ਟੋਰਾਂਟੋ ਪੋਸਟ ਬਿਉਰੋ: ਬੀਤੇ ਵਿੱਚ ਭਾਰਤ ਖਾਸ ਕਰਕੇ ਪੰਜਾਬ ਤੋਂ ਆਏ ਅੰਤਰਰਾਸ਼ਟਰੀ ਵਿੱਦਿਆਰਥੀਆਂ ਨੂੰ ਲੈ ਕੇ ਲੜਾਈ ਝਗੜਿਆਂ ਦੀਆਂ ਖਬ਼ਰਾਂ ਕੈਨੇਡਾ ਵਿੱਚ ਅਕਸਰ ਵੱਡੇ ਪੱਧਰ ਉੱਤੇ ਚਰਚਾ ਦਾ ਵਿਸ਼ਾ ਬਣਦੀਆਂ ਰਹੀਆਂ ਹਨ। ਇਸ ਰੁਝਾਨ ਤੋਂ ਉਲਟ ਜਾਂਦਿਆਂ ਪੰਜਾਬ ਤੋਂ ਕੈਨੇਡਾ ਪੜਨ ਆਏ ਅਰਸ਼ ਵੋਹਰਾ ਨੇ ਵਿੱਦਿਆ ਵਿੱਚ ਚੰਗੀ ਪ੍ਰਾਪਤੀ ਕਰਕੇ ਅੰਤਰਰਾਸ਼ਟਰੀ ਵਿੱਦਿਆਰਥੀਆਂ ਦੇ ਅਕਸ ਨੂੰ ਵੱਖਰੀ ਰੰਗਤ ਦਿੱਤੀ ਹੈ।
ਪੰਜਾਬ ਦੇ ਫਿਰੋਜ਼ਪੁਰ ਜਿ਼ਲੇ ਵਿੱਚ ਪੈਂਦੇ ਇਤਿਹਾਸਕ ਕਸਬੇ ਗੁਰੂ ਹਰਸਹਾਏ ਨਾਲ ਸਬੰਧਿਤ ਅਰਸ਼ ਵੋਹਰਾ ਨੇ ਵਿੰਡਸਰ ਯੂਨੀਵਰਸਿਟੀ ਵਿੱਚ ਇੰਲੈਕਟ੍ਰੀਕਲ ਅਤੇ ਕੰਪਿਊਟਰ ਇੰਜੀਨੀਅਰਿੰਗ ਦੇ ਮਾਸਟਰ ਆਫ ਤਕਨਾਲੋਜੀ ਕੋਰਸ ਦੇ ਹਰ ਸੈਸ਼ਨ ਵਿੱਚ ਪ੍ਰੀਖਿਆਵਾਂ ਅਵੱਲ ਦਰਜ਼ੇ ਵਿੱਚ ਪਾਸ ਕੀਤੀਆਂ ਹਨ। ਅਜਿਹਾ ਕਰਨ ਨਾਲ ਉਹ ਯੂਨੀਵਰਸਿਟੀ ਵਿੱਚੋਂ ਕੋਰਸ ਨੂੰ ਉੱਚ ਅੰਕ ਪ੍ਰਾਪਤ ਕਰਨ ਵਾਲੇ ਚੋਟੀ ਦੇ 10 ਵਿੱਦਿਆਰਥੀਆਂ ਵਿੱਚ ਸ਼ਾਮਲ ਹੋਇਆ ਹੈ। ਇਸ ਪ੍ਰਾਪਤੀ ਲਈ ਅਰਸ਼ ਨੂੰ ਯੂਨੀਵਰਸਿਟੀ ਵਿੱਚ ਵਿਸ਼ੇਸ਼ ਰੂਪ ਵਿੱਚ ਸਨਮਾਨਤ ਕੀਤਾ ਗਿਆ।
ਅਰਸ਼ ਵੋਹਰਾ ਦੀ ਕਨਵੋਕੇਸ਼ਨ ਵਿੱਚ ਹਿੱਸਾ ਲੈਣ ਪੁੱਜੇ ਉਸਨੇ ਪਿਤਾ ਇੰਜੀਨੀਅਰ ਪਿੰਕਾ ਵੋਹਰਾ ਅਤੇ ਮਾਤਾ ਰਵਨੀਤ ਵੋਹਰਾ ਨੇ ਦੱਸਿਆ ਕਿ ਅਰਸ਼ ਮੁੱਢ ਤੋਂ ਹੀ ਇੱਕ ਸੰਜੀਦਾ ਸਖ਼ਸਿ਼ਅਤ ਵਾਲਾ ਬੱਚਾ ਰਿਹਾ ਹੈ ਜੋ ਆਪਣੇ ਕੰਮ ਅਤੇ ਪੜਾਈ ਨੂੰ ਖੁਦ ਕਰਨ ਵਿੱਚ ਯਕੀਨ ਰੱਖਦਾ ਹੈ। ਕੈਨੇਡਾ ਵਿੱਚ ਅਰਸ਼ ਦਾ ਮਾਰਗ ਦਰਸ਼ਨ ਕਰਨ ਵਾਲੇ ਗੁਰਪ੍ਰੀਤ ਸੋਢੀ ਨੇ ਕਿਹਾ ਕਿ ਅਰਸ਼ ਦੀ ਸਫ਼ਲਤਾ ਉਹਨਾਂ ਪੰਜਾਬੀ ਵਿੱਦਿਆਰਥੀਆਂ ਲਈ ਕੁੱਝ ਚੰਗਾ ਕਰਨ ਦਾ ਕਾਰਣ ਬਣ ਸਕਦੀ ਹੈ ਜੋ ਆਪਣੇ ਮਾਪਿਆਂ ਦੀ ਸਖ਼ਤ ਮਿਹਨਤ ਦੀ ਕਮਾਈ ਦੇ ਖਰਚੇ ਉੱਤੇ ਵਿਦੇਸ਼ਾਂ ਵਿੱਚ ਪੜਨ ਆਉਂਦੇ ਹਨ।