ਵਾਸ਼ਿੰਗਟਨ, 4 ਅਕਤੂਬਰ (ਪੋਸਟ ਬਿਊਰੋ)- ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਅਮਰੀਕਾ ਦੇ ਫੌਜੀ ਹੈਡਕੁਆਰਟਰ ਨੂੰ ਲਿਖੇ ਗਏ ਇਕ ਪੱਤਰ ਵਿੱਚ ਜਾਨਲੇਵਾ ਜ਼ਹਿਰੀਲਾ ਪਦਾਰਥ ਰਾਈਸਿਨ ਹੋਣ ਦਾ ਸ਼ੱਕ ਪ੍ਰਗਟਾਇਆ ਗਿਆ ਹੈ।
ਰੱਖਿਆ ਮੰਤਰਾਲੇ ਦੇ ਬੁਲਾਰੇ ਮੁਤਾਬਕ ਅਮਰੀਕੀ ਖੁਫੀਆ ਏਜੰਸੀ ਨੇ ਦੱਸਿਆ ਕਿ ਉਸ ਨੂੰ ਬੀਤੇ ਦਿਨੀਂ ਟਰੰਪ ਨੂੰ ਸੰਬੋਧਨ ਕਰਕੇ ਲਿਖਿਆ ਗਿਆ ਇਕ ਸ਼ੱਕੀ ਲਿਫਾਫਾ ਮਿਲਿਆ ਅਤੇ ਇਸੇ ਦਿਨ ਪੈਂਟਾਗਨ ਦੇ ਜਾਂਚ ਕੇਂਦਰ ਵਿੱਚ ਉਸ ਨੂੰ ਲਿਖੇ ਗਏ ਘੱਟੋ ਘੱਟ ਦੋ ਹੋਰ ਸ਼ੱਕੀ ਲਿਫਾਫੇ ਵੀ ਮਿਲੇ। ਖੁਫੀਆ ਏਜੰਸੀ ਦੇ ਮੁਤਾਬਕ ਇਹ ਲਿਫਾਫਾ ਨਾ ਤਾਂ ਵ੍ਹਾਈਟ ਹਾਊਸ ਵਿੱਚ ਲਿਆ ਗਿਆ ਅਤੇ ਨਾ ਉਸ ਨੂੰ ਵ੍ਹਾਈਟ ਹਾਊਸ ਵਿੱਚ ਲਿਆਂਦਾ ਗਿਆ। ਬੁਲਾਰੇ ਕ੍ਰਿਮ ਸ਼ੇਰਵੁਡ ਨੇ ਇਸ ਦੀ ਪੁਸ਼ਟੀ ਕਰਦੇ ਹੋਏ ਦੱਸਿਆ ਕਿ ਇਸ ਵਿੱਚ ਅੱਤਵਾਦੀ ਸਾਜ਼ਿਸ਼ ਵਿੱਚ ਵਰਤਿਆ ਜਾਣ ਵਾਲਾ ਰਾਈਸਿਨ ਜ਼ਹਿਰ ਹੋਣ ਦਾ ਸ਼ੱਕ ਹੈ। ਪੈਂਟਾਗਨ ਪੁਲਸ ਨੇ ਇਸ ਦੀ ਜਾਂਚ ਐਫ ਬੀ ਆਈ ਨੂੰ ਸੌਂਪ ਦਿੱਤੀ ਹੈ। ਇਕ ਰੱਖਿਆ ਅਧਿਕਾਰੀ ਦੇ ਮੁਤਾਬਕ ਇਹ ਪੱਤਰ ਰੱਖਿਆ ਮੰਤਰੀ ਜਿਮ ਮੈਟਿਸ ਅਤੇ ਨੇਵੀ ਦੇ ਚੀਫ ਐਡਮਿਰਲ ਜਾਨ ਰਿਚਰਡਸਨ ਨੂੰ ਲਿਖੇ ਗਏ ਹਨ। ਸੀ ਐਨ ਐਨ ਨੇ ਸਾਂਝੀ ਜਾਂਚ ਦੀ ਜਾਣਕਾਰੀ ਰੱਖਣ ਵਾਲੇ ਸੂਤਰ ਦੇ ਹਵਾਲੇ ਨਾਲ ਕਿਹਾ ਕਿ ਵ੍ਹਾਈਟ ਹਾਊਸ ਅਤੇ ਪੈਂਟਾਗਨ ਨੂੰ ਭੇਜੇ ਗਏ ਪੱਤਰ ਆਪੋ ਵਿੱਚ ਸੰਬੰਧਤ ਹਨ ਤੇ ਉਨ੍ਹਾਂ ਵਿੱਚ ਕਾਸਟਰ ਤੇਲ ਦੇ ਬੀਜ ਤੋਂ ਬਣਿਆ ਪਦਾਰਥ (ਰਾਈਸਿਨ) ਹੈ, ਪਰ ਅਧਿਕਾਰੀ ਫਿਲਹਾਲ ਇਸ ਦੀ ਪੁਸ਼ਟੀ ਦਾ ਇੰਤਜ਼ਾਰ ਕਰ ਰਹੇ ਹਨ।