ਇਨ੍ਹੀਂ ਦਿਨੀਂ ਵੈੱਬ ਸੀਰੀਜ਼ ‘ਬਦਨਾਮ ਗਲੀ’ ਵਿੱਚ ਨਜ਼ਰ ਆ ਰਹੀ ਪੱਤਰਲੇਖਾ ਦਾ ਕਹਿਣਾ ਹੈ ਕਿ ਕਰੀਅਰ ਦੇ ਨੀਰਸ ਦੌਰ ਨੇ ਉਸ ਨੂੰ ਕਿਸੇ ਦੀ ਦਯਾ 'ਤੇ ਨਾ ਜਿਊਣ ਅਤੇ ਸਿਰਫ ਉਨ੍ਹਾਂ ਫਿਲਮਾਂ ਨੂੰ ਸਾਈਨ ਕਰਨ ਦੀ ਸਿਖਿਆ ਦਿੱਤੀ ਹੈ, ਜਿਸ 'ਤੇ ਉਸ ਨੂੰ ਖੁਦ ਭਰੋਸਾ ਹੋਵੇ। ਉਸ ਨੇ ਕਿਹਾ, ‘‘ਮੈਂ ਆਪਣੇ ਕਰੀਅਰ ਦੇ ਮੁਸ਼ਕਲ ਦੌਰ ਵਿੱਚ ਸਭ ਤੋਂ ਅਹਿਮ ਜਿਹੜੇ ਸਬਕ ਸਿੱਖੇ, ਉਨ੍ਹਾਂ 'ਚੋਂ ਇੱਕ ਹੈ ਕਿ ਜਦੋਂ ਤੱਕ ਮੈਨੂੰ ਤਸੱਲੀ ਨਾ ਹੋ ਜਾਵੇ, ਮੈਂ ਕਿਸੇ ਰੋਲ ਨੂੰ ਨਹੀਂ ਕਰਾਂਗੀ। ਜੇ ਕਿਸੇ ਰੋਲ 'ਤੇ ਮੈਨੂੰ ਪੂਰੀ ਤਰ੍ਹਾਂ ਭਰੋਸਾ ਹੋਵੇਗਾ ਤਾਂ ਮੇਰੇ ਕੰਮ ਵਿੱਚ ਨਜ਼ਰ ਆਏਗਾ।” ਉਸ ਨੇ ਕਿਹਾ,‘‘ਅੱਜ ਕੱਲ੍ਹ ਲੋਕਾਂ ਦੀਆਂ ਬੇਤੁਕੀਆਂ ਗੱਲਾਂ ਨੂੰ ਸਹਿਣਾ ਬੰਦ ਕਰ ਦਿੱਤਾ ਹੈ, ਕਿਉਂਕਿ ਅਸੀਂ ਐਕਟਰ ਇਥੇ ਆਪਣੀ ਮਰਜ਼ੀ ਨਾਲ ਹਾਂ ਅਤੇ ਅਸੀਂ ਕਿਸੇ ਦੀ ਦਯਾ 'ਤੇ ਨਿਰਭਰ ਨਹੀਂ ਹਾਂ।”
ਪਿੱਛੇ ਜਿਹੇ ਰਿਲੀਜ਼ ਹੋਈ ਵੈਬ ਫਿਲਮ ‘ਬਦਨਾਮ ਗਲੀ’ ਵਿੱਚ ਉਸ ਨੇ ਨੌਜਵਾਨ ਸਰੋਗੇਟ ਮਾਂ ਦਾ ਰੋਲ ਕੀਤਾ ਹੈ। ਇਸ ਰੋਲ ਬਾਰੇ ਉਸ ਨੇ ਦੱਸਿਆ, ‘‘ਅਸੀਂ ਗਰਮੀਆਂ 'ਚ ਸ਼ੂਟਿੰਗ ਕੀਤੀ ਸੀ, ਜਦੋਂ ਤਾਪਮਾਨ 42 ਡਿਗਰੀ ਦੇ ਨੇੜੇ ਸੀ। ਮੈਨੂੰ ਉਸ ਗਰਮੀ ਵਿੱਚ ਪ੍ਰੋਸਥੈਟਿਕ ਪੇਟ ਲਾ ਕੇ ਐਕਟਿੰਗ ਕਰਨੀ ਪਈ, ਜੋ ਬਹੁਤ ਮੁਸ਼ਕਲ ਸੀ। ਬੁਰੀ ਤਰ੍ਹਾਂ ਪਸੀਨਾ ਆ ਰਿਹਾ ਸੀ ਅਤੇ ਮੈਂ ਜਲਦੀ ਥੱਕ ਜਾਂਦੀ ਸੀ, ਪਰ ਆਖਰੀ ਨਤੀਜੇ ਦੇਖਣ 'ਤੇ ਸਾਰੀ ਮਿਹਨਤ ਵਸੂਲ ਹੋ ਗਈ।” ਉਸ ਦਾ ਕਹਿਣਾ ਹੈ ਕਿ ਇਹ ਦੇਖਣਾ ਬਹੁਤ ਚੰਗਾ ਲੱਗਦਾ ਹੈ ਕਿ ਦਰਸ਼ਕ ਹਰ ਤਰ੍ਹਾਂ ਦੀਆਂ ਚੰਗੀਆਂ ਕਹਾਣੀਆਂ ਨੂੰ ਸਵੀਕਾਰ ਕਰ ਰਹੇ ਹਨ। ਇਸ ਵਜ੍ਹਾ ਨਾਲ ਐਕਟਰਸ ਨੂੰ ਚੰਗੀਆਂ ਕਹਾਣੀਆਂ 'ਤੇ ਕੰਮ ਕਰਨ ਦਾ ਮੌਕਾ ਮਿਲ ਰਿਹਾ ਹੈ। ਉਸ ਨੇ ਕਿਹਾ, ‘‘ਮੈਂ ਹਮੇਸ਼ਾ ਆਪਣੀਆਂ ਫਿਲਮਾਂ ਨੂੰ ਇੱਕ ਦਰਸ਼ਕ ਦੀ ਨਜ਼ਰ ਨਾਲ ਦੇਖ ਕੇ ਹੀ ਚੁਣਦੀ ਹਾਂ ਕਿਉਂਕਿ ਆਪਣੀ ਫਿਲਮ ਦੀ ਪਹਿਲੀ ਦਰਸ਼ਕ ਮੈਂ ਖੁਦ ਹੁੰਦੀ ਹਾਂ।”