ਬਰਲਿਨ, 23 ਮਈ (ਪੋਸਟ ਬਿਊਰੋ)- ਮੰਨਿਆ ਜਾਂਦਾ ਹੈ ਕਿ ਕਰੀਬ 4.4 ਅਰਬ ਸਾਲ ਪਹਿਲਾਂ ਇਕ ਪੁਲਾੜ ਤੋਂ ਡਿੱਗਾ ਪਿੰਡ ਪ੍ਰਿਥਵੀ ਨਾਲ ਟਕਰਾਇਆ ਸੀ। ਇਸੇ ਟੱਕਰ ਨਾਲ ਚੰਦਰਮਾ ਬਣਿਆ ਸੀ। ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਮੰਗਲ ਦੇ ਬਰਾਬਰ ਆਕਾਰ ਜਿੱਡੇ ਪਿੰਡ ਦੀ ਟੱਕਰ ਨਾਲ ਪ੍ਰਿਥਵੀ 'ਤੇ ਪਾਣੀ ਵੀ ਆਇਆ ਤੇ ਜੀਵਨ ਸੰਭਵ ਹੋਇਆ।
ਪਹਿਲਾਂ ਪੁਲਾੜ ਦੇ ਮਾਹਰਾਂ ਦਾ ਮੰਨਣਾ ਸੀ ਕਿ ਥਿਆ ਨਾਂ ਦਾ ਇਹ ਪਿੰਡ ਸਾਡੇ ਸੂਰਜੀ ਮੰਡਲ ਦਾ ਹਿੱਸਾ ਸੀ, ਪਰ ਨੇਚਰ ਐਸਟ੍ਰੋਨਾਮੀ ਜਰਨਲ ਵਿੱਚ ਛਪੇ ਅਧਿਐਨ ਮੁਤਾਬਕ ਇਹ ਪਿੰਡ ਸੂਰਜੀ ਮੰਡਲ ਦੇ ਬਾਹਰੋਂ ਆਇਆ ਸੀ। ਪ੍ਰਿਥਵੀ ਸੂਰਜੀ ਮੰਡਲ ਦਾ ਇਕਲੌਤਾ ਅਜਿਹਾ ਗ੍ਰਹਿ ਹੈ, ਜਿਸ ਦੇ ਕਰੀਬ 70 ਫੀਸਦੀ ਹਿੱਸੇ 'ਚ ਪਾਣੀ ਹੈ। ਇਸ ਦਾ ਚੰਦਰਮਾ ਵੀ ਹੋਰ ਗ੍ਰਹਿਆਂ ਦੇ ਚੰਦਰਮਾ ਦੇ ਮੁਕਾਬਲੇ ਵੱਡਾ ਹੈ। ਚੰਦਰਮਾ ਦੇ ਕਾਰਨ ਹੀ ਧਰਤੀ ਦਾ ਪੰਧ ਕਾਇਮ ਹੈ। ਧਰਤੀ 'ਤੇ ਜੀਵਨ ਦੇ ਵਿਕਾਸ ਲਈ ਪਾਣੀ ਦੇ ਨਾਲ-ਨਾਲ ਚੰਦਰਮਾ ਵੀ ਅਹਿਮ ਹੈ। ਜਰਮਨੀ ਦੀ ਯੂਨੀਵਰਸਿਟੀ ਆਫ ਮੰਸਟਰ ਦੇ ਪ੍ਰੋਫੈਸਰ ਥੋਰਸਟੇਨ ਕਲੇਨ ਨੇ ਕਿਹਾ ਕਿ ਪਹਿਲੀ ਵਾਰੀ ਚੰਦਰਮਾ ਦੇ ਬਣਨ ਅਤੇ ਪ੍ਰਿਥਵੀ ਉਤੇ ਪਾਣੀ ਦੀ ਉਤਪਤੀ ਦੇ ਸਬੰਧ ਦਾ ਪਤਾ ਲੱਗਾ ਹੈ। ਸੌਖੇ ਸ਼ਬਦਾਂ ਵਿੱਚ ਕਿਹਾ ਜਾਵੇ ਤਾਂ ਚੰਦਰਮਾ ਦੇ ਬਿਨਾਂ ਪ੍ਰਿਥਵੀ 'ਤੇ ਸ਼ਾਇਦ ਜੀਵ ਦਾ ਵਿਕਾਸ ਹੋਣਾ ਸੰਭਵ ਨਹੀਂ ਸੀ। ਇਸੇ ਲਈ ਪਿਛਲੇ ਕਈ ਦਹਾਕਿਆਂ ਤੋਂ ਚੰਦਰਮਾ ਬਾਰੇ ਅਧਿਐਨ 'ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ।