ਸਿਡਨੀ, 4 ਅਕਤੂਬਰ (ਪੋਸਟ ਬਿਊਰੋ)- ਔਰਤਾਂ ਦੇ ਇੱਕ ਗਰੁੱਪ ਨੇ ਆਸਟ੍ਰੇਲੀਆ ਵਿਚ ਲੰਬੀ ਲੜਾਈ ਲੜੀ ਤੇ ਆਖਰ ਉਨ੍ਹਾਂ ਨੂੰ ਸਫਲਤਾ ਮਿਲ ਗਈ। ਓਥੇ ਸਰਕਾਰ ਨੇ ਇਕ ਅਜਿਹਾ ਵਿਵਾਦ ਪੂਰਨ ਟੈਕਸ ਹਟਾ ਦਿੱਤਾ, ਜਿਸ ਲਈ ਔਰਤਾਂ ਦੇ ਗਰੁੱਪ ਨੇ ਕਈ ਸਾਲਾਂ ਤੋਂ ਲੰਬੀ ਮੁਹਿੰਮ ਛੇੜ ਰੱਖੀ ਸੀ।
ਅਸਲ ਵਿੱਚ ਸਾਲ 2000 `ਚ ਟੈਮਪਨ ਟੈਕਸ, ਸੈਨੇਟਰੀ ਪੈਡਸ `ਤੇ ਵਸਤੂ ਅਤੇ ਸੇਵਾ ਟੈਕਸ (ਜੀ ਐਸ ਟੀ) ਲਾ ਦਿੱਤਾ ਗਿਆ। ਇਸ ਸਮੇਂ ਵਿਚ ਸੈਨੇਟਰੀ ਪੈਡ ਨੂੰ 10 ਫੀਸਦੀ ਟੈਕਸ ਨਾਲ ਵੇਚਿਆ ਜਾਂਦਾ ਸੀ। ਔਰਤਾਂ ਦੇ ਇਸ ਗਰੁੱਪ ਦੇ ਸਾਲਾਂ ਦੇ ਵਿਰੋਧ ਪਿੱਛੋਂ ਇਹ ਟੈਕਸ ਹਟਾ ਦਿੱਤਾ ਗਿਆ ਹੈ। ਫੈਡਰਲ ਮੰਤਰੀ ਕੇਲੀ ਓ ਡਾਇਰ ਨੇ ਕਿਹਾ ਕਿ ਇਸ ਨੂੰ ਹਟਾਏ ਜਾਣ ਦਾ ਆਸਟ੍ਰੇਲੀਆ ਦੀਆਂ ਲੱਖਾਂ ਔਰਤਾਂ ਨੂੰ ਲਾਭ ਹੋਵੇਗਾ। ਗ੍ਰੀਨ ਪਾਰਟੀ ਦੀ ਸੈਨੇਟਰ ਜੇਨਟ ਰਾਈਸ ਨੇ ਕਿਹਾ ਕਿ ਕਰੀਬ 18 ਸਾਲ ਲੜੀ ਲੰਬੀ ਲੜਾਈ ਨਾਲ ਇਹ ਜਸ਼ਨ ਦਾ ਦਿਨ ਆਇਆ ਹੈ। ਫੈਡਰਲ ਅਤੇ ਸਟੇਟ ਦੀਆਂ ਸਰਕਾਰਾਂ ਕੱਲ੍ਹ ਇਸ `ਤੇ ਸਹਿਮਤ ਹੋਈਆਂ ਕਿ ਟੈਕਸ ਹਟਾਇਆ ਜਾਂਦਾ ਹੈ। ਮੰਤਰੀ ਕੇਲੀ ਨੇ ਕਿਹਾ ਕਿ ਇਹ ਗੈਰ-ਜ਼ਰੂਰੀ ਟੈਕਸ ਸੀ, ਜੋ ਹਰ ਕੋਈ ਹਟਾਉਣ ਦੇ ਪੱਖ ਵਿਚ ਸੀ। ਇਸ ਟੈਕਸ ਨੂੰ ਹਟਾ ਲਏ ਜਾਣ ਪਿੱਛੋਂ ਲੱਖਾਂ ਔਰਤਾਂ ਨੇ ਕਿਹਾ ਕਿ ਅਸੀਂ ਤੁਹਾਡੇ ਬਹੁਤ ਧੰਨਵਾਦੀ ਹਾਂ। ਪ੍ਰਧਾਨ ਮੰਤਰੀ ਸਕਾਟ ਮੌਰੀਸਨ ਨੇ ਪਹਿਲਾਂ ਹੀ ਕਿਹਾ ਸੀ ਕਿ ਸੈਨੇਟਰੀ ਉਤਪਾਦਾਂ ਨੂੰ ਜੀ ਐਸ ਟੀ ਵਿੱਚ ਸ਼ਾਮਲ ਨਹੀਂ ਕੀਤਾ ਜਾਣਾ ਚਾਹੀਦਾ।