ਲਾਹੌਰ, 21 ਮਈ (ਪੋਸਟ ਬਿਊਰੋ)- ਪਾਕਿਸਤਾਨ ਦੀ ਸਿੰਧ ਯੂਨੀਵਰਸਿਟੀ ਨੇ ਸੀਰੀਆ ਵਿੱਚ ਇਸਲਾਮੀ ਸਟੇਟ (ਆਈ ਐਸ) ਤੋਂ ਹਥਿਆਰਾਂ ਦੀ ਸਿਖਲਾਈ ਲੈ ਚੁੱਕੀ ਇਕ 22 ਸਾਲਾ ਕੁੜੀ ਦਾ ਦਾਖਲਾ ਰੱਦ ਕਰ ਦਿੱਤਾ ਹੈ।
ਇਸ ਸੰਬੰਧ ਵਿੱਚ ਦੱਸਿਆ ਗਿਆ ਹੈ ਕਿ ਸੂਬਾ ਸਿੰਧ 'ਚ ਲਿਆਕਤ ਯੂਨੀਵਰਸਿਟੀ ਆਫ ਮੈਡੀਕਲ ਅਤੇ ਹੈਲਥ ਸਾਇੰਸਜ਼ ਵਿੱਚ ਦੂਜੇ ਵਰ੍ਹੇ ਦੀ ਵਿਦਿਆਰਥਣ ਨੌਰੀਨ ਲੇਘਾਰੀ ਫਰਵਰੀ 2017 ਵਿੱਚ ਆਪਣੇ ਜੱਦੀ ਸ਼ਹਿਰ ਹੁਸੈਨਾਬਾਦ ਤੋਂ ਅਚਾਨਕ ਲਾਪਤਾ ਹੋ ਗਈ ਸੀ। ਦੋ ਮਹੀਨੇ ਬਾਅਦ ਉਸ ਨੂੰ ਲਾਹੌਰ 'ਚ ਸੁਰੱਖਿਆ ਦਸਤਿਆਂ ਨਾਲ ਮੁਕਾਬਲੇ ਦੌਰਾਨ ਗ੍ਰਿਫਤਾਰ ਕੀਤਾ ਗਿਆ, ਜਦ ਕਿ ਉਕਤ ਮੁਕਾਬਲੇ 'ਚ ਉਸ ਦਾ ਇਕ ਸਾਥੀ ਮਾਰਿਆ ਗਿਆ ਸੀ। ਉਸ ਦੀ ਗ੍ਰਿਫਤਾਰੀ ਦੇ ਬਾਅਦ ਲਿਆਕਤ ਯੂਨੀਵਰਸਿਟੀ ਨੇ ਉਸ ਦਾ ਦਾਖਲਾ ਰੱਦ ਕਰ ਦਿੱਤਾ। ਜੇਲ੍ਹ 'ਚੋਂ ਰਿਹਾਅ ਹੋਣ ਉਪਰੰਤ ਉਸ ਨੇ ਨਵੰਬਰ 2018 ਵਿੱਚ ਸਿੰਧ ਯੂਨੀਵਰਸਿਟੀ ਦੇ ਅੰਗਰੇਜ਼ੀ ਵਿਭਾਗ 'ਚ ਦਾਖਲਾ ਲੈ ਲਿਆ, ਪਰ ਜਦੋਂ ਯੂਨੀਵਰਸਿਟੀ ਨੂੰ ਉਸ ਦੇ ਪਿਛੋਕੜ ਬਾਰੇ ਪਤਾ ਲੱਗਾ ਤਾਂ ਉਸ ਨੇ ਨੌਰੀਨ ਲੇਘਾਰੀ ਦਾ ਦਾਖਲਾ ਰੱਦ ਕਰ ਦਿੱਤਾ। ਸਮਝਿਆ ਜਾਂਦਾ ਹੈ ਕਿ ਉਸ ਦੇ ਪਿਤਾ ਡਾ. ਅਬਦੁਲ ਜੱਬਾਰ ਲੇਘਾਰੀ ਖੁਦ ਵੀ ਡਾ. ਐਮ ਏ ਕਾਜ਼ੀ ਇੰਸਟੀਚਿਊਟ ਆਫ ਕੈਮਿਸਟਰੀ 'ਚ ਪੋ੍ਰਫੈਸਰ ਹਨ। ਨੌਰੀਨ ਤੇ ਉਸ ਦੇ ਪਿਤਾ ਨੇ ਸਿੰਧ ਯੂਨੀਵਰਸਿਟੀ ਦੇ ਖਿਲਾਫ ਸਿੰਧ ਹਾਈ ਕੋਰਟ 'ਚ ਇਕ ਸੰਵਿਧਾਨਕ ਪਟੀਸ਼ਨ ਦਾਇਰ ਕਰ ਕੇ ਦਲੀਲ ਦਿੱਤੀ ਹੈ ਕਿ ਕਾਨੂੰਨ ਦੇ ਮੁਤਾਬਕ ਯੂਨੀਵਰਸਿਟੀ ਉਸ ਨੂੰ ਸਿੱਖਿਆ ਦੇ ਅਧਿਕਾਰ ਤੋਂ ਵਾਂਝਾਂ ਨਹੀਂ ਕਰ ਸਕਦੀ। ਵਾਈਸ ਚਾਂਸਲਰ ਫਤਿਹ ਬੁਰਫਤ ਦਾ ਕਹਿਣਾ ਹੈ ਕਿ ਯੂਨੀਵਰਸਿਟੀ ਪ੍ਰਬੰਧ ਕਾਨੂੰਨ ਇਮੀਗਰੇਸ਼ਨ ਏਜੰਸੀਆਂ ਵੱਲੋਂ ਇਸ ਬਾਰੇ ਹੁਕਮ ਮਿਲਣ ਉੱਤੇ ਹੀ ਆਪਣਾ ਫੈਸਲਾ ਬਦਲੇਗਾ।