ਨਵੀਂ ਦਿੱਲੀ, 16 ਮਈ (ਪੋਸਟ ਬਿਊਰੋ)- ਲੋਕ ਸਭਾ ਚੋਣਾਂ ਵਿੱਚ ਭਾਜਪਾ ਵਰਕਰਾਂ ਦੇ ਪ੍ਰਚਾਰ ਵਾਲੀ ‘ਨਮੋ ਅਗੇਨ’ ਅਤੇ ‘ਮੈਂ ਵੀ ਚੌਕੀਦਾਰ’ ਟੀ-ਸ਼ਰਟ ਦੇ ਜਵਾਬ ਵਿੱਚ ਕਾਂਗਰਸ ਵਰਕਰ ਰਾਹੁਲ ਜੈਕੇਟਾਂ ਪਹਿਨ ਕੇ ਜਨਤਾ ਵਿੱਚ ਪਹੁੰਚਣ ਲੱਗੇ ਹਨ। ਕਾਂਗਰਸ ਵਰਕਰਾਂ ਵਿੱਚ ਪਾਪੂਲਰ ਹੋ ਰਹੀ ਜੈਕੇਟ ਉੱਤੇ ਰਾਹੁਲ ਗਾਂਧੀ ਦੀਆਂ ਤਸਵੀਰਾਂ ਹਨ।
ਇਸ ਟੀ-ਸ਼ਰਟ ਨੂੰ ਪਹਿਨਣ ਵਾਲੇ ਕਾਂਗਰਸੀ ਨੇਤਾਵਾਂ-ਵਰਕਰਾਂ ਦਾ ਕਹਿਣਾ ਹੈ ਕਿ ਇਸ ਜੈਕੇਟ ਦੇ ਜ਼ਰੀਏ ਇਹ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਹੋ ਰਹੀ ਹੈ ਕਿ ਰਾਹੁਲ ਗਾਂਧੀ ਦੀ ਅਗਵਾਈ 'ਤੇ ਲੋਕਾਂ ਨੂੰ ਪੂਰਾ ਭਰੋਸਾ ਹੈ। ਕਾਂਗਰਸੀ ਨੇਤਾ ਅਤੇ ਪੰਜਾਬ ਦੇ ਜਲੰਧਰ ਵਿੱਚ ਪਾਰਟੀ ਸਮੀਖਿਅਕ ਦੀ ਭੂਮਿਕਾ ਨਿਭਾ ਰਹੇ ਡਾਕਟਰ ਨਰੇਸ਼ ਕੁਮਾਰ ਬੀਤੇ ਦਿਨੀਂ ਹੁਸ਼ਿਆਰਪੁਰ ਵਿੱਚ ਰਾਹੁਲ ਗਾਂਧੀ ਦੀ ਰੈਲੀ ਵਿੱਚ ਇਹ ਜੈਕੇਟ ਪਹਿਨ ਕੇ ਮੰਚ ਉੱਤੇ ਮੌਜੂਦ ਸਨ। ਨਰੇਸ਼ ਕੁਮਾਰ ਨੇ ਕਿਹਾ ਕਿ ਕਾਂਗਰਸ ਵਰਕਰਾਂ ਵਿੱਚ ਰਾਹੁਲ ਜੈਕੇਟ ਕਾਫੀ ਪਾਪੂਲਰ ਹੋ ਚੁੱਕੀ ਹੈ। ਇਹ ਇਸ ਦਾ ਸੰਕੇਤ ਹੈ ਕਿ ਰਾਹੁਲ ਗਾਂਧੀ ਦੀ ਅਗਵਾਈ 'ਤੇ ਲੋਕਾਂ ਦਾ ਭਰੋਸਾ ਹੋ ਚੁੱਕਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਰਾਹੁਲ ਜੈਕੇਟ ਪਹਿਨਣਾ ਕਿਸੇ ਤਰ੍ਹਾਂ ਪਾਰਟੀ ਵੱਲੋਂ ਕੋਈ ਪਹਿਲ ਨਹੀਂ ਹੈ। ਇਹ ਸਾਡੇ ਸਮਰਥਕਾਂ ਅਤੇ ਵਰਕਰਾਂ ਦੀ ਖੁਦ ਦੀ ਪਹਿਲ ਹੈ।