ਐਸ ਏ ਐਸ ਨਗਰ, 20 ਮਈ (ਪੋਸਟ ਬਿਊਰੋ)- ਪਾਰਲੀਮੈਂਟ ਚੋਣਾਂ ਦੌਰਾਨ ਕੱਲ੍ਹ ਫੇਸਬੁੱਕ ਉੱਤੇ ਲਾਈਵ ਹੋ ਕੇ ਵੋਟ ਪਾਉਣ ਵਾਲੇ ਰਾਹੁਲ ਕਾਲੀਆ ਅਤੇ ਭਾਨੂ ਪ੍ਰਤਾਪ ਦੇ ਖਿਲਾਫ ਕੁਰਾਲੀ ਥਾਣੇ 'ਚ ਐਫ ਆਈ ਆਰ ਦਰਜ ਕੀਤੀ ਗਈ ਹੈ। ਪੁਲਸ ਨੇ ਇਨ੍ਹਾਂ ਦੋਵਾਂ ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਡਿਪਟੀ ਕਮਿਸ਼ਨਰ-ਕਮ-ਜ਼ਿਲਾ ਚੋਣ ਅਫਸਰ ਗੁਰਪ੍ਰੀਤ ਕੌਰ ਸਪਰਾ ਨੇ ਦੱਸਿਆ ਕਿ ਬੂਥ ਨਗਰ 150 ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਕੁਰਾਲੀ ਵਿੱਚ ਕੱਲ੍ਹ ਲੋਕ ਸਭਾ ਚੋਣਾਂ ਦੌਰਾਨ ਰਾਹੁਲ ਕਾਲੀਆ ਤੇ ਭਾਨੂ ਪ੍ਰਤਾਪ ਨਾਂ ਦੇ ਵਿਅਕਤੀਆਂ ਨੇ ਫੇਸਬੁੱਕ 'ਤੇ ਲਾਈਵ ਹੋ ਕੇ ਆਪਣੀ ਵੋਟ ਪਾਈ ਸੀ। ਇਸ ਨਾਲ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ਦੀ ਉਲੰਘਣਾ ਹੋਈ ਹੈ। ਉਨ੍ਹਾਂ ਇਸ ਪੋਲਿੰਗ ਬੂਥ ਦੇ ਸੁਰੱਖਿਆ ਅਮਲੇ ਦੇ ਖਿਲਾਫ ਵੀ ਫਰਜ਼ 'ਚ ਕੁਤਾਹੀ ਕਰਨ ਦੇ ਦੋਸ਼ ਹੇਠ ਕਾਰਵਾਈ ਕਰਨ ਦਾ ਹੁਕਮ ਦਿੱਤਾ ਹੈ, ਕਿਉਂਕਿ ਉਨ੍ਹਾਂ ਇਸ ਵੋਟਰ ਨੂੰ ਬਿਨਾਂ ਚੈਕਿੰਗ ਕੀਤੇ ਪੋਲਿੰਗ ਬੂਥ ਅੰਦਰ ਕਿਵੇਂ ਜਾਣ ਦਿੱਤਾ। ਜ਼ਿਲਾ ਚੋਣ ਅਫਸਰ ਸਪਰਾ ਨੇ ਦੱਸਿਆ ਕਿ ਇਸ ਪੋਲਿੰਗ ਬੂਥ ਦੇ ਪ੍ਰੀਜ਼ਾਈਡਿੰਗ ਅਫਸਰ ਜੁਗਿੰਦਰ ਸਿੰਘ, ਸੁਪਰਡੈਂਟ ਦਫਤਰ ਪੰਜਾਬ ਸਕੂਲ ਸਿੱਖਿਆ ਬੋਰਡ (ਪ੍ਰੀਖਿਆ ਸ਼ਾਖਾ) ਨੂੰ ਵੀ ਤੁਰੰਤ ਪੋਲਿੰਗ ਡਿਊਟੀ ਤੋਂ ਫਾਰਗ ਕਰਨ ਲਈ ਕਿਹਾ ਹੈ। ਉਨ੍ਹਾਂ ਇਸ ਬੂਥ ਦੀ ਏ ਪੀ ਆਰ ਓ ਮਲਕਾ, ਸੀਨੀਅਰ ਸਹਾਇਕ ਦਫਤਰ ਡੀ ਪੀ ਆਈ (ਪ੍ਰਾਇਮਰੀ) ਪੰਜਾਬ ਮੁਹਾਲੀ ਨੂੰ ਪ੍ਰੀਜ਼ਾਈਡਿੰਗ ਅਫਸਰ ਦਾ ਕੰਮ ਸੌਂਪਣ ਤੇ ਰਿਜ਼ਰਵ ਸਟਾਫ ਵਿੱਚੋਂ ਇਕ ਮੁਲਾਜ਼ਮ ਨੂੰ ਇਸ ਪੋਲਿੰਗ ਬੂਥ 'ਤੇ ਫੌਰਨ ਬਤੌਰ ਪੋਲਿੰਗ ਅਫਸਰ ਵਜੋਂ ਲਾਉਣ ਦਾ ਆਦੇਸ਼ ਦਿੱਤਾ।