ਵਾਸ਼ਿੰਗਟਨ, 4 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਕ ਸੀਨੀਅਰ ਭਾਰਤੀ - ਅਮਰੀਕੀ ਮਹਿਲਾ ਨੂੰ ਆਪਣੇ ਐਟਮੀ ਊਰਜਾ ਵਿਭਾਗ ਵਿਚ ਨਿਯੁਕਤ ਕਰਨ ਦਾ ਫੈਸਲਾ ਕੀਤਾ ਹੈ।
ਆਧੁਨਿਕ ਰਿਐਕਟਰ ਦੇ ਵਿਕਾਸ ਵਿਚ ਤੇਜੀ ਲਿਆਉਣ ਲਈ ਇਕ ਨਵੇਂ ਕਨੂੰਨ ਉੱਤੇ ਦਸਖਤ ਕਰਨ ਦੇ ਕੁਝ ਦਿਨ ਬਾਅਦ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਡਾ. ਰੀਤਾ ਬਰਨਵਾਲ ਨੂੰ ਊਰਜਾ ਮੰਤਰਾਲਾ ਵਿਚ ਸਹਾਇਕ ਊਰਜਾ ਮੰਤਰੀ (ਐਟਮੀ ਊਰਜਾ) ਨਿਯੁਕਤ ਕੀਤਾ ਜਾਵੇਗਾ। ਇਹ ਮੰਤਰਾਲੇ ਵਿਚ ਮਹੱਤਵ ਪੂਰਨ ਪ੍ਰਬੰਧਕੀ ਅਹੁਦਾ ਹੈ।
ਬਰਨਵਾਲ ਇਸ ਵੇਲੇ ਗੇਟਵੇ ਫਾਰ ਐਕਸੀਲਰੇਟੇਡ ਇਨੋਵੇਸ਼ਨ ਇਨ ਨਿਊਕਲੀਅਰ (ਜੀ ਏ ਆਈ ਐਨ) ਵਿੱਚ ਫਸਟ ਡਾਇਰੈਕਟਰ ਵਜੋਂ ਕੰਮ ਕਰ ਰਹੀ ਹੈ। ਜੇ ਸੀਨੇਟ ਤੋਂ ਪੁਸ਼ਟੀ ਹੁੰਦੀ ਹੈ ਤਾਂ ਸਹਾਇਕ ਊਰਜਾ ਮੰਤਰੀ ਦੇ ਤੌਰ ਉੱਤੇ ਬਰਨਵਾਲ ਐਟਮੀ ਊਰਜਾ ਵਿਭਾਗ ਦੀ ਅਗਵਾਈ ਕਰੇਗੀ। ਖ਼ਬਰਾਂ ਅਨੁਸਾਰ ਇਸ ਤੋਂ ਪਹਿਲਾਂ ਉਹ ਵੇਸਟਿੰਗ ਹਾਉਸ ਵਿਚ ਤਕਨੀਕੀ ਵਿਕਾਸ ਅਤੇ ਕਾਰਜ ਦੀ ਡਾਇਰੈਕਟਰ ਵਜੋਂ ਕੰਮ ਕਰ ਚੁੱਕੀ ਹੈ। ਉਨ੍ਹਾਂ ਨੇ ਅਮਰੀਕੀ ਨੇਵੀ ਰਿਐਕਟਰਾਂ ਲਈ ਐਟਮੀ ਊਰਜਾ ਵਿਚ ਜਾਂਚ ਤੇ ਵਿਕਾਸ ਦੀ ਅਗਵਾਈ ਕੀਤੀ ਹੋਈ ਹੈ। ਟਰੰਪ ਨੇ ਪਿਛਲੇ ਹਫ਼ਤੇ ਹੀ ਐਟਮੀ ਊਰਜਾ ਇਨੋਵੇਸ਼ਨ ਕੈਪੇਬਿਲਿਟੀ ਐਕਟ ਉੱਤੇ ਦਸਖਤ ਕੀਤੇ ਸੀ।