ਇੰਡਸਟਰੀ ਵਿੱਚ ਕਾਫੀ ਸਮੇਂ ਤੋਂ ਚਰਚਾ ਹੈ ਕਿ ਐਸ਼ਵਰਿਆ ਰਾਏ ਬੱਚਨ ਡਾਇਰੈਕਟਰ ਮਣੀਰਤਨਮ ਦੀ ਤਮਿਲ ਫਿਲਮ ਵਿੱਚ ਨਜ਼ਰ ਆਏਗੀ। ਸੁਣਨ ਵਿੱਚ ਆਇਆ ਹੈ ਕਿ ਇਸ ਵਿੱਚ ਐਸ਼ ਹੀਰੋਇਨ ਦਾ ਨਹੀਂ, ਬਲਕਿ ਵੈਂਪ ਦਾ ਰੋਲ ਕਰੇਗੀ। ਫਿਲਮ ਦਾ ਨਾਂਅ ‘ਪੂਨਿਅਨ ਸੈਲਵਨ’ ਹੋਵੇਗਾ, ਜੋ ਇਸੇ ਨਾਂਅ ਨਾਲ ਲਿਖੇ ਗਏ ਲੋਕਪ੍ਰਿਯ ਤਮਿਲ ਨਾਵਲ 'ਤੇ ਆਧਾਰਤ ਹੈ। ਫਿਲਮ ਵਿੱਚ ਐਸ਼ਵਰਿਆ ਚੋਲਾ ਵੰਸ਼ ਦੀ ਰਾਣੀ ਨੰਦਿਨੀ ਦਾ ਕਿਰਦਾਰ ਨਿਭਾਏਗੀ, ਜੋ ਗ੍ਰੇਅ ਸ਼ੇਡ ਵਿੱਚ ਹੈ।
ਨੰਦਿਨੀ ਚੋਲਾ ਵੰਸ਼ ਦੇ ਸ਼ਾਸਕ ਪੇਰੀਆ ਪੇਜੁਵੇਟੀਆਰਾਰ ਦੀ ਪਤਨੀ ਸੀ। ਇਹ ਕਿਰਦਾਰ ਇੱਕ ਸੱਤਾ ਦੀ ਭੁੱਖੀ ਰਾਣੀ ਦਾ ਹੈ, ਜੋ ਆਪਣੇ ਪਤੀ ਨੂੰ ਸਾਜ਼ਿਸ਼ ਲਈ ਪ੍ਰੇਰਿਤ ਕਰਦੀ ਹੈ ਤੇ ਚੋਲਾ ਵੰਸ਼ ਦਾ ਵਿਨਾਸ਼ ਹੁੰਦਾ ਦੇਖਣਾ ਚਾਹੁੰਦੀ ਹੈ। ਇਹ ਨਾਵਲ ਕਾਫੀ ਚਰਚਿਤ ਹੈ ਤੇ ਮਣੀਰਤਨਮ ਇਸ ਉਤੇ ਕਾਫੀ ਸਮੇਂ ਤੋਂ ਫਿਲਮ ਬਣਾਉਣ ਬਾਰੇ ਸੋਚ ਰਹੇ ਸਨ।