ਫਿਲਮ ‘ਸਿੰਘ ਸਾਹਿਬ ਦਿ ਗ੍ਰੇਟ’ ਨਾਲ ਆਪਣੇ ਫਿਲਮੀ ਕਰੀਅਰ ਦਾ ਆਗਾਜ਼ ਕਰਨ ਵਾਲੀ ਉਰਵਸ਼ੀ ਰੌਤੇਲਾ ਇਸ ਤੋਂ ਬਾਅਦ ਟੀ ਸੀਰੀਜ਼ ਦੀ ਲਵ ਟੈ੍ਰਂਗਲ 'ਤੇ ਆਧਾਰਤ ਫਿਲਮ ‘ਸਨਮ ਰੇ’ ਵਿੱਚ ਨਜ਼ਰ ਆਈ ਸੀ। ਫਿਰ ਇੰਦਰ ਕੁਮਾਰ ਦੀ ਫਿਲਮ ‘ਗ੍ਰੇਟ ਗ੍ਰੈਂਡ ਮਸਤੀ' ਵਿੱਚ ਖੂਬਸੂਰਤ ਚੁੜੇਲ ਦੀ ਭੂਮਿਕਾ ਨਾਲ ਸੁਰਖੀਆਂ 'ਚ ਰਹੀ। ਰਿਤਿਕ ਰੋਸ਼ਨ-ਯਾਮੀ ਗੌਤਮ ਦੀ ਲੀਡ ਭੂਮਿਕਾਵਾਂ ਨਾਲ ਸਜੀ ਫਿਲਮ ‘ਕਾਬਿਲ’ ਵਿੱਚ ਆਈਟਮ ਨੰਬਰ ਤੋਂ ਬਾਅਦ ਉਸ ਨੇ ਬੋਲਡ ਕਹਾਣੀਆਂ 'ਤੇ ਆਧਾਰਤ ਸੀਰੀਜ਼ ‘ਹੇਟ ਸਟੋਰੀ’ ਦੀ ਚੌਥੀ ਫਿਲਮ ਵਿੱਚ ਆਪਣੀ ਬੋਲਡਨੈੱਸ ਨਾਲ ਸਾਰਿਆਂ ਨੂੰ ਹੈਰਾਨ ਕੀਤਾ ਅਤੇ ਇਨ੍ਹੀਂ ਦਿਨੀਂ ਉਹ ਜਾਨ ਆਬਰਾਹਮ ਦੇ ਆਪੋਜ਼ਿਟ ਫਿਲਮ ‘ਪਾਗਲਪੰਤੀ’ ਨੂੰ ਲੈ ਕੇ ਸੁਰਖੀਆਂ ਵਿੱਚ ਹੈ। ਇਸ ਤੋਂ ਇਲਾਵਾ ਫਿਲਮ ‘ਵਰਜਿਨ ਭਾਨੂਮਤੀ’ ਵੀ ਉਸ ਕੋਲ ਹੈ। ਕਈ ਲੋਕਾਂ ਨੂੰ ਲੱਗਦਾ ਹੈ ਕਿ ਅੱਜ ਤੱਕ ਉਸ ਦਾ ਕਰੀਅਰ ਬਹੁਤ ਹੌਲੀ ਅੱਗੇ ਵਧਿਆ ਤੇ ਉਸ ਨੂੰ ਉਹ ਸਫਲਤਾ ਨਹੀਂ ਮਿਲੀ, ਜੋ ਉਸ ਦੇ ਨਾਲ ਦੀਆਂ ਹੀਰੋਇਨਾਂ ਨੂੰ ਮਿਲੀ ਹੈ, ਪਰ ਉਰਵਸ਼ੀ ਇਸ ਨਾਲ ਸਹਿਮਤ ਨਹੀਂ ਤੇ ਉਸ ਨੂੰ ਆਪਣੇ ਕਰੀਅਰ ਦੀ ਮੱਧਮ ਰਫਤਾਰ ਨਾਲ ਵੀ ਕੋਈ ਦਿੱਕਤ ਨਹੀਂ।
ਉਹ ਕਹਿੰਦੀ ਹੈ, ‘‘ਮੈਂ ਜਾਣਦੀ ਹਾਂ ਕਿ ਮੈਂ ਕੱਛੂਕੁੰਮੇ ਦੀ ਚਾਲ ਚੱਲ ਰਹੀ ਹਾਂ, ਮੈਨੂੰ ਇਕਦਮ ਚੋਟੀ 'ਤੇ ਪਹੁੰਚਣ ਦੀ ਜਲਦੀ ਨਹੀਂ। ਮੈਂ ਫਿਲਮਾਂ ਵਿੱਚ ਅਭਿਨੈ ਕਰਨ ਦੇ ਨਾਲ ਬ੍ਰਾਂਡ ਐਂਡੋਰਸਮੈਂਟਸ ਤੋਂ ਲੈ ਕੇ ਮਾਡਲਿੰਗ ਵਿੱਚ ਵੀ ਹਿੱਸਾ ਲੈ ਰਹੀ ਹਾਂ। ਜੇ ਮੇਰੀ ਪਹਿਲੀ ਫਿਲਮ ‘ਸਿੰਘ ਸਾਹਿਬ ਦਿ ਗ੍ਰੇਟ’ ਬਾਕਸ ਆਇਫਸ 'ਤੇ ਹਿੱਟ ਹੋ ਜਾਂਦੀ ਤਾਂ ਸ਼ਾਇਦ ਮੇਰਾ ਕਰੀਅਰ ਕਿਸੇ ਹੋਰ ਮੋੜ 'ਤੇ ਹੁੰਦਾ। ਇਥੇ ਸਭ ਕੁਝ ਫਿਲਮ ਦੀ ਸਫਲਤਾ 'ਤੇ ਨਿਰਭਰ ਕਰਦਾ ਹੈ।” ਫਿਰ ਵੀ ਉਸ ਨੂੰ ਆਸ ਹੈ ਕਿ ਉਸ ਦੀਆਂ ਅਗਲੀਆਂ ਫਿਲਮਾਂ ਖਾਸ ਕਰ ਕੇ ਜਾਨ ਨਾਲ ‘ਪਾਗਲਪੰਤੀ' ਦੀ ਰਿਲੀਜ਼ ਤੋਂ ਬਾਅਦ ਉਸ ਦਾ ਕਰੀਅਰ ਰਫਤਾਰ ਫੜ ਲਵੇਗਾ। ਉਹ ਕਹਿੰਦੀ ਹੈ, ‘‘ਬਾਲੀਵੁੱਡ 'ਚ ਬਿਨਾਂ ਗਾਡਫਾਦਰ ਦੇ ਇੰਨੀ ਸਫਲਤਾ ਮਿਲਣਾ ਜਾਂ ਫਿਲਮਾਂ ਦੇ ਆਫਰ ਮਿਲਣਾ ਵੀ ਆਪਣੇ ਆਪ ਵਿੱਚ ਬਹੁਤ ਵੱਡੀ ਪ੍ਰਾਪਤੀ ਹੈ, ਪਰ ਉਮੀਦ ਹੈ ਕਿ ਮੇਰੇ ਕਰੀਅਰ ਨੂੰ ਗਤੀ ਮਿਲੇਗੀ। ਅੱਜ ਤੱਕ ਦੇ ਕਰੀਅਰ ਤੋਂ ਮੈਂ ਸਿਖਿਆ ਹੈ ਕਿ ਅੱਗੇ ਵਧਣ ਲਈ ਤੁਹਾਡੇ ਅੰਦਰ ਕਮਿਟਮੈਂਟ, ਪੈਸ਼ਨ ਅਤੇ ਸਖਤ ਮਿਹਨਤ ਕਰਨ ਦਾ ਇਰਾਦਾ ਹੋਣਾ ਚਾਹੀਦਾ ਹੈ, ਤਾਂ ਹੀ ਅਸੀਂ ਪੂਰੀ ਦੁਨੀਆ ਨੂੰ ਜਿੱਤ ਸਕਦੇ ਹਾਂ।”