ਸ਼ਰਧਾ ਕਪੂਰ ਤੇ ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਫਿਲਮ ‘ਛਿਛੋਰੇ’ ਦੀ ਫਸਟ ਲੁਕ ਜਾਰੀ ਹੁੰਦੇ ਹੀ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਗਈ। ਇਸ ਫਿਲਮ ਦੀ ਸ਼ੂਟਿੰਗ ਖਤਮ ਹੋਣ 'ਤੇ ਫਿਲਮ ਦੀ ਸਾਰੀ ਕਾਸਟ ਨੂੰ ਪ੍ਰੋਡਕਸ਼ਨ ਹਾਊਸ ਵੱਲੋਂ ਸਪੈਸ਼ਲ ਗਿਫਟ ਦਿੱਤੇ ਗਏ, ਪਰ ਸ਼ਰਧਾ ਤੇ ਸੁਸ਼ਾਂਤ ਨੇ ਕਰੂਅ ਦੇ ਮੈਂਬਰਾਂ ਲਈ ਇੱਕ ਛੋਟਾ ਜਿਹਾ ਸਰਪਰਾਈਜ਼ ਤਿਆਰ ਰੱਖਿਆ ਸੀ। ਉਨ੍ਹਾਂ ਨੇ ਫਿਲਮ ਦੇ ਅਸਿਸਟੈਂਟ ਡਾਇਰੈਕਟਰਜ਼ ਦੇ ਗਰੁੱਪ ਨੂੰ ਗਿਫਟ ਭੇਜਣ ਦਾ ਫੈਸਲਾ ਕੀਤਾ। ਪਤਾ ਲੱਗਾ ਹੈ ਕਿ ‘‘ਫਿਲਮ ਦੀ ਸ਼ੂਟਿੰਗ ਦੌਰਾਨ ਅਸਿਸਟੈਂਟ ਡਾਇਰੈਕਟਰਜ਼ ਦੀ ਸ਼ਰਧਾ ਤੇ ਸੁਸ਼ਾਂਤ ਨਾਲ ਚੰਗੀ ਦੋਸਤੀ ਹੋ ਗਈ ਸੀ। ਦੋਵਾਂ ਸਿਤਾਰਿਆਂ ਨੇ ਉਨ੍ਹਾਂ ਤੋਂ ਵਿਦਾਈ ਲੈਂਦੇ ਸਮੇਂ ਉਨ੍ਹਾਂ ਨੂੰ ਗਿਫਟ ਦੇਣ ਲਈ ਕਿਤਾਬਾਂ ਤੇ ਫੁੱਲ ਖਰੀਦੇ ਸਨ। ਸ਼ਰਧਾ ਨੂੰ ਕਿਤਾਬਾਂ ਪੜ੍ਹਨੀਆਂ ਪਸੰਦ ਹਨ। ਇਸ ਲਈ ਉਸ ਨੇ ਇਨਟਰਨ ਫਿਲਮ ਵਿਚਲੇ ਨੌਜਵਾਨਾਂ ਨੂੰ ਕਿਤਾਬਾਂ ਭੇਟ ਕੀਤੀਆਂ। ਇਹੀ ਨਹੀਂ, ਦੋਵਾਂ ਨੇ ਆਪਣੇ ਹੱਥਾਂ ਨਾਲ ਉਨ੍ਹਾਂ ਲਈ ਲੈਟਰ ਲਿਖੇ, ਜਿਨ੍ਹਾਂ ਨੂੰ ਦੇਖ ਕੇ ਸਾਰੇ ਬਹੁਤ ਭਾਵੁਕ ਹੋ ਗਏ।”
ਜ਼ਿਕਰ ਯੋਗ ਹੈ ਕਿ ਫਿਲਮ ਦੀ ਫਸਟ ਲੁਕ ਨੂੰ ਰਿਲੀਜ਼ ਕਰਨ ਦੇ ਨਾਲ ਹੀ ਇਸ ਦੇ ਨਿਰਮਾਤਾ ਨਾਡਿਆਡਵਾਲਾ ਗ੍ਰੈਂਡਸਨ ਨੇ ਫਿਲਮ ਦੀ ਰਿਲੀਜ਼ ਡੇਟ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਇਹ ਫਿਲਮ ਕੁਝ ਮਹੀਨਿਆਂ 'ਚ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋ ਜਾਏਗੀ। ਫਾਕਸ ਸਟਾਰ ਨੇ ਸੋਸ਼ਲ ਮੀਡੀਆ 'ਤੇ ਵੀਡੀਓ ਪੋਸਟ ਸ਼ੇਅਰ ਕਰਦੇ ਹੋਏ ਲਿਖਿਆ, ‘‘ਇਥੇ ਛਿਛੋਰੇ ਟੀਮ ਹੈ ਇਸ ਦਾ ਇੱਕ ਹਿੱਸਾ ਡਰਾਮਾ ਹੈ ਤਾਂ ਦੂਜਾ ਹਿੱਸਾ ਪਿਆਰ ਨਾਲ ਭਰਿਆ ਹੋਇਆ ਹੈ। ਸਾਰੇ ਛਿਛੋਰੇਪੰਤੀ ਵਿੱਚ ਲੱਗੇ ਹੋਏ ਹਨ।” ਇਸ ਤੋਂ ਇਲਾਵਾ ਫਿਲਮ ਦੇ ਨਿਰਦੇਸ਼ਕ ਨਿਤੇਸ਼ ਤਿਵਾੜੀ ਨੇ ਵੀਡੀਓ ਸ਼ੇਅਰ ਕਰ ਕੇ ਲਿਖਿਆ, ‘ਪਾਗਲਪਨ ਫਿਰ ਸ਼ੁਰੂ ਹੋਣ ਵਾਲਾ ਹੈ। ਇਸ ਲਈ ਸਿਰਫ ਚਾਰ ਮਹੀਨੇ ਹੋਰ ਹਨ।” ਇੱਕ ਹੋਰ ਪੋਸਟਰ 'ਚ ਦੋ ਜੈਨਰੇਸ਼ਨਜ਼ ਨੂੰ ਦਿਖਾਇਆ ਗਿਆ ਸੀ। ਪੋਸਟਰ ਵਿੱਚ ਦਿਸ ਰਿਹਾ ਹੈ ਕਿ ਪਹਿਲੀ ਲਾਈਨ ਵਿੱਚ ਸੁਸ਼ਾਂਤ, ਸ਼ਰਧਾ ਸਣੇ ਸਾਰੇ ਕਲਾਕਾਰ ਬੈਠੇ ਹੋਏ ਹਨ।