ਦਮਦਾਰ ਅਭਿਨੈ ਲਈ ਜਾਣੀ ਜਾਂਦੀ ਟਿਸਕਾ ਚੋਪੜਾ ਨੇ ਪਿੱਛੇ ਜਿਹੇ ਖੁਲਾਸਾ ਕੀਤਾ ਹੈ ਕਿ ਕਾਲਜ ਦੇ ਦਿਨਾਂ ਵਿੱਚ ਉਹ ਮਨਚਲਿਆਂ ਨਾਲ ਕਿਵੇਂ ਨਿਪਟਦੀ ਸੀ। ਟਿਸਕਾ ਦੀਆਂ ਗੱਲਾਂ ਤੋਂ ਪਤਾ ਲੱਗਦਾ ਹੈ ਕਿ ਉਹ ਨਿੱਜੀ ਜ਼ਿੰਦਗੀ ਵਿੱਚ ਵੀ ਨਿਡਰ ਹੈ। ਉਸ ਨੇ ਦੱਸਿਆ ਕਿ ਜਦੋਂ ਉਹ ਅਭਿਨੇਤਰੀ ਨਹੀਂ ਬਣੀ ਸੀ ਤਾਂ ਦਿੱਲੀ ਦੀਆਂ ਬਸਾਂ ਵਿੱਚ ਸਫਰ ਦੌਰਾਨ ਉਹ ਮਨਚਲਿਆਂ ਨਾਲ ਕਿਵੇਂ ਨਿਪਟਦੀ ਸੀ। ਜਦੋਂ ਇੱਕ ਇੰਟਰਵਿਊ ਵਿੱਚ ਉਸ ਤੋਂ ਪੁੱਛਿਆ ਗਿਆ ਕਿ ਕੀ ਉਹ ਦਿੱਲੀ ਨੂੰ ਮਿਸ ਕਰਦੀ ਹੈ ਤਾਂ ਉਸ ਨੇ ਕਿਹਾ, ‘ਦਿੱਲੀ ਦੀਆਂ ਸੜਕਾਂ, ਗੋਲ ਚੱਕਰ, ਖਾਣਾ-ਪੀਣਾ, ਹਰਿਆਲੀ ਤੇ ਸਰਦੀ ਮੈਨੂੰ ਬਹੁਤ ਪਸੰਦ ਹੈ। ਮੁੰਬਈ ਵਿੱਚ ਇਹ ਸਭ ਮਿਸ ਕਰਦੀ ਹਾਂ। ਠੰਢ 'ਚ ਸਵੇਰੇ ਸਵੇਰੇ ਸਾਢੇ ਸੱਤ ਵਜੇ ਬਸਾਂ 'ਚ ਲਟਕਦੇ ਹੋਏ ਦਿੱਲੀ ਯੂਨੀਵਰਸਿਟੀ ਪਹੁੰਚਦੇ ਸੀ। ਨੋਇਡਾ ਤੋਂ 363 ਨੰਬਰ ਬਸ ਜਾਂਦੀ ਸੀ। ਯੂਨੀਵਰਸਿਟੀ ਤੱਕ ਖਚਾਖਚਾ ਭਰੀ ਬਸ ਵਿੱਚ ਸਫਰ ਕਰਨਾ ਪੈਂਦਾ ਸੀ।’ ਉਸ ਨੇ ਇਹ ਵੀ ਦੱਸਿਆ ਕਿ ਦਿੱਲੀ ਦੀਆਂ ਇਨ੍ਹਾਂ ਬਸਾਂ ਵਿੱਚ ਬਹੁਤ ਛੇੜਛਾੜ ਹੁੰਦੀ ਸੀ, ‘ਮੈਂ ਸੇਫਟੀ ਪਿੰਨ ਆਪਣੇ ਨਾਲ ਰੱਖਦੀ ਸੀ ਤੇ ਛੇੜਛਾੜ ਕਰਨ ਵਾਲਿਆਂ ਨੂੰ ਚੋਭ ਦਿੰਦੀ ਸੀ।’ ਟਿਸਕਾ ਨੇ ਸਲਾਹ ਦਿੰਦੇ ਹੋਏ ਕਿਹਾ ਕਿ ਕੁੜੀਆਂ ਲਈ ਇਹੋ ਸਲਾਹ ਹੈ ਕਿ ਸਿੱਧਾ ਥੱਪੜ ਮਾਰੋ।
ਲਗਭਗ 45 ਫਿਲਮਾਂ ਵਿੱਚ ਕੰਮ ਕਰ ਚੁੱਕੀ ਟਿਸਕਾ ਲੇਖਿਕਾ ਅਤੇ ਪ੍ਰੋਡਿਊਸਰ ਤਾਂ ਹੈ ਹੀ, ਫਿਲਮ ਡਾਇਰੈਕਟਰ ਵੀ ਬਣਨ ਵਾਲੀ ਹੈ। ਉਹ ਛੋਟੇ ਪਰਦੇ ਦੇ ਸ਼ੋਅ ‘ਸਾਵਧਾਨ ਇੰਡੀਆ’ ਦੀ ਹੋਸਟ ਹੈ ਅਤੇ ਕਈ ਵੈਬ ਸੀਰੀਜ਼ ਵਿੱਚ ਵੀ ਕੰਮ ਕਰ ਚੁੱਕੀ ਹੈ। ਟਿਸਕਾ ਨੇ ਇਹ ਵੀ ਦੱਸਿਆ ਕਿ ਉਸ ਨੇ ਸਕੂਲ ਵਿੱਚ ਇੱਕ ਛੋਟੇ ਜਿਹੇ ਪਲੇਅ ਵਿੱਚ ਰੋਲ ਕੀਤਾ ਸੀ, ਜਿਸ ਤੋਂ ਬਾਅਦ ਉਸ ਦਾ ਮਨ ਇਸੇ ਵਿੱਚ ਅਟਕ ਗਿਆ। ਉਸ ਨੂੰ ਪਤਾ ਲੱਗ ਗਿਆ ਕਿ ਉਸ ਨੇ ਇਥੇ ਆਉਣਾ ਹੈ। ਉਸ ਨੇ ਸਕੂਲ ਅਤੇ ਕਾਲਜ ਸਾਰੀਆਂ ਥਾਵਾਂ ਦੇ ਪਲੇਅ 'ਚ ਹਿੱਸਾ ਲਿਆ।