ਭੁਲੱਥ, 24 ਮਈ (ਪੋਸਟ ਬਿਊਰੋ)- ਲੋਕ ਸਭਾ ਚੋਣਾਂ ਦੌਰਾਨ ਜਲੰਧਰ-ਅੰਮ੍ਰਿਤਸਰ ਹਾਈਵੇ 'ਤੇ ਢਿੱਲਵਾਂ ਨੇੜੇ ਲਾਏ ਗਏ ਹਾਈਟੈਕ ਨਾਕੇ ਦੌਰਾਨ ਪੁਲਸ ਨੂੰ ਵੱਡੀ ਸਫਲਤਾ ਮਿਲੀ, ਜਦੋਂ ਇੱਕ ਬਸ ਦੀ ਚੈਕਿੰਗ ਵਿੱਚ 87 ਲੱਖ 14 ਹਜ਼ਾਰ ਰੁਪਏ ਦੀ ਭਾਰਤੀ ਕਰੰਸੀ, ਵੱਖ-ਵੱਖ ਦੇਸ਼ਾਂ ਦੀ ਵਿਦੇਸ਼ੀ ਕਰੰਸੀ ਤੇ ਦੋ ਕਿਲੋ 264 ਗਰਾਮ ਚਾਂਦੀ ਫੜੀ ਗਈ।
ਸਬ ਡਵੀਜ਼ਨ ਭੁਲੱਥ ਦੇ ਏ ਐੱਸ ਪੀ ਸਿਮਰਤ ਕੌਰ ਨੇ ਦੱਸਿਆ ਕਿ ਲੋਕ ਸਭਾ ਚੋਣਾਂ ਕਾਰਨ ਚੱਲ ਰਹੀ ਚੈਕਿੰਗ ਦੌਰਾਨ ਉਨ੍ਹਾਂ ਨੇ ਐੱਸ ਐੱਚ ਓ ਢਿੱਲਵਾਂ ਜੋਗਿੰਦਰ ਕੁਮਾਰ ਨਾਲ ਜਲੰਧਰ-ਅੰਮ੍ਰਿਤਸਰ ਹਾਈਵੇ 'ਤੇ ਢਿੱਲਵਾਂ ਵਿਖੇ ਰਾਤ ਨੂੰ ਹਾਈਟੈਕ ਨਾਕਾ ਲਾਇਆ ਅਤੇ ਚੈਕਿੰਗ ਚੱਲ ਰਹੀ ਸੀ। ਇਸ ਮੌਕੇ ਅੰਮ੍ਰਿਤਸਰ ਵੱਲੋਂ ਆਈ ਇੱਕ ਏ ਸੀ ਬਸ ਤੋਂ ਹਰੀਸ਼ ਕੁਮਾਰ ਪੁੱਤਰ ਰੁਲਦੂ ਰਾਮ ਵਾਸੀ ਖਿਡੌਣਿਆਂ ਵਾਲੀ ਬਗੀਚੀ, ਲਾਹੌਰੀ ਗੇਟ ਅੰਮ੍ਰਿਤਸਰ ਤੋਂ 13 ਲੱਖ 14 ਹਜ਼ਾਰ ਰੁਪਏ ਭਾਰਤੀ ਕਰੰਸੀ, ਚਾਂਦੀ ਦੀਆਂ 78 ਕੌਲੀਆਂ (ਕਟੋਰੀਆਂ) ਅਤੇ ਇੱਕ ਚਾਂਦੀ ਦੀ ਟਰੇਅ ਮਿਲੀ, ਜਿਸ ਦਾ ਭਾਰ ਦੋ ਕਿਲੋ 264 ਗਰਾਮ ਹੈ ਤੇ ਇਸ ਚਾਂਦੀ ਦੀ ਬਾਜ਼ਾਰੀ ਕੀਮਤ 88 ਹਜ਼ਾਰ 330 ਰੁਪਏ ਬਣਦੀ ਹੈ। ਇਸੇ ਬਸ ਵਿੱਚੋਂ ਅਮਨਦੀਪ ਪੁੱਤਰ ਜਸਵਿੰਦਰ ਸਿੰਘ ਵਾਸੀ ਸੂਰਜ ਐਵੇਨਿਊ, ਅੰਮ੍ਰਿਤਸਰ ਦੇ ਕੋਲੋਂ 74 ਲੱਖ ਰੁਪਏ ਭਾਰਤੀ ਕਰੰਸੀ, 4050 ਕਤਰ ਕਰੰਸੀ ਰਿਆਲ, 13135 ਯੂਰੋ, ਬਹਿਰੀਨ ਦੇ ਤੀਹ ਦਿਨਾਰ, ਉਮਾਨ ਦੇ 71 ਰਿਆਲ, ਸਾਊਦੀ ਦੇ 500 ਰਿਆਲ ਮਿਲੇ ਹਨ। ਏ ਐੱਸ ਪੀ ਨੇ ਦੱਸਿਆ ਕਿ ਵਿਦੇਸ਼ੀ ਕਰੰਸੀ ਦੀ ਮਾਰਕੀਟ ਕੀਮਤ 11 ਲੱਖ 29 ਹਜ਼ਾਰ 741 ਰੁਪਏ ਬਣਦੀ ਹੈ। ਉਨ੍ਹਾਂ ਦੱਸਿਆ ਕਿ ਇੰਨੀ ਵੱਡੀ ਮਾਤਰਾ ਵਿੱਚ ਚਾਂਦੀ, ਵਿਦੇਸ਼ੀ ਤੇ ਭਾਰਤੀ ਕਰੰਸੀ ਲਿਜਾ ਰਹੇ ਇਨ੍ਹਾਂ ਦੋਵਾਂ ਵਿਅਕਤੀਆਂ ਤੋਂ ਪੁੱਛਗਿੱਛ ਚੱਲ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਚਾਂਦੀ ਤੇ ਕਰੰਸੀ ਬਾਰੇ ਦੋਵਾਂ ਵਿਅਕਤੀਆਂ ਵੱਲੋਂ ਕੋਈ ਤਸੱਲੀ ਬਖਸ਼ ਬਿਆਨ ਨਹੀਂ ਦਿੱਤੇ ਗਏ ਤੇ ਨਾ ਕੋਈ ਦਸਤਾਵੇਜ਼ ਪੇਸ਼ ਕੀਤੇ ਜਾ ਰਹੇ ਹਨ।