਨੇੜਲੇ ਸਟੋਰਜ਼ ਨੂੰ ਬੰਦ ਰੱਖਿਆ ਗਿਆ।