ਜਲੰਧਰ, 23 ਮਈ (ਪੋਸਟ ਬਿਊਰੋ)- ਅਰਮਾਨ ਨਗਰ ਫਾਟਕ ਨੇੜੇ ਆਪਣੇ ਘਰ ਜਾ ਰਹੇ ਅਸ਼ੋਕ ਰਾਵਤ ਨਾਮਕ ਪ੍ਰਵਾਸੀ ਮਜ਼ਦੂਰ ਨੂੰ ਘੇਰ ਕੇ ਉਸ ਦਾ ਮੋਬਾਈਲ ਤੇ ਨਕਦੀ ਖੋਹਣ ਦੇ ਮਾਮਲੇ ਵਿੱਚ ਕੱਲ੍ਹ ਨੰਗਲ ਸ਼ਾਮਾ ਪੁਲਸ ਚੌਕੀ ਦੇ ਇੰਚਾਰਜ ਐਸ ਆਈ ਸੇਵਾ ਸਿੰਘ ਦੀ ਅਗਵਾਈ ਵਿੱਚ ਏ ਐਸ ਆਈ ਭੁਪਿੰਦਰ ਸਿੰਘ ਨੇ ਕੈਸ਼ ਅਤੇ ਕੋਂਡਾ ਨਾਮਕ ਦੋ ਦੋਸ਼ੀਆਂ ਨੂੰ ਕਾਬੂ ਕਰ ਲਿਆ ਅਤੇ ਅਗਲੀ ਪੁੱਛਗਿੱਛ ਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਐਸ ਐਚ ਓ ਰਾਮਾ ਮੰਡੀ ਸੁਖਜੀਤ ਸਿੰਘ ਨੇ ਦੱਸਿਆ ਕਿ ਇਸ ਕੇਸ ਵਿੱਚ ਪੁਲਸ ਗੋਬਿੰਦਾ, ਸੰਨੀ ਤੇ ਅਵਤਾਰ ਉਰਫ ਗੱਬਰ ਨਾਮਕ ਤਿੰਨ ਦੋਸ਼ੀਆਂ ਨੂੰ ਪਹਿਲਾਂ ਫੜ ਚੁੱਕੀ ਹੈ, ਜਿਹੜੇ ਜੇਲ੍ਹ ਜਾ ਕੇ ਜ਼ਮਾਨਤ 'ਤੇ ਆਏ ਹੋਏ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਕੁੱਲ ਪੰਜ ਜਣਿਆਂ ਨੇ ਵਾਰਦਾਤ ਕੀਤੀ ਸੀ, ਜਿਸ ਦੇ ਬਾਅਦ ਥਾਣਾ ਰਾਮਾ ਮੰਡੀ ਵਿੱਚ ਅਸ਼ੋਕ ਰਾਵਤ ਦੇ ਬਿਆਨਾਂ ਉਤੇ ਪੁਲਸ ਨੇ ਕੇਸ ਦਰਜ ਕੀਤਾ ਸੀ। ਵਿਪਿਨ ਕੁਮਾਰ ਉਰਫ ਕੈਸ਼ ਪੁੱਤਰ ਸੁਦੇਸ਼ ਕੁਮਾਰ ਵਾਸੀ ਏਕਤਾ ਨਗਰ ਰਾਮਾ ਮੰਡੀ ਅਤੇ ਅਜੈ ਕੁਮਾਰ ਕੋਂਡਾ ਪੁੱਤਰ ਬਲਵੰਤ ਸਿੰਘ ਵਾਸੀ ਬੇਅੰਤ ਨਗਰ, ਲੱਧੇਵਾਲੀ ਫਰਾਰ ਸਨ, ਜਿਨ੍ਹਾਂ ਨੂੰ ਕੱਲ੍ਹ ਐਸ ਆਈ ਸੇਵਾ ਸਿੰਘ ਚੌਕੀ ਪ੍ਰਮੁੱਖ ਦੀ ਅਗਵਾਈ ਵਿੱਚ ਪੁਲਸ ਪਾਰਟੀ ਨੇ ਫੜ ਲਿਆ।