‘ਜੰਨਤ-2’, ‘ਰੁਸਤਮ’, ‘ਕਮਾਂਡੋ-2’, ‘ਬਾਦਸ਼ਾਹੋ’ ਵਰਗੀਆਂ ਫਿਲਮਾਂ ਵਿੱਚ ਨਜ਼ਰ ਆ ਚੁੱਕੀ ਈਸ਼ਾ ਗੁਪਤਾ ਦੇ ਕਰੀਅਰ ਦੀ ਅੱਜ ਤੱਕ ਦੀ ਆਖਰੀ ਫਿਲਮ ਹੈ ਡਾਇਰੈਕਟਰ ਸ਼ਿੰਦਰ ਕਮਾਰ ਦੀ ਫਿਲਮ ‘ਟੋਟਲ ਧਮਾਲ’। ਇਹ ਬਾਕਸ ਆਫਿਸ 'ਤੇ ਕੁਝ ਖਾਸ ਕਮਾਲ ਨਹੀਂ ਦਿਖਾ ਸਕੀ। ਇਸ ਤੋਂ ਈਸ਼ਾ ਨਿਰਾਸ਼ ਹੈ, ਪਰ ਮਾਯੂਸ ਨਹੀਂ। ਫਿਲਹਾਲ ਈਸ਼ਾ ਕੁਝ ਵੱਖਰੀ ਤਰ੍ਹਾਂ ਦੀਆਂ ਫਿਲਮਾਂ 'ਚ ਬਿਜ਼ੀ ਹੈ। ਪੇਸ਼ ਹਨ, ਉਸ ਨਾਲ ਗੱਲਬਾਤ ਦੇ ਪ੍ਰਮੁੱਖ ਅੰਸ਼ :
* ਅੱਜਕੱਲ੍ਹ ਤੁਸੀਂ ਵੱਖ ਤਰ੍ਹਾਂ ਦੀਆਂ ਫਿਲਮਾਂ ਵਿੱਚ ਵੱਖ ਤਰ੍ਹਾਂ ਦੇ ਕਿਰਦਾਰ ਨਿਭਾਉਣ 'ਤੇ ਜ਼ੋਰ ਦੇਂਦੇ ਹੋ। ਇਸ ਤਬਦੀਲੀ ਦੀ ਕੀ ਵਜ੍ਹਾ ਹੈ?
- ਇਸ ਦੀ ਅਹਿਮ ਵਜ੍ਹਾ ਇਹ ਹੈ ਕਿ ਫਿਲਮ 'ਚ ਮੇਰੇ ਰੋਲ ਦੀ ਇੰਪੋਰਟੈਂਸ ਪਤਾ ਲੱਗੇ। ਉਂਝ ਟਾਈਮ ਵੀ ਬਦਲ ਰਿਹਾ ਹੈ। ਦਰਸ਼ਕ ਵੀ ਬਦਲ ਰਹੇ ਹਨ। ਦਰਸ਼ਕਾਂ ਨੂੰ ਸਮਾਰਟ ਕਿਰਦਾਰ ਚਾਹੀਦੇ ਹਨ। ਹੀਰੋਇਨ ਦੇ ਤੌਰ 'ਤੇ ਵੀ ਉਨ੍ਹਾਂ ਨੂੰ ਉਹ ਟਿਪੀਕਲ ਕਿਰਦਾਰ ਨਹੀਂ ਚਾਹੀਦੇ। ਇਸ ਲਈ ਖੁਦ ਨੂੰ ਵੱਖਰੇ ਤਰੀਕੇ ਨਾਲ ਪ੍ਰੈਜ਼ੈਂਟ ਕਰਨ 'ਤੇ ਜ਼ੋਰ ਦੇ ਰਹੀ ਹਾਂ। ਸਹੀ ਮੌਕਿਆਂ ਦੀ ਭਾਲ ਕਰਦੀ ਰਹਿੰਦੀ ਹਾਂ।
* ਕੀ ਫਿਲਮ ਨਗਰੀ ਵਿੱਚ ਬਿਨਾਂ ਗਾਡਫਾਦਰ ਦੇ ਕੰਮ ਮਿਲਣਾ ਸੱਚਮੁੱਚ ਮੁਸ਼ਕਲ ਹੈ?
- ਬਾਲੀਵੁੱਡ 'ਚ ਗਾਡਫਾਦਰ ਦਾ ਹੋਣਾ ਜ਼ਰੂਰੀ ਹੈ, ਪਰ ਇਹ ਨਹੀਂ ਭੁੱਲਣਾ ਚਾਹੀਦਾ ਕਿ ਬਾਲੀਵੁੱਡ ਵਿੱਚ ਟੇਲੈਂਟ ਬੋਲਦਾ ਹੈ, ਪਰਿਵਾਰਕ ਬੈਕਗਰਾਊਂਡ ਕੰਮ ਨਹੀਂ ਆਉਂਦੀ। ਸ਼ੁਰੂਆਤੀ ਦੌਰ 'ਚ ਪਰਵਾਰਕ ਬੈਕਗਰਾਊਂਡ ਮਦਦ ਜ਼ਰੂਰ ਕਰਦੀ ਹੈ, ਪਰ ਆਖਰ ਆਪਣੇ ਆਪ ਨੂੰ ਸਾਬਤ ਕਰਨਾ ਪੈਂਦਾ ਹੈ। ਮੈਂ ਇਸ ਗੱਲ ਤੋਂ ਇਨਕਾਰ ਨਹੀਂ ਕਰਦੀ ਕਿ ਜੇ ਮੇਰੀ ਬੈਕਗਰਾਊਂਡ ਵੀ ਫਿਲਮੀ ਹੁੰਦੀ ਤਾਂ ਸ਼ਾਇਦ ਮੇਰੇ ਕਰੀਅਰ ਦੀ ਦਸ਼ਾ ਅਤੇ ਦਿਸ਼ਾ ਦੋਵੇਂ ਹੋਰ ਹੁੰਦੀਆਂ।
* ਤੁਹਾਡੀ ਫਿਲਮ ‘ਟੋਟਲ ਧਮਾਲ’ ਕੁਝ ਖਾਸ ਨਹੀਂ ਚੱਲੀ। ਕੀ ਕਹੋਗੇ?
