ਟੋਰਾਂਟੋ, 11 ਜੂਨ (ਪੋਸਟ ਬਿਊਰੋ) : ਮੰਗਲਵਾਰ ਸਵੇਰੇ ਚਾਕੂ ਨਾਲ ਹੋਏ ਜ਼ਖ਼ਮਾਂ ਸਮੇਤ ਇੱਕ ਵਿਅਕਤੀ ਡਾਊਨਟਾਊਨ ਦੇ ਹੋਟਲ ਵਿੱਚ ਗੇੜਾ ਮਾਰਨ ਤੋਂ ਬਾਅਦ ਹਸਪਤਾਲ ਪਹੁੰਚਿਆ।
ਪੁਲਿਸ ਦਾ ਕਹਿਣਾ ਹੈ ਕਿ ਉਸ ਵਿਅਕਤੀ ਦੀ ਲੱਤ ਵਿੱਚ ਛੁਰੇਬਾਜ਼ੀ ਕਾਰਨ ਕਾਫੀ ਜ਼ਖ਼ਮ ਸੀ ਤੇ ਇਹ ਜ਼ਖ਼ਮ ਕਿਸੇ ਅਪੁਸ਼ਟ ਥਾਂ ਉੱਤੇ ਹੋਈ ਲੜਾਈ ਕਾਰਨ ਹੋਇਆ ਲੱਗ ਰਿਹਾ ਸੀ। ਉਸ ਥਾਂ ਤੋਂ ਉਸ ਵਿਅਕਤੀ ਨੇ ਊਬਰ ਲਈ ਤੇ ਰਿਚਮੰਡ ਸਟਰੀਟ ਤੇ ਯੂਨੀਵਰਸਿਟੀ ਐਵਨਿਊ ਨੇੜੇ ਹਿਲਟਨ ਪਹੁੰਚਿਆ। ਮੰਗਲਵਾਰ ਸਵੇਰੇ ਹੋਟਲ ਦੇ ਬਾਹਰ ਚਿੱਟੇ ਰੰਗ ਦੀ ਕੈਮਰੀ ਪਾਰਕ ਕੀਤੀ ਸਾਫ ਨਜ਼ਰ ਆ ਰਹੀ ਸੀ ਤੇ ਉਸ ਦੀ ਪਿਛਲੀ ਸੀਟ ਉੱਤੇ ਲੱਗਿਆ ਖੂਨ ਵੀ ਸੱਭ ਨੂੰ ਨਜ਼ਰ ਆ ਰਿਹਾ ਸੀ।
ਪੈਰਾਮੈਡਿਕਸ ਵੱਲੋਂ ਪਹਿਲਾਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਜ਼ਖ਼ਮੀ ਵਿਅਕਤੀ ਨੂੰ ਨਾਜ਼ੁਕ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਉਸ ਦੇ ਜਿਊਂਦੇ ਬਚਣ ਦੀ ਪੂਰੀ ਸੰਭਾਵਨਾ ਹੈ। ਪੁਲਿਸ ਨੇ ਇਹ ਵੀ ਦੱਸਿਆ ਕਿ ਉਹ ਰਾਤ ਸਮੇਂ ਯੰਗ ਤੇ ਗੇਰਾਰਡ ਸਟਰੀਟਜ਼ ਉੱਤੇ ਹੋਈ ਲੜਾਈ ਸਬੰਧੀ ਮਿਲੀਆਂ ਰਿਪੋਰਟਾਂ ਦੀ ਜਾਂਚ ਵੀ ਕਰ ਰਹੀ ਹੈ। ਪਰ ਅਜੇ ਇਸ ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਸਕੀ ਕਿ ਇਹ ਮਾਮਲਾ ਉਸੇ ਲੜਾਈ ਨਾਲ ਜੁੜਿਆ ਹੈ। ਅਜੇ ਤੱਕ ਕਿਸੇ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਜਾ ਸਕਿਆ ਤੇ ਨਾ ਹੀ ਕਿਸੇ ਮਸ਼ਕੂਕ ਬਾਰੇ ਕੋਈ ਜਾਣਕਾਰੀ ਜਾਰੀ ਕੀਤੀ ਗਈ ਹੈ।