ਪੰਜਾਬੀ ਪੋਸਟ ਸੰਪਾਦਕੀ

ਦੋ ਦਿਨ ਪਹਿਲਾਂ ਕੈਨੇਡਾ ਦੀ ਫੈਡਰਲ ਕੰਜ਼ਰਵੇਟਿਵ ਪਾਰਟੀ ਨੇਤਾ ਐਂਡਰੀਊ ਸ਼ੀਅਰ ਇੰਮੀਗਰੇਸ਼ਨ ਬਾਬਤ ਆਪਣੀਆਂ ਪਹਿਲਤਾਵਾਂ ਬਾਰੇ ਚਰਚਾ ਛੇੜਨ ਦੇ ਇਰਾਦੇ ਨਾਲ ਗਰੇਟਰ ਟੋਰਾਂਟੋ ਏਰੀਆ ਵਿੱਚ ਆਏ। ਉਹਨਾਂ ਵੱਲੋਂ ਕੀਤੇ ਗਏ ਐਲਾਨ ਵਿੱਚ ਅਮਰੀਕਾ ਦੇ ਬਾਰਡਰ ਰਾਹੀਂ ਆਉਣ ਵਾਲੇ ਸ਼ਰਣਾਰਥੀਆਂ ਦੇ ਦਾਖਲੇ ਉੱਤੇ ਮੁਕੰਮਲ ਰੋਕ, ਇੰਮੀਗਰੇਸ਼ਨ ਸਿਸਟਮ ਨੂੰ ਸਟੀਫਨ ਹਾਰਪਰ ਸਰਕਾਰ ਦੇ ਕਦਮਾਂ ਉੱਤੇ ਚੱਲਦੇ ਹੋਏ ਚੁਸਤ ਦਰੁਸਤ ਬਣਾਉਣ, ਇੰਮੀਗਰਾਂਟਾਂ ਦੀ ਮਿਹਨਤ ਤੋਂ ਕੈਨੇਡਾ ਦੀ ਆਰਥਕਤਾ ਲਈ ਲਾਭ ਲੈਣ ਵਰਗੇ ਮੁੱਦੇ ਸ਼ਾਮਲ ਸਨ। ਕਿਉਂਕਿ ਇੰਮੀਗਰੇਸ਼ਨ ਬਾਰੇ ਫੈਡਰਲ ਪਾਰਟੀਆਂ ਦੀ ਪਹੁੰਚ ਨੂੰ ਧਿਆਨ ਨਾਲ ਵਾਚਿਆ ਜਾਂਦਾ ਹੈ, ਇਸ ਕਾਰਣ ਐਂਡਰੀਊ ਸ਼ੀਅਰ ਦੇ ਬਿਆਨ ਤੋਂ ਬਾਅਦ ਉੱਠੇ ਸੁਆਲਾਂ ਬਾਰੇ ਚਰਚਾ ਕਰਨੀ ਬਣਦੀ ਹੈ।

ਇਸ ਸਾਲ ਅਕਤੂਬਰ ਵਿੱਚ ਹੋਣ ਜਾ ਰਹੀਆਂ ਚੋਣਾਂ ਵਿੱਚ ਕੰਜ਼ਰਵੇਟਿਵ ਪਾਰਟੀ ਸਰਕਾਰ ਬਣਾਉਣ ਦੀਆਂ ਤਿਆਰੀਆਂ ਨਾਲ ਮੈਦਾਨ ਵਿੱਚ ਕੁੱਦ ਰਹੀ ਹੈ। ਸਰਕਾਰ ਬਣਾਉਣ ਦੀ ਤਮੰਨਾ ਰੱਖਣ ਵਾਲੀ ਪਾਰਟੀ ਦੀ ਇੰਮੀਗਰੇਸ਼ਨ ਬਾਰੇ ਯੋਜਨਾ ਹਮੇਸ਼ਾ ਹੀ ਬਹੁਤ ਮਾਅਨੇ ਰੱਖਦੀ ਹੁੰਦੀ ਹੈ। ਅਫਸੋਸ ਕਿ ਟੋਰੀ ਲੀਡਰ ਐਂਡਰੀਊ ਸ਼ੀਅਰ ਨੇ ਹਾਲੇ ਤੱਕ ਕੋਈ ਠੋਸ ਅੰਕੜੇ ਜਾਰੀ ਨਹੀਂ ਕੀਤੇ ਜਿਸ ਤੋਂ ਪਤਾ ਲੱਗੇ ਕਿ ਜੇ ਉਸਨੂੰ ਸਰਕਾਰ ਬਣਾਉਣ ਦਾ ਅਵਸਰ ਹਾਸਲ ਹੁੰਦਾ ਹੈ ਤਾਂ ਕੈਨੇਡਾ ਬੁਲਾਏ ਜਾਣ ਵਾਲੇ ਪਰਵਾਸੀਆਂ ਦੀ ਗਿਣਤੀ ਵਿੱਚ ਕਿੰਨਾ ਇਜਾਫਾ ਜਾਂ ਕਟੌਤੀ ਕੀਤੀ ਜਾਵੇਗੀ? ਕਿਸ ਵਰਗ ਦੇ ਪਰਵਾਸੀਆਂ ਅਤੇ ਰਿਫਿਊਜੀਆਂ ਨੂੰ ਕੈਨੇਡਾ ਵਿੱਚ ਕਿੰਨੀ ਗਿਣਤੀ ਵਿੱਚ ਸਵੀਕਾਰ ਕੀਤਾ ਜਾਵੇਗਾ। ਕੀ ਅੰਤਰਰਾਸਟਰੀ ਵਿੱਦਿਆਰਥੀਆਂ ਦੀ ਗਿਣਤੀ ਵਧਾਈ ਜਾਵੇਗੀ ਜਾਂ ਘੱਟ ਕੀਤੀ ਜਵੇਗੀ ਅਤੇ ਜੇ ਹਾਂ ਤਾਂ ਕਿੰਨੀ? ਕਿੰਨੇ ਮਾਪਿਆਂ ਨੂੰ ਸੁਪਰ ਵੀਜ਼ਾ ਦਿੱਤੇ ਜਾਣਗੇ? ਕੀ ਮਾਪਿਆਂ ਨੂੰ ਸਪਾਂਸਰ ਕਰਨ ਉੱਤੇ ਲੱਗੀਆਂ ਪਾਬੰਦੀਆਂ ਨੂੰ ਨਰਮ ਕੀਤਾ ਜਾਵੇਗਾ, ਜੇ ਹਾਂ ਤਾਂ ਕਿਸ ਅੰਦਾਜ਼ ਵਿੱਚ? ਇਹੋ ਜਿਹੇ ਅਨੇਕਾਂ ਸੁਆਲ ਹਨ ਜਿਹਨਾਂ ਦਾ ਜਵਾਬ ਦੇਣ ਤੋ ਬਾਅਦ ਹੀ ਕੰਜ਼ਰਵੇਟਿਵ ਇੰਮੀਗਰੇਸ਼ਨ ਪਾਰਟੀ ਦੀ ਸਾਰਥਕਤਾ ਬਾਰੇ ਕਿਆਸ ਕੀਤਾ ਜਾ ਸਕਦਾ ਹੈ।

ਇੰਮੀਗਰੇਸ਼ਨ ਪਾਲਸੀ ਵਿੱਚ ਮੌਜੂਦ ਭੰਬਲਭੂਸੇ ਬਾਰੇ ਦੋ ਵਿਸ਼ੇਸ਼ ਮਿਸਾਲਾਂ ਦੇਣੀਆਂ ਬਣਦੀਆਂ ਹਨ। ਪਹਿਲਾ ਐਂਡਰੀਊ ਸ਼ੀਅਰ ਦਾ ਅਮਰੀਕਾ ਦੇ ਬਾਰਡਰ ਰਾਹੀਂ ਆਉਣ ਵਾਲੇ ਰਿਫਿਊਜੀ ਕਲੇਮੈਂਟਾਂ ਦੇ ਦਾਖਲੇ ਨੂੰ ਰੋਕਣ ਦਾ ਦਾਅਵਾ। ਪਰ ਇਹ ਨਹੀਂ ਦੱਸ ਰਹੇ ਕਿ ਇਹ ਰੋਕ ਕਿਵੇਂ ਲਾਈ ਜਾਵੇਗੀ? ਕੈਨੇਡਾ ਅਤੇ ਅਮਰੀਕਾ ਦਰਮਿਆਨ ਵਿਸ਼ਵ ਦਾ ਸੱਭ ਤੋਂ ਵੱਡਾ 8891 ਕਿਲੋਮੀਟਰ ਲੰਬਾ ਬਾਰਡਰ ਹੈ। ਐਨੇ ਵੱਡੇ ਬਾਰਡਰ ਦੀ ਰੱਖਿਆ ਕਿਵੇਂ ਕੀਤੀ ਜਾਵੇਗੀ? ਜੇ ਉਹਨਾਂ ਦਾ ਇਰਾਦਾ ‘ਸੇਫ ਥਰਡ ਕੰਟਰੀ ਐਗਰੀਮੈਂਟ’ ਨੂੰ ਬਦਲ ਕੇ ਰਿਫਿਊਜੀ ਕਲੇਮੈਂਟਾਂ ਬਾਰੇ ਸਥਿਤੀ ਬਦਲਣ ਦਾ ਹੈ ਤਾਂ ਉਸ ਐਗਰੀਮੈਂਟ ਵਿੱਚ ਕਿਹੋ ਜਿਹੀਆਂ ਤਬਦੀਲੀਆਂ ਕੀਤੀਆਂ ਜਾਣਗੀਆਂ?

ਇਵੇਂ ਹੀ ਮਸਲਾ ਧੋਖੇਬਾਜ਼ ਇੰਮੀਗਰੇਸ਼ਨ ਸਲਾਹਕਾਰਾਂ ਨੂੰ ਨੱਥ ਪਾਉਣ ਦਾ ਹੈ। ਲਿਬਰਲਾਂ ਨੇ ਇਸ ਸਾਲ ਦੇ ਬੱਜਟ ਨੂੰ ਪਾਸ ਕਰਨ ਵਾਲੇ ਬਿੱਲ ਵਿੱਚ ਕਾਨੂੰਨ ਸ਼ਾਮਲ ਕੀਤਾ ਹੈ ਜਿਸ ਮੁਤਾਬਕ ਇੰਮੀਗਰੇਸ਼ਨ ਸਲਾਹਕਾਰਾਂ ਦੇ ਕੰਮਕਾਜ ਦੀ ਨਿਗਰਾਨੀ ਕਰਨ ਲਈ ਇੱਕ ਰੈਗੁਲੇਟੋਰੀ ਕਾਲਜ ਕਾਇਮ ਜਾ ਰਿਹਾ ਹੈ। ਕੰਜ਼ਰਵੇਟਿਵ ਪਾਰਟੀ ਦੀ ਇੰਮੀਗਰੇਸ਼ਨ ਆਲੋਚਕ ਮਿਸ਼ੇਲ ਰੈਂਮਪਲ ਨੇ ਇਸ ਉੱਦਮ ਨੂੰ ਬਹੁਤ ਹੀ ਨਿਗੂਣਾ ਕਰਾਰ ਦੇ ਕੇ ਕੁੱਝ ਸਾਰਥਕ ਕਰਨ ਦਾ ਵਾਅਦਾ ਕੀਤਾ ਹੈ। ਪਰ ਮਿਸ਼ੇਲ ਰੈਂਮਪਲ ਨੇ ਇਹ ਨਹੀਂ ਦੱਸਿਆ ਜਿਸਤੋਂ ਪਤਾ ਲੱਗੇ ਕਿ ਅਸਲ ਵਿੱਚ ਕੰਜ਼ਰਵੇਟਿਵ ਪਾਰਟੀ ਕਰੇਗੀ ਕੀ।

ਇੰਮੀਗਰੇਸ਼ਨ ਇੱਕ ਮਹੱਤਵਪੂਰਣ ਮੁੱਦਾ ਹੈ ਜਿਸਦਾ ਕੈਨੇਡਾ ਦੀ ਆਰਥਕ, ਸਮਾਜਿਕ ਅਤੇ ਸਿਆਸੀ ਸਥਿਤੀ ਉੱਤੇ ਗੰਭੀਰ ਅਸਰ ਪੈਂਦਾ ਹੈ। ਸਰਕਾਰ ਬੇਸ਼ੱਕ ਲਿਬਰਲ ਬਣੇ ਜਾਂ ਕੰਜ਼ਰਵੇਟਿਵ ਪਰ ਇਸ ਮੁੱਦੇ ਉੱਤੇ ਸਪੱਸ਼ਟਤਾ ਦਾ ਹੋਣਾ ਬਹੁਤ ਲਾਜ਼ਮੀ ਹੈ। ਕੋਈ ਸ਼ੱਕ ਨਹੀਂ ਕਿ ਲਿਬਰਲ ਸਰਕਾਰ ਅਮਰੀਕਾ ਨਾਲ ਲੱਗਦੇ ਅੰਤਰਰਾਸ਼ਟਰੀ ਬਾਰਡਰ ਰਾਹੀਂ ਗੈਰਕਾਨੂੰਨੀ ਰਿਫਿਊਜੀਆਂ ਨੂੰ ਰੋਕਣ ਵਿੱਚ ਵੱਡੇ ਪੱਧਰ ਉੱਤੇ ਅਸਫਲ ਰਹੀ ਹੈ। ਵਿਰੋਧੀ ਧਿਰ ਤੋਂ ਕੈਨੇਡੀਅਨ ਉਮੀਦ ਕਰਦੇ ਹਨ ਕਿ ਬਾਰਡਰ ਰਾਹੀਂ ਆਉਣ ਵਾਲੇ ਰਿਫਿਊਜੀਆਂ ਸਮੇਤ ਹਰ ਮੁੱਦੇ ਉੱਤੇ ਮਹਿਜ਼ ਬਿਆਨ ਦੇਣ ਦੀ ਥਾਂ ਦੱਸੇ ਕਿ ਉਹ ਕਿਹੜੇ ਠੋਸ ਕਦਮ ਚੁੱਕਣ ਦਾ ਇਰਾਦਾ ਰੱਖਦੀ ਹੈ।

ਇਸ ਦਿਸ਼ਾ ਵਿੱਚ ਪਹਿਲਾ ਕਦਮ ਇਹ ਹੋ ਸਕਦਾ ਹੈ ਕਿ ਟੋਰੀ ਆਗੂ ਐਂਡਰੀਊ ਸ਼ੀਅਰ ਜਾਂ ਇੰਮੀਗਰੇਸ਼ਨ ਆਲੋਚਕ ਮਿਸ਼ੇਲ ਰੈਮਪਲ ਵੱਲੋਂ ਕੰਜ਼ਰਵੇਟਿਵ ਪਾਰਟੀ ਦੀ ਅਧਿਕਾਰਤ ਵੈੱਬਸਾਈਟ ਉੱਤੇ ਕੰਜ਼ਰਵੇਟਿਵਾਂ ਦੀ ਇੰਮੀਗਰੇਸ਼ਨ ਯੋਜਨਾ ਬਾਰੇ ਬਣਦੀ ਜਾਣਕਾਰੀ ਪਾਈ ਜਾਵੇ। ਇਸ ਅਹਿਮ ਮੁੱਦੇ ਨੂੰ ਮਹਿਜ਼ ਬਿਆਨਾਂ ਤੱਕ ਸੀਮਤ ਨਹੀਂ ਰੱਖਿਆ ਜਾਣਾ ਚਾਹੀਦਾ।