ਓਟਵਾ, 15 ਮਈ (ਪੋਸਟ ਬਿਊਰੋ) : ਬੱਚਿਆਂ ਦੀ ਸਲੀਪਿੰਗ ਚੇਅਰ, ਜਿਹੜੀ ਅਮਰੀਕਾ ਵਿੱਚ ਦਰਜਨਾਂ ਮੌਤਾਂ ਦਾ ਕਾਰਨ ਬਣ ਚੁੱਕੀ ਹੈ, ਨੂੰ ਕੈਨੇਡਾ ਵਿੱਚ ਵਾਪਿਸ ਮੰਗਵਾ ਲਿਆ ਗਿਆ ਹੈ।
ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਫਿਸ਼ਰ ਪ੍ਰਾਈਸ ਰੌਕ ਐਨ ਪਲੇਅ ਸਲੀਪਰ ਦੇ ਚਾਰ ਮਾਡਲਜ਼ ਵਾਪਿਾਸ ਮੰਗਵਾਏ ਗਏ ਹਨ ਕਿਉਂਕਿ ਇਹ ਕੈਨੇਡੀਅਨ ਸੇਫਟੀ ਸਟੈਂਡਰਡਜ਼ ਨਾਲ ਮੇਲ ਨਹੀਂ ਸਨ ਖਾਂਦੇ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਜਨਵਰੀ 2018 ਤੇ ਅਪਰੈਲ 2019 ਦਰਮਿਆਨ 600 ਸਲੀਪਰਜ਼ ਐਮੇਜੌ਼ਨ ਦੀ ਕੈਨੇਡੀਅਨ ਵੈੱਬਸਾਈਟ ਰਾਹੀਂ ਵੇਚੇ ਗਏ। ਹੈਲਥ ਕੈਨੇਡਾ ਨੂੰ ਇਸ ਤਰ੍ਹਾਂ ਦੀ ਹੋਰ ਕਿਸੇ ਖਰੀਦ ਵਾਲੀ ਥਾਂ ਦਾ ਪਤਾ ਨਹੀਂ ਹੈ ਜਿੱਥੋਂ ਕੈਨੇਡੀਅਨਾਂ ਨੇ ਵਾਪਿਸ ਮੰਗਵਾਏ ਗਏ ਸਲੀਪਰ ਮਾਡਲ ਖਰੀਦੇ ਹੋ ਸਕਦੇ ਹਨ।
ਲੱਗਭਗ ਪੰਜ ਮਿਲੀਅਨ ਡਾਲਰ ਦੇ ਰੌਕ ਐਨ ਪਲੇਅ ਸਲੀਪਰਜ਼ ਪਿਛਲੇ ਮਹੀਨੇ ਅਮਰੀਕਾ ਵਿੱਚ ਵਾਪਿਸ ਮੰਗਵਾਏ ਗਏ। ਯੂਐਸ ਕੰਜਿ਼ਊਮਰ ਪ੍ਰੋਡਕਟ ਸੇਫਟੀ ਕਮਿਸ਼ਨ ਵੱਲੋਂ ਇਸ ਪ੍ਰੋਡਕਟ ਨੂੰ ਹੀ 32 ਬੱਚਿਆਂ ਦੀ ਮੌਤ ਦਾ ਕਾਰਨ ਮੰਨਿਆ ਜਾ ਰਿਹਾ ਹੈ। ਪਰ ਕੈਨੇਡਾ ਵਿੱਚ ਇਸ ਤਰ੍ਹਾਂ ਦੀ ਕੋਈ ਘਟਨਾ ਇਨ੍ਹਾਂ ਸਲੀਪਰਜ਼ ਕਾਰਨ ਅਜੇ ਤੱਕ ਨਹੀਂ ਵਾਪਰੀ ਹੈ।