- ‘ਧਮਾਲ' ਸੀਰੀਜ਼ ਦੀਆਂ ਦੋਵੇਂ ਫਿਲਮਾਂ ਦੀ ਤਰ੍ਹਾਂ ‘ਟੋਟਲ ਧਮਾਲ’ ਬੇਸ਼ੱਕ ਸੁਪਰਹਿੱਟ ਨਹੀਂ ਰਹੀ, ਪਰ ਪਾਗਲਪਣ ਅਤੇ ਹਾਸੇ-ਮਜ਼ਾਕ ਨਾਲ ਭਰਪੂਰ ਇਸ ਫਿਲਮ ਨੇ ਲਾਗਤ ਤੋਂ ਕਿਤੇ ਵੱਧ ਕਮਾਈ ਕੀਤੀ ਹੈ। ਇਸ ਵਿੱਚ ਮੇਰਾ ਰੋਲ ਵੀ ਕਾਫੀ ਵੱਖਰਾ ਹੈ ਕਿਉਂਕਿ ਮੈਨੂੰ ਇਹ ਸਭ ਕੁਝ ਕਰਨਾ ਪਸੰਦ ਸੀ।
* ਅਜਿਹੀ ਕੋਈ ਖਾਸ ਕਿਰਦਾਰ, ਜਿਸ ਨੂੰ ਨਿਭਾਉਣ ਦੀ ਇੱਛਾ ਹੋਵੇ?
- ਮੈਂ ਫਿਲਮ ਨਗਰੀ ਵਿੱਚ ਜ਼ਿਆਦਾ ਪੁਰਾਣੀ ਨਹੀਂ, ਪਰ ਫਿਲਮ ਨਗਰੀ 'ਚ ਜੋ ਵੱਡੇ ਫਿਲਮ ਮੇਕਰਸ ਹਨ ਜਾਂ ਫਿਰ ਉਹ ਤੁਹਾਨੂੰ ਜ਼ਿਆਦਾ ਵੱਖਰੇ ਰੋਲ ਵਿੱਚ ਨਹੀਂ ਦੇਖਣਾ ਚਾਹੁੰਦੇ, ਫਿਰ ਵੀ ਮੈਂ ਕੋਸ਼ਿਸ਼ ਕਰ ਰਹੀ ਹਾਂ ਕਿ ਵੱਖ ਵੱਖ ਕਿਰਦਾਰਾਂ ਦੇ ਨਾਲ ਪਰਦੇ 'ਤੇ ਆਵਾਂ। ਮੈਂ ਰੋਮਾਂਟਿਕ ਫਿਲਮ ਕੀਤੀ ਹੈ, ਐਕਸ਼ਨ ਕੀਤੀ ਹੈ ਅਤੇ ਕਾਮੇਡੀ ਵਿੱਚ ਵੀ ਹੱਥ ਅਜ਼ਮਾਇਆ ਹੈ। ਮਤਲਬ, ਖੁਦ ਨੂੰ ਐਕਟਿੰਗ ਦੀਆਂ ਵੱਖ-ਵੱਖ ਵਿਧਾਵਾਂ ਨਾਲ ਜੋੜ ਰਹੀ ਹਾਂ।
* ਆਪਣੇ ਲਈ ਕਿਸ ਤਰ੍ਹਾਂ ਦੇ ਲੜਕੇ ਨੂੰ ਪਹਿਲ ਦਿਓਗੇ?
- ਮੈਂ 5 ਫੁੱਟ ਨੌਂ ਇੰਚ ਲੰਬੀ ਹਾਂ। ਇਸ ਲਈ ਲੰਬਾਈ ਦੇ ਪੱਖ ਤੋਂ ਬਿਲਕੁਲ ਸਖਤ ਹਾਂ। ਮੇਰਾ ਜੀਵਨ ਸਾਥੀ ਘੱਟੋ ਘੱਟ ਛੇ ਫੁੱਟ ਦਾ ਚਾਹੀਦਾ ਹੈ। ਉਂਝ ਮੈਨੂੰ ਉਹੋ ਜਿਹੇ ਲੜਕੇ ਬਿਲਕੁਲ ਪਸੰਦ ਨਹੀਂ, ਜੋ ਖੁਦ ਨੂੰ ਤੀਸ ਮਾਰ ਖਾਂ ਸਮਝਦੇ ਹਨ।
* ਐਕਸਪੋਜ਼ਰ ਬਾਰੇ ਤੁਹਾਡਾ ਕੀ ਰੁਖ਼ ਹੈ?
- ਕਹਾਣੀ ਦੀ ਮੰਗ 'ਤੇ ਅਜਿਹਾ ਕਰ ਸਕਦੀ ਹਾਂ, ਪਰ ਬਿਨਾਂ ਵਜ੍ਹਾ ਸਰੀਰ ਦਿਖਾਉਣਾ ਮੈਨੂੰ ਪਸੰਦ ਨਹੀਂ। ਅਜਿਹਾ ਕੁਝ ਸੀਨ ਦੀ ਡਿਮਾਂਡ 'ਤੇ ਹੀ ਕਰਾਂਗੀ।