ਵਾਸ਼ਿੰਗਟਨ, 20 ਮਈ (ਪੋਸਟ ਬਿਊਰੋ)- ਬਾਥਰੂਮ 'ਚ ਵਰਤਣ ਵਾਲੇ ਹਿੰਦੂ ਦੇਵੀ ਦੇਵਤਿਆਂ ਦੀ ਤਸਵੀਰ ਵਾਲੇ ਬਾਥ ਮੈਟ ਤੇ ਹੋਰ ਸਾਮਾਨ ਵੇਚਣ ਲਈ ਅਮਰੀਕੀ ਈ-ਕਾਮਰਸ ਕੰਪਨੀ ਵੇਫੇਅਰ ਨੂੰ ਲੋਕਾਂ ਦੇ ਗੁੱਸੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਹਿੰਦੂਆਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਲਈ ਕਈ ਵਰਕਰ ਗਰੁੱਪਾਂ ਨੇ ਕੰਪਨੀ ਦੀ ਆਲੋਚਨਾ ਕੀਤੀ ਹੈ ਅਤੇ ਇਹ ਮਾਮਲਾ ਲਗਾਤਾਰ ਭਖਦਾ ਜਾ ਰਿਹਾ ਹੈ।
ਘਰੇਲੂ ਸਾਮਾਨ ਵੇਚਣ ਵਾਲੀ ਇਹ ਕੰਪਨੀ ਨਾ ਸਿਰਫ ਭਗਵਾਨ ਗਣੇਸ਼, ਬਲਕਿ ਭਗਵਾਨ ਸ਼ਿਵ ਦੀ ਤਸਵੀਰ ਦੇ ਬਾਥਰੂਮ ਮੈਟ ਵੀ ਵੇਚ ਰਹੀ ਹੈ, ਜਿਨ੍ਹਾਂ ਦੀ ਕੀਮਤ 38 ਡਾਲਰ ਹੈ। ਇਸ ਤਰ੍ਹਾਂ ਦੇ ਸਾਮਾਨ ਵੇਚਣ ਲਈ ਪਹਿਲਾਂ ਵੀ ਵੇਫੇਅਰ ਖਿਲਾਫ ਸ਼ਿਕਾਇਤ ਕੀਤੀ ਗਈ ਹੈ। ਪਿਛਲੇ ਸਾਲ ਭਗਵਾਨ ਗਣੇਸ਼ ਦੀ ਤਸਵੀਰ ਵਾਲੇ ਚੌਪਿੰਗ ਬੋਰਡ (ਸਬਜ਼ੀ ਕੱਟਣ ਲਈ ਵਰਤਣ ਵਾਲਾ ਬੋਰਡ) ਵੇਚਣ ਲਈ ਵੀ ਇਹ ਕੰਪਨੀ ਵਿਵਾਦਾਂ ਵਿੱਚ ਘਿਰੀ ਸੀ। ਹਿੰਦੂ ਵਰਕਰਾਂ ਦੇ ਵਿਰੋਧ ਪ੍ਰਦਰਸ਼ਨ ਤੋਂ ਬਾਅਦ ਕੰਪਨੀ ਨੂੰ ਇਸ ਚੌਪਿੰਗ ਬੋਰਡ ਨੂੰ ਆਪਣੇ ਪਲੇਟਫਾਰਮ ਤੋਂ ਹਟਾਉਣ ਦੇ ਨਾਲ ਮਾਫੀ ਮੰਗਣੀ ਪਈ ਸੀ। ਪਿਛਲੇ ਹਫਤੇ ਭਗਵਾਨ ਗਣੇਸ਼ ਦੀ ਤਸਵੀਰ ਵਾਲੇ ਗਲੀਚੇ ਤੇ ਟਾਇਲਟ ਕਵਰ ਵੇਚਣ ਲਈ ਦਿੱਗਜ ਈ-ਸ਼ਾਪਿੰਗ ਕੰਪਨੀ ਐਮਾਜ਼ੋਨ ਵੀ ਵਿਵਾਦਾਂ 'ਚ ਹੈ। ਇਸ ਬਾਰੇ ਕੰਪਨੀ ਤੋਂ ਮਾਫੀ ਮੰਗਵਾਉਣ ਲਈ ਪਟੀਸ਼ਨ ਦਾਇਰ ਕੀਤੀ ਗਈ ਹੈ, ਜਿਸ 'ਤੇ ਹਾਲੇ ਤੱਕ ਦੁਨੀਆ ਭਰ ਦੇ ਇਕ ਲੱਖ 56 ਹਜ਼ਾਰ ਲੋਕਾਂ ਨੇ ਹਸਤਾਖਰ ਕੀਤੇ ਹਨ। ਸਾਲ 2014 'ਚ ਭਗਵਾਨ ਗਣੇਸ਼ ਦੀ ਤਸਵੀਰ ਵਾਲੀ ਪੈਂਟ ਵੇਚਣ ਲਈ ਵੀ ਐਮਾਜ਼ੋਨ ਦਾ ਕਾਫੀ ਵਿਰੋਧ ਹੋਇਆ ਸੀ।