ਇਸਲਾਮਾਬਾਦ, 20 ਮਈ (ਪੋਸਟ ਬਿਊਰੋ)- ਵਿੱਤੀ ਸੰਕਟ ਤੋਂ ਬਾਅਦ ਮਹਿੰਗਾਈ ਨਾਲ ਜੂਝ ਰਹੇ ਪਾਕਿਸਤਾਨ ਦੀਆਂ ਮੁਸ਼ਕਲਾਂ ਘੱਟ ਨਹੀਂ ਹੋ ਰਹੀਆਂ ਹਨ। ਮੀਡੀਆ ਰਿਪੋਰਟਾਂ ਮੁਤਾਬਕ ਪਾਕਿਸਤਾਨ ਵੱਲੋਂ ਅਰਬ ਸਾਗਰ 'ਚ ਕੀਤੀ ਜਾ ਰਹੀ ਕੱਚੇ ਤੇਲ ਦੀ ਖੋਜ ਬੇਕਾਰ ਚਲੀ ਗਈ ਹੈ। ਇਥੇ ਤੇਲ ਦਾ ਕੋਈ ਭੰਡਾਰ ਨਹੀਂ ਮਿਲਿਆ ਹੈ ਅਤੇ ਦਾਅਵਾ ਕੀਤਾ ਗਿਆ ਹੈ ਕਿ ਅੱਜ ਤੋਂ ਤੇਲ ਖੋਜ ਦਾ ਕੰਮ ਵੀ ਬੰਦ ਕਰ ਦਿੱਤਾ ਗਿਆ ਹੈ।
ਇਸ ਸਾਲ ਮਾਰਚ ਵਿੱਚ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਕਿਹਾ ਸੀ ਕਿ ਪਾਕਿਸਤਾਨ ਨੂੰ ਅਰਬ ਸਾਗਰ ਵਿੱਚ ਤੇਲ ਤੇ ਗੈਸ ਦਾ ਵੱਡਾ ਭੰਡਾਰ ਮਿਲਣ ਵਾਲਾ ਹੈ। ਉਨ੍ਹਾ ਨੇ ਦਾਅਵਾ ਕੀਤਾ ਸੀ ਕਿ ਇਹ ਪਾਕਿਸਤਾਨ ਲਈ ਜੈਕਪਾਟ ਨਿਕਲਣ ਵਾਂਗ ਹੈ ਅਤੇ ਇਸ ਨਾਲ ਉਨ੍ਹਾਂ ਦੇ ਦੇਸ਼ ਦੀਆਂ ਸਾਰੀਆਂ ਆਰਥਿਕ ਸਮੱਸਿਆਵਾਂ ਮੁੱਕ ਜਾਣਗੀਆਂ। ਇਮਰਾਨ ਨੇ ਕਿਹਾ ਸੀ ਕਿ ਡ੍ਰਿਲਿੰਗ ਦਾ ਕਾਰਜ ਜਲਦ ਪੂਰਾ ਹੋ ਜਾਵੇਗਾ, ਪਰ ਇਹ ਕਾਰਜ ਪੂਰਾ ਹੋਣ 'ਤੇ ਪਾਕਿਸਤਾਨ ਨੂੰ ਵੱਡੀ ਨਿਰਾਸ਼ਾ ਹੱਥ ਲੱਗੀ ਹੈ। ਪੈਟਰੋਲੀਅਮ ਮਾਮਲਿਆਂ ਬਾਰੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੇ ਵਿਸ਼ੇਸ਼ ਸਹਾਇਕ ਨਦੀਮ ਬਾਬਰ ਦੇ ਹਵਾਲੇ ਨਾਲ ਆਈਆਂ ਖਬਰਾਂ ਵਿੱਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਦੇ ਅਧਿਕਾਰ ਖੇਤਰ ਵਾਲੇ ਅਰਬ ਸਾਗਰ ਵਿੱਚ ਕਰਾਚੀ ਨੇੜੇ 5500 ਮੀਟਰ ਡੂੰਘਾਈ ਤੱਕ ਤੇਲ ਖੋਜ ਦਾ ਕੰਮ ਪੂਰਾ ਹੋ ਗਿਆ ਹੈ। ਇਸ ਖੇਤਰ ਨੂੰ ਕੇਕੜਾ-1 ਨਾਂਅ ਦਿੱਤਾ ਗਿਆ ਹੈ। ਬਾਬਰ ਦੇ ਹਵਾਲੇ ਨਾਲ ਰਿਪੋਰਟਾਂ ਵਿੱਚ ਕਿਹਾ ਗਿਆ ਹੈ ਕਿ ਇਸ ਖੇਤਰ 'ਚ ਤੇਲ ਜਾਂ ਗੈਸ ਦਾ ਕੋਈ ਭੰਡਾਰ ਨਹੀਂ ਮਿਲਿਆ ਅਤੇ ਡੀ ਜੀ ਪੈਟਰੋਲੀਅਮ ਨੂੰ ਇਸ ਖੋਜ ਦੇ ਨਤੀਜਿਆਂ ਤੋਂ ਜਾਣੂ ਕਰਵਾ ਦਿੱਤਾ ਗਿਆ ਹੈ। ਇਸ ਤੇਲ ਖੋਜ ਦੇ ਕਾਰਜ 'ਤੇ ਕਰੀਬ 100 ਮਿਲੀਅਨ ਡਾਲਰ ਦਾ ਖਰਚ ਆਇਆ ਹੈ।
ਇਟਲੀ ਦੀ ਅੰਤਰਰਾਸ਼ਟਰੀ ਆਇਲ ਐਕਸਪਲੋਰੇਸ਼ਨ ਕੰਪਨੀ ਈ ਐੱਨ ਆਈ ਪਾਕਿਸਤਾਨ ਵਿੱਚ ਕਰਾਚੀ ਕੋਲ ਅਰਬ ਸਾਗਰ ਵਿੱਚ ਤੇਲ ਤੇ ਗੈਸ ਦੀ ਖੋਜ ਲਈ ਡ੍ਰਿਲਿੰਗ ਦਾ ਕੰਮ ਕਰ ਰਹੀ ਸੀ। ਇਸ ਕੰਮ ਵਿੱਚ ਅਮਰੀਕਾ ਦੀ ਵੱਡੀ ਆਇਲ ਐਂਡ ਗੈਸ ਐਕਸਪਲੋਰੇਸ਼ਨ ਕੰਪਨੀ ਐਕਜੋਨਮੋਬਿਲ ਪਾਕਿਸਤਾਨ ਦੀ ਆਇਲ ਐਂਡ ਗੈਸ ਡਿਵੈਲਪਮੈਂਟ ਕੰਪਨੀ ਲਿਮਟਿਡ ਅਤੇ ਪਾਕਿਸਤਾਨ ਪੈਟਰੋਲੀਅਮ ਲਿਮਟਿਡ ਵੀ ਸਹਿਯੋਗ ਦੇ ਰਹੀਆਂ ਸਨ। ਡ੍ਰਿਲਿੰਗ ਦਾ ਕਾਰਜ ਕਰਾਚੀ ਕੋਸਟ ਤੋਂ 280 ਕਿਲੋਮੀਟਰ ਦੂਰ ਕੀਤਾ ਜਾ ਰਿਹਾ ਸੀ।