ਓਟਵਾ, 9 ਜੂਨ (ਪੋਸਟ ਬਿਊਰੋ) : ਐਨਬੀਏ ਦੇ ਫਾਈਨਲਜ਼ ਦੀ ਗੇਮ 5 ਦੌਰਾਨ ਸਿਰਫ ਦ ਟੋਰਾਂਟੋ ਰੈਪਟਰਜ਼ ਤੇ ਗੋਲਡਨ ਸਟੇਟ ਵਾਰੀਅਰਜ਼ ਹੀ ਨਹੀਂ ਹਨ ਜਿਹੜੇ ਸਕੋਰ ਬਣਾਉਣ ਦੀ ਕੋਸਿ਼ਸ਼ ਕਰਨਗੇ।
ਕੰਜ਼ਰਵੇਟਿਵ ਪਾਰਟੀ ਇਸ ਸਾਲ ਦੇ ਅੰਤ ਵਿੱਚ ਹੋਣ ਜਾ ਰਹੀਆਂ ਫੈਡਰਲ ਚੋਣਾਂ ਤੋਂ ਪਹਿਲਾਂ ਟੋਰੀ ਆਗੂ ਐਂਡਰਿਊ ਸ਼ੀਅਰ ਬਾਰੇ ਪ੍ਰਚਾਰ ਕਰਨ ਲਈ ਥਰਡ ਪਾਰਟੀ ਐਡਵੋਕੇਸੀ ਗਰੁੱਪ “ਐਂਗੇਜ ਕੈਨੇਡਾ” ਨਾਲ ਮੁਕਾਬਲਾ ਕਰੇਗੀ। ਬਾਸਕਿਟਬਾਲ ਦੇ ਮੈਚਾਂ ਦੌਰਾਨ ਕੰਜ਼ਰਵੇਟਿਵ ਪਾਰਟੀ ਵੱਲੋਂ ਟੀਵੀ ਉੱਤੇ ਜੰਮ ਕੇ ਇਸ਼ਤਿਹਾਰਬਾਜ਼ੀ ਕੀਤੀ ਜਾਂਦੀ ਰਹੀ ਹੈ। ਸ਼ੀਅਰ ਨੂੰ ਮੱਧਵਰਗ ਦੇ ਪਰਿਵਾਰ ਦੇ ਸਾਧਾਰਨ ਜਿਹੇ ਲੜਕੇ ਵਜੋਂ ਪੇਸ਼ ਕੀਤਾ ਜਾ ਰਿਹਾ ਹੈ ਜੋ ਕਿ ਕਾਰਬਨ ਟੈਕਸ ਨੂੰ ਮਨਸੂਖ ਕਰੇਗਾ ਤੇ ਆਮ ਲੋਕਾਂ ਲਈ ਜਿੰ਼ਦਗੀ ਨੂੰ ਹੋਰ ਸੁਖਾਲਾ ਤੇ ਕਿਫਾਇਤੀ ਬਣਾਉਣ ਵਿੱਚ ਮਦਦ ਕਰੇਗਾ।
ਪਰ ਸੋਮਵਾਰ ਨੂੰ ਐਂਗੇਜ ਕੈਨੇਡਾ ਵੱਲੋਂ ਸ਼ੀਅਰ ਦੀ ਵੱਖਰੀ ਹੀ ਤਸਵੀਰ ਕੈਨੇਡੀਅਨਾਂ ਸਾਹਮਣੇ ਲਿਆਂਦੇ ਜਾਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਸ਼ੀਅਰ ਨੂੰ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੀ ਹਾਂ ਵਿੱਚ ਹਾਂ ਮਿਲਾਉਣ ਵਾਲੇ ਆਗੂ ਵਜੋਂ ਪੇਸ਼ ਕੀਤਾ ਜਾਵੇਗਾ। ਐਂਗੇਜ ਕੈਨੇਡਾ ਖੁਦ ਨੂੰ ਪੱਖਪਾਤ ਰਹਿਤ ਤੀਜੀ ਧਿਰ ਦੱਸਦੀ ਹੈ। ਸਾਬਕਾ ਲਿਬਰਲ ਤੇ ਐਨਡੀਪੀ ਸਟਰੈਟੇਜਿਸਟਸ ਵੱਲੋਂ ਇਸ ਗਰੁੱਪ ਨੂੰ ਕਾਇਮ ਕੀਤਾ ਗਿਆ ਸੀ। ਇਸ ਵਿੱਚ ਅਜਿਹੇ ਵਿਅਕਤੀ, ਲੇਬਰ ਸੰਸਥਾਵਾਂ ਤੇ ਪ੍ਰੋਫੈਸ਼ਨਲ ਐਸੋਸਿਏਸ਼ਨਜ਼ ਸ਼ਾਮਲ ਹਲ ਜਿਨ੍ਹਾਂ ਦਾ ਇੱਕ ਸਾਂਝਾ ਟੀਚਾ ਇਹ ਤੈਅ ਕਰਨਾ ਹੈ ਕਿ ਸ਼ੀਅਰ ਕਦੇ ਪ੍ਰਧਾਨ ਮੰਤਰੀ ਨਾ ਬਣ ਸਕਣ। ਇਹ ਗਰੁੱਪ 2015 ਵਿੱਚ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੇ ਖਿਲਾਫ ਵੀ ਇਸੇ ਤਰ੍ਹਾਂ ਹੀ ਸਰਗਰਮ ਸੀ।
ਐਂਗੇਜ ਦੀ ਤਰਜ਼ਮਾਨ ਟੈਬੀਥਾ ਬਰਨਾਰਡ ਨੇ ਇਹ ਦੱਸਣ ਤੋਂ ਇਨਕਾਰ ਕਰ ਦਿੱਤਾ ਕਿ ਇਸ ਗਰੁੱਪ ਵੱਲੋਂ ਅਜਿਹੀ ਇਸ਼ਤਿਹਾਰਬਾਜ਼ੀ ਲਈ ਗੇਮ 5 ਦੀ ਐਡ ਕੈਂਪੇਨ ਵਾਸਤੇ ਕਿੰਨਾਂ ਪੈਸਾ ਲਾਇਆ ਜਾ ਰਿਹਾ ਹੈ। ਐਨਬੀਏ ਦੇ ਫਾਈਨਲਜ਼ ਵਿੱਚ ਚੱਲਣ ਵਾਲੇ ਇਸ਼ਤਿਹਾਰ ਸੱਭ ਤੋਂ ਮਹਿੰਗੇ ਮੰਨੇ ਜਾਂਦੇ ਹਨ। ਇਹ ਇਸ਼ਤਿਹਾਰ 10 ਮਿਲੀਅਨ ਜਾਂ ਇਸ ਤੋਂ ਵੀ ਵੱਧ ਕੈਨੇਡੀਅਨਾਂ ਤੱਕ ਪਹੁੰਚਦੇ ਹਨ। ਬਰਨਾਰਡ ਨੇ ਇਸ ਗੱਲ ਦੀ ਪੁਸ਼ਟੀ ਵੀ ਕੀਤੀ ਕਿ ਕੈਨੇਡਾ ਦੀ ਸੱਭ ਤੋਂ ਵੱਡੀ ਮੀਡੀਆ ਯੂਨੀਅਨ ਯੂਨੀਫੌਰ ਵੀ ਐਂਗੇਜ ਨਾਲ ਸ਼ਾਮਲ ਹੈ ਪਰ ਉਸ ਦੀ ਕਿੰਨੀ ਭੂਮਿਕਾ ਹੈ ਇਹ ਦੱਸਣ ਤੋਂ ਉਨ੍ਹਾਂ ਇਨਕਾਰ ਕਰ ਦਿੱਤਾ।