ਚੰਡੀਗੜ੍ਹ, 24 ਮਈ (ਪੋਸਟ ਬਿਊਰੋ)- ਭਾਰਤ ਦੇ ਸਾਬਕਾ ਡਿਪਟੀ ਪ੍ਰਧਾਨ ਮੰਤਰੀ ਮਰਹੂਮ ਤਾਊ ਦੇਵੀਲਾਲ ਦੇ ਪਰਵਾਰ ਦੀ ਰਾਜਨੀਤਕ ਵਿਰਾਸਤ ਨੂੰ ਚਾਚਾ ਅਭੈ ਸਿੰਘ ਚੌਟਾਲਾ ਤੇ ਭਤੀਜੇ ਦੁਸ਼ਿਅੰਤ ਚੌਟਾਲਾ ਦਾ ਕਲੇਸ਼ ਲੈ ਡੁੱਬਿਆ। ਲੋਕ ਸਭਾ ਚੋਣਾਂ ਵਿੱਚ ਇਨੈਲੋ ਵਿਧਾਇਕ ਦਲ ਦੇ ਨੇਤਾ ਅਭੈ ਸਿੰਘ ਚੌਟਾਲਾ ਦੇ ਬੇਟੇ ਅਰਜੁਨ ਅਤੇ ਪਿਛਲੀ ਵਾਰ ਦੇ ਪਾਰਲੀਮੈਂਟ ਮੈਂਬਰ ਚਰਨਜੀਤ ਸਿੰਘ ਰੋੜੀ ਸਮੇਤ ਕੋਈ ਉਮੀਦਵਾਰ ਵੀ ਆਪਣੀ ਜ਼ਮਾਨਤ ਨਹੀਂ ਬਚਾ ਸਕਿਆ। ਦੂਸਰੇ ਪਾਸੇ ਇਸ ਤੋਂ ਵੱਖਰੀ ਬਣਾਈ ਗਈ ਜਨਨਾਇਕ ਜਨਤਾ ਪਾਰਟੀ (ਜੇ ਜੀ ਪੀ) ਵੱਲੋਂ ਕੇਵਲ ਦੁਸ਼ਿਅੰਤ ਚੌਟਾਲਾ ਹੀ ਪਾਰਟੀ ਦੀ ਲਾਜ ਕੁਝ ਹੱਦ ਤੱਕ ਬਚਾ ਸਕੇ। ਆਮ ਆਦਮੀ ਪਾਰਟੀ ਨਾਲ ਸਮਝੌਤਾ ਕਰਨ ਪਿੱਛੋਂ ਵੀ ਨੌਂ ਸੀਟਾਂ ਉੱਤੇ ਇਸ ਗਠਜੋੜ ਦੇ ਉਮੀਦਵਾਰ ਜ਼ਮਾਨਤ ਜ਼ਬਤ ਕਰਵਾ ਬੈਠੇ ਹਨ।
ਪਿਛਲੇ ਸਾਲ ਦਸੰਬਰ ਵਿੱਚ ਅਭੈ ਸਿੰਘ ਚੌਟਾਲਾ ਤੇ ਦੁਸ਼ਿਅੰਤ ਚੌਟਾਲਾ ਦੇ ਰਾਜਸੀ ਰਸਤੇ ਵੱਖ ਹੋਣ ਦੇ ਬਾਅਦ ਇਨੈਲੋ ਨੇ ਨਾ ਕੇਵਲ ਨਗਰ ਨਿਗਮ ਅਤੇ ਜੀਂਦ ਵਿਧਾਨ ਸਭਾ ਦੀਆਂ ਉਪ ਚੋਣਾਂ ਹਾਰੀਆਂ, ਸਗੋਂ ਵਿਧਾਨ ਸਭਾ ਵਿੱਚ ਉਨ੍ਹਾਂ ਦਾ ਮੁੱਖ ਵਿਰੋਧੀ ਦਲ ਦਾ ਦਰਜਾ ਵੀ ਖੁੱਸ ਗਿਆ। ਫਿਰ ਲੋਕ ਸਭਾ ਚੋਣਾਂ ਵਿੱਚ ਇਨੈਲੋ ਨੇ ਕੁਰੂਕਸ਼ੇਤਰ ਵਿੱਚ ਅਰਜੁਨ ਚੌਟਾਲਾ ਦੇ ਲਈ ਪੂਰੀ ਤਾਕਤ ਲਾ ਦਿੱਤੀ, ਪਰ ਉਹ ਪੰਜਵੇਂ ਥਾਂ ਆਇਆ। ਇਸੇ ਤਰ੍ਹਾਂ ਸਿਰਸਾ ਤੋਂ ਪਿਛਲੀਆਂ ਲੋਕ ਸਭਾ ਚੋਣਾਂ ਵਿੱਚ ਇੱਕ ਲੱਖ 15 ਹਜ਼ਾਰ ਵੋਟਾਂ ਨਾਲ ਜਿੱਤਣ ਵਾਲੇ ਚਰਨਜੀਤ ਸਿੰਘ ਰੋੜੀ ਤੀਸਰੇ ਥਾਂ ਰਹੇ। ਕਿਸੇ ਚੋਣ ਹਲਕੇ ਵਿੱਚ ਪਈਆਂ ਕੁੱਲ ਵੋਟਾਂ ਦੀ ਗਿਣਤੀ ਦੇ ਛੇਵੇਂ ਹਿੱਸੇ ਤੋਂ ਘੱਟ ਵੋਟ ਮਿਲਣ ਉੱਤੇ ਜ਼ਮਾਨਤ ਜ਼ਬਤ ਹੁੰਦੀ ਹੈ। ਇਨੈਲੋ ਨੇ ਰਣਨੀਤੀ ਦੇ ਤਹਿਤ ਕੁਰੂਕਸ਼ੇਤਰ ਅਤੇ ਸਿਰਸਾ ਦੇ ਇਲਾਵਾ ਦੂਸਰੀਆਂ ਸੀਟਾਂ ਨੂੰ ਖਾਸ ਪਹਿਲ ਨਹੀਂ ਦਿੱਤੀ। ਅਭੈ ਚੌਟਾਲਾ ਨੇ ਆਪਣੇ ਭਤੀਜੇ ਦੁਸ਼ਿਅੰਤ ਚੌਟਾਲਾ ਦੀ ਪਾਰਟੀ ਜਨਨਾਇਕ ਜਨਤਾ ਪਾਰਟੀ ਨੂੰ ਹਰਾਉਣ 'ਤੇ ਵੱਧ ਫੋਕਸ ਕੀਤਾ। ਇਸ ਦੇ ਬਾਵਜੂਦ ਦੁਸ਼ਿਅੰਤ ਨੇ ਹਿਸਾਰ ਵਿੱਚ ਨਾ ਕੇਵਲ ਮੁੱਖ ਮੁਕਾਬਲੇ ਵਿੱਚ ਰਹਿ ਕੇ ਭਾਜਪਾ ਉਮੀਦਵਾਰ ਬ੍ਰਿਜੇਂਦਰ ਸਿੰਘ ਨੂੰ ਟੱਕਰ ਦਿੱਤੀ, ਸਗੋਂ ਬਹੁਤੀਆਂ ਸੀਟਾਂ 'ਤੇ ਉਨ੍ਹਾਂ ਦੇ ਉਮੀਦਵਾਰ ਤੀਸਰੇ ਥਾਂ ਰਹੇ। ਇਨੈਲੋ ਉਮੀਦਵਾਰਾਂ ਨੂੰ ਚੌਥੇ-ਪੰਜਵੇਂ ਨੰਬਰ 'ਤੇ ਸੁੱਟ ਦਿੱਤਾ ਗਿਆ। ਲੋਕ ਸਭਾ ਚੋਣਾਂ ਵਿੱਚ ਸਾਰੀਆਂ ਸੀਟਾਂ 'ਤੇ ਇਨੈਲੋ ਉਮੀਦਵਾਰਾਂ ਦੇ ਹਾਰਨ ਨਾਲ ਇਨੈਲੋ ਦੇ ਦਸ ਵਿਧਾਇਕਾਂ ਦੇ ਵੀ ਪਾਰਟੀ ਛੱਡਣ ਦੇ ਆਸਾਰ ਬਣ ਗਏ ਹਨ।