ਨਵੀਂ ਦਿੱਲੀ, 4 ਅਕਤੂਬਰ (ਪੋਸਟ ਬਿਊਰੋ)- ਭਾਰਤੀ ਕ੍ਰਿਕਟ ਟੀਮ ਵਿੱਚ ਸਭ ਕੁਝ ਸਹੀ ਨਹੀਂ ਹੈ। ਕਪਤਾਨ ਵਿਰਾਟ ਕੋਹਲੀ ਅਤੇ ਟੀਮ ਮੈਨੇਜਮੈਂਟ ਨਾਲ ਕਈ ਖਿਡਾਰੀ ਸਹਿਮਤ ਨਹੀਂ ਹਨ। ਪਿੱਛੇ ਜਿਹੇ ਰੋਹਿਤ ਸ਼ਰਮਾ ਨੇ ਵਿਰਾਟ ਕੋਹਲੀ ਨੂੰ ਇੰਸਟਾਗ੍ਰਾਮ ਤੇ ਟਵਿੱਟਰ ਤੋਂ ਅਨਫਾਲੋ ਕੀਤਾ ਸੀ। ਏਦਾਂ ਹੀ ਏਸ਼ੀਆ ਕੱਪ ਦੇ ‘ਮੈਨ ਆਫ ਦ ਸੀਰੀਜ਼' ਸ਼ਿਖਰ ਧਵਨ ਨੂੰ ਵੈਸਟ ਇੰਡੀਜ਼ ਦੇ ਖਿਲਾਫ ਦੋ ਟੈਸਟ ਮੈਚਾਂ ਦੀ ਸੀਰੀਜ਼ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ।
ਸਿ਼ਖਰ ਧਵਨ ਨੂੰ ਟੀਮ ਤੋਂ ਹਟਾਉਣ ਉੱਤੇ ਸਵਾਲ ਇਸ ਲਈ ਉਠੇ ਹਨ ਕਿ ਇੰਗਲੈਂਡ ਦੌਰੇ ਦੌਰਾਨ ਵਿਰਾਟ ਦੀ ਪਤਨੀ ਅਨੁਸ਼ਕਾ ਸ਼ਰਮਾ ਅਤੇ ਧਵਨ ਦੀ ਪਤਨੀ ਆਇਸ਼ਾ ਮੁਖਰਜੀ ਦੀ ਤਲਖ ਬਹਿਸ ਹੋਈ। ਇਸ ਤੋਂ ਬਾਅਦ ਟੀਮ ਦੇ ਅੰਦਰ ਚਰਚਾ ਸ਼ੁਰੂ ਹੋ ਗਈ ਸੀ ਕਿ ਛੇਤੀ ਹੀ ਸ਼ਿਖਰ ਟੀਮ ਇੰਡੀਆ ਤੋਂ ਬਾਹਰ ਹੋਣਗੇ। ਧਵਨ ਨੇ ਏਸ਼ੀਆ ਕੱਪ 'ਚ ਪੰਜ ਵੰਨਡੇਅ ਵਿੱਚ ਦੋ ਸੈਂਕੜਿਆਂ ਦੇ ਨਾਲ 342 ਦੌੜਾਂ ਬਣਾਈਆਂ ਸਨ। ਇੰਗਲੈਂਡ ਦੌਰੇ ਵਿੱਚ ਭਾਰਤੀ ਟੀਮ 'ਚ ਸ਼ਾਮਲ ਰਹੇ ਇਕ ਖਿਡਾਰੀ ਨੇ ਕਿਹਾ ਕਿ ਟੀਮ 'ਚ ਸਭ ਕੁਝ ਠੀਕ ਨਹੀਂ। ਕਈ ਖਿਡਾਰੀ ਅਨੁਸ਼ਕਾ ਦੇ ਦਖਲ ਤੋਂ ਪਰੇਸ਼ਾਨ ਹਨ। ਜਦੋਂ ਉਹ ਟੀਮ ਦੇ ਨਾਲ ਹੁੰਦੀ ਹੈ ਤਾਂ ਕਦੇ-ਕਦੇ ਬੱਲੇਬਾਜ਼ਾਂ ਲਈ ਹੋਣ ਵਾਲੀ ਬੈਠਕ 'ਚ ਵੀ ਮੌਜੂਦ ਰਹਿੰਦੀ ਹੈ।
ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ ਸੀ ਸੀ ਆਈ) ਦੇ ਇਕ ਅਹੁਦੇਦਾਰ ਨੇ ਕਿਹਾ ਕਿ ਅਨੁਸ਼ਕਾ ਅਤੇ ਆਇਸ਼ਾ ਚੰਗੀਆਂ ਦੋਸਤ ਸਨ। ਦੋਵੇਂ ਹਮੇਸ਼ਾ ਇਕੱਠੀਆਂ ਰਹਿੰਦੀਆਂ ਸਨ। ਲੰਡਨ 'ਚ ਵੰਨਡੇਅ ਦੌਰਾਨ ਆਇਸ਼ਾ ਨੂੰ ਅਨੁਸ਼ਕਾ ਨਾਲ ਬਿਠਾਉਣ ਲਈ ਵਿਰਾਟ ਨੇ ਇਕ ਅਹੁਦੇਦਾਰ ਤੋਂ ਤਿੰਨ ਪਾਸ ਵੀ ਲਏ ਸਨ। ਜੇ ਕੁਝ ਹੋਇਆ ਹੈ ਤਾਂ ਇਸ ਮੈਚ ਦੇ ਬਾਅਦ ਹੀ ਹੋਇਆ ਹੈ। ਟੀਮ ਇੰਡੀਆ ਦੇ ਮੈਂਬਰ ਨੇ ਇਸ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਦੋਵੇਂ ਬੱਲੇਬਾਜ਼ਾਂ ਦੀਆਂ ਪਤਨੀਆਂ ਚੰਗੀਆਂ ਦੋਸਤ ਸਨ, ਪਰ ਇੰਗਲੈਂਡ ਦੌਰੇ ਦੌਰਾਨ ਅਨੁਸ਼ਕਾ ਨੇ ਆਇਸ਼ਾ ਨੂੰ ਉਨ੍ਹਾਂ ਦੇ ਪਰਵਾਰ ਬਾਰੇ ਇਹੋ ਜਿਹੀ ਸਲਾਹ ਦਿੱਤੀ, ਜੋ ਉਨ੍ਹਾਂ ਨੂੰ ਪਸੰਦ ਨਹੀਂ ਆਈ। ਇਸ ਪਿੱਛੋਂ ਦੋਵਾਂ ਦੇ ਰਸਤੇ ਅਲੱਗ ਹੋ ਗਏ। ਇਹ ਗੱਲ ਟੀਮ ਦੇ ਜ਼ਿਆਦਾਤਰ ਮੈਂਬਰਾਂ ਨੂੰ ਪਤਾ ਹੈ ਅਤੇ ਉਸ ਦੇ ਬਾਅਦ ਟੀਮ 'ਚ ਚਰਚਾ ਸ਼ੁਰੂ ਹੋ ਗਈ ਕਿ ਧਵਨ ਛੇਤੀ ਹੀ ਟੀਮ ਤੋਂ ਬਾਹਰ ਹੋ ਸਕਦੇ ਹਨ। ਇਹ ਸੰਜੋਗ ਹੈ ਕਿ ਏਸ਼ੀਆ ਕੱਪ ਵਿੱਚ ‘ਮੈਨ ਆਫ ਦ ਸੀਰੀਜ਼' ਬਣ ਜਾਣ ਦੇ ਬਾਵਜੂਦ ਸ਼ਿਖਰ ਨੂੰ ਵੈਸਟ ਇੰਡੀਜ਼ ਖਿਲਾਫ ਦੋ ਟੈਸਟ ਮੈਚਾਂ ਦੀ ਸੀਰੀਜ਼ ਤੋਂ ਬਾਹਰ ਕਰ ਦਿੱਤਾ ਗਿਆ।
ਸਭ ਨੂੰ ਪਤਾ ਹੈ ਕਿ ਭਾਰਤੀ ਪਿੱਚ ਉੱਤੇ ਸ਼ਿਖਰ ਦੌੜਾਂ ਬਣਾਉਂਦੇ ਅਤੇ ਇਸ ਨਾਲ ਸਾਲ ਦੇ ਅੰਤ 'ਚ ਹੋਣ ਵਾਲੇ ਆਸਟਰੇਲੀਆ ਦੌਰੇ ਲਈ ਉਨ੍ਹਾਂ ਦੀ ਚੋਣ ਕਰਨ ਲਈ ਮਜਬੂਰ ਹੋਣਾ ਪੈਂਦਾ। ਜਦੋਂ ਇਸ ਬਾਰੇ ਵਿਰਾਟ ਨੂੰ ਮੈਸੇਜ ਅਤੇ ਵਟਸਐਪ ਦੇ ਜ਼ਰੀਏ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਸੇ ਦਾ ਕੋਈ ਜਵਾਬ ਨਹੀਂ ਦਿੱਤਾ। ਕ੍ਰਿਕਟ ਅਧਿਕਾਰੀ ਨੇ ਅਨੁਸ਼ਕਾ ਦੇ ਬੱਲੇਬਾਜ਼ਾਂ ਲਈ ਹੋਣ ਵਾਲੀ ਬੈਠਕ ਦੌਰਾਨ ਮੌਜੂਦ ਰਹਿਣ ਤੋਂ ਇਨਕਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇੰਗਲੈਂਡ ਵਿੱਚ ਇਸ ਤਰ੍ਹਾਂ ਦੀ ਬੈਠਕ ਜਿਸ ਕਮਰੇ 'ਚ ਹੁੰਦੀ ਸੀ, ਉਥੇ ਮਸਾਜ ਰੂਮ ਹੈ ਜਿਸ ਵਿੱਚ ਕੋਈ ਨਾ ਕੋਈ ਖਿਡਾਰੀ ਮਸਾਜ ਕਰਾਉਂਦਾ ਰਹਿੰਦਾ ਸੀ। ਇਸ ਲਈ ਉਨ੍ਹਾਂ ਦੀ ਮੌਜੂਦਗੀ ਹੋ ਹੀ ਨਹੀਂ ਸੀ ਸਕਦੀ।