ਵਾਸ਼ਿੰਗਟਨ, 24 ਮਈ (ਪੋਸਟ ਬਿਊਰੋ)- ਵਿਕੀਲੀਕਸ ਦੇ ਮੋਢੀ ਜੂਲੀਅਨ ਅਸਾਂਜੇ ਉੱਤੇ ਅਮਰੀਕਾ ਨੇ ਜਾਸੂਸੀ ਐਕਟ ਦੇ 17 ਨਵੇਂ ਦੋਸ਼ ਲਾਏ ਹਨ। ਅਮਰੀਕਾ ਦੀ ਇਕ ਫੈਡਰਲ ਗ੍ਰੈਂਡ ਜੂਰੀ ਨੇ ਜੂਲੀਅਨ ਅਸਾਂਜੇ ਵਿਰੁੱਧ ਜਾਸੂਸੀ ਐਕਟ ਹੇਠ 17 ਵਾਧੂ ਦੋਸ਼ਾਂ ਦਾ ਐਲਾਨ ਕੀਤਾ ਹੈ। ਇਸ ਵੇਲੇ ਅਸਾਂਜੇ ਬ੍ਰਿਟਿਸ਼ ਜੇਲ ਵਿਚ ਆਪਣੀ ਹਵਾਲਗੀ ਦੇ ਕੇਸ ਦੀ ਸੁਣਵਾਈ ਦੀ ਉਡੀਕ ਕਰ ਰਹੇ ਹਨ। ਅਮਰੀਕਾ ਨੇ ਬ੍ਰਿਟੇਨ ਤੋਂ ਅਸਾਂਜੇ ਦੀ ਹਵਾਲਗੀ ਦੀ ਮੰਗ ਕੀਤੀ ਹੈ।
ਇਸ ਸੰਬੰਧ ਵਿੱਚ ਅਮਰੀਕਾ ਵਿਚ ਵੀਰਵਾਰ ਨੂੰ ਜਨਤਕ ਕੀਤਾ ਗਿਆ ਕਿ ਨਵਾਂ ਕੇਸ 2010 ਵਿਚ ਵਿਕੀਲੀਕਸ ਵੱਲੋਂ ਅਮਰੀਕੀ ਦਸਤਾਵੇਜ਼ਾਂ ਨੂੰ ਛਾਪਣ ਨਾਲ ਸਬੰਧਤ ਹੈ। ਇਸ ਮੁਤਾਬਕ ਅਸਾਂਜੇ ਨੇ ਗਲਤ ਢੰਗ ਨਾਲ ਉਨ੍ਹਾਂ ਲੋਕਾਂ ਦੇ ਨਾਵਾਂ ਦਾ ਖੁਲਾਸਾ ਕੀਤਾ, ਜੋ ਅਮਰੀਕੀ ਸਰਕਾਰ ਨਾਲ ਕੰਮ ਕਰਦੇ ਸਨ। ਇੰਜ ਕਰ ਕੇ ਉਹ ਉਨ੍ਹਾਂ ਦੀ ਜ਼ਿੰਦਗੀ ਨੂੰ ਖਤਰੇ ਵਿਚ ਪਾ ਰਹੇ ਸਨ। ਅਸਾਂਜੇ ਨੂੰ ਜਾਸੂਸੀ ਐਕਟ ਦਾ ਦੋਸ਼ੀ ਮੰਨਿਆ ਗਿਆ ਹੈ। ਜੇ ਇਹ ਦੋਸ਼ ਸਾਬਤ ਹੋ ਗਏ ਤਾਂ ਉਸ ਨੂੰ 170 ਸਾਲ ਤੱਕ ਸਜ਼ਾ ਹੋ ਸਕਦੀ ਹੈ। ਅਸਾਂਜੇ ਵਿਰੁੱਧ ਲਾਏ ਹਰ ਦੋਸ਼ ਦੀ ਉਸ ਨੂੰ 10 ਸਾਲ ਜੇਲ ਦੀ ਸਜ਼ਾ ਹੋ ਸਕਦੀ ਹੈ। ਉਸ ਨੂੰ ਗੰਭੀਰ ਕੇਸ ਦਾ ਸਾਹਮਣਾ ਕਰਨਾ ਪਵੇਗਾ। ਮਾਹਰਾਂ ਦੀ ਰਾਏ ਹੈ ਕਿ ਜੇ ਅਮਰੀਕਾ ਨੂੰ ਉਸ ਦੀ ਹਵਾਲਗੀ ਹੋਈ ਤਾਂ ਉਨ੍ਹਾਂ ਨੂੰ ਬਾਕੀ ਜ਼ਿੰਦਗੀ ਜੇਲ ਵਿਚ ਕੱਟਣੀ ਪਵੇਗੀ।
ਜੂਲੀਅਨ ਅਸਾਂਜੇ ਨੇ ਲੰਡਨ ਵਿਚ ਇਕਵਾਡੋਰ ਦੇ ਦੂਤਘਰ ਵਿਚ ਲੱਗਭਗ 7 ਸਾਲ ਬਿਤਾਏ ਸਨ। ਇੱਥੇ ਉਨ੍ਹਾਂ ਨੇ 2012 ਵਿਚ ਸ਼ਰਣ ਲਈ ਸੀ। ਨਵੀਂ ਇਕਵਾਡੋਰ ਸਰਕਾਰ ਨੇ ਅਮਰੀਕਾ ਨਾਲ ਕਿਸੇ ਸਮਝੌਤੇ ਪਿੱਛੋਂ ਅਸਾਂਜੇ ਦੀ ਸ਼ਰਣ ਰੱਦ ਕਰ ਦਿੱਤੀ ਅਤੇ ਬ੍ਰਿਟਿਸ਼ ਪੁਲਸ ਨੇ ਉਸ ਨੂੰ ਅਪ੍ਰੈਲ ਵਿਚ ਦੂਤਘਰ ਤੋਂ ਗ੍ਰਿਫਤਾਰ ਕਰ ਲਿਆ ਸੀ। ਉਸ ਇਸ ਵੇਲੇ ਬ੍ਰਿਟੇਨ ਦੇ ਲੰਡਨ ਦੀ ਬੇਲਮਾਰਸ਼ ਕ੍ਰਾਊਨ ਜੇਲ ਵਿਚ ਹੈ ਅਤੇ ਇਕਵਾਡੋਰ ਵਿਚ ਸ਼ਰਣ ਮੰਗ ਕੇ ਬ੍ਰਿਟੇਨ ਦੀ ਜ਼ਮਾਨਤ ਦੀ ਉਲੰਘਣਾ ਦੇ ਮਾਮਲੇ ਵਿਚ ਆਪਣੀ 50 ਮਹੀਨੇ ਦੀ ਜੇਲ ਦੀ ਸਜ਼ਾ ਕੱਟ ਰਿਹਾ ਹੈ